follow us:
Dulquer Salmaan: బాహుబలి సినిమా అప్పటి నుంచి పాన్ ఇండియా మూవీ, పాన్ ఇండియా స్టార్ అన్న పేరు బాగా ట్రెండ్ అవుతుంది. అంతకు ముందు కూడా పాన్ ఇండియా సినిమాలు వచ్చాయి, పాన్ ఇండియా స్టార్లు ఉన్నారు. కానీ ఇప్పుడు ఈ పాన్ ఇండియా ట్రెండ్ కొనసాగడానికి కారణం జక్కన్న. బాహుబలి సినిమాతో పాన్ ఇండియా స్టార్ అన్న పదం వైరల్ గా మారింది. ఆ తర్వాత రోబో 2.O, కేజీఎఫ్, సాహో, పుష్ప, ఆర్ఆర్ఆర్, మొన్న వచ్చిన బ్రహ్మాస్త్ర, రీసెంట్ గా రిలీజైన పొన్నియన్ సెల్వన్ ఇలా పాన్ ఇండియా లెవల్ లో సినిమాలు వచ్చాయి. ఇక ముందు కూడా రానున్నాయి. అయితే అసలు పాన్ ఇండియా స్టార్ అని మనం అనుకుంటున్న ప్రభాస్, ఎన్టీఆర్, చరణ్, అల్లు అర్జున్, యష్ ల కంటే ముందే పాన్ ఇండియా మూవీలు చేసి దుల్కర్ సల్మాన్ పాన్ ఇండియా స్టార్ అయిపోయారు.
కానీ మనమెవరం గుర్తించలేదు. అసలు పాన్ ఇండియా మూవీ అంటే సరైన నిర్వచనం చెప్పిన హీరో దుల్కర్ సల్మాన్. ఇతనే అసలైన పాన్ ఇండియా స్టార్. మలయాళ మెగాస్టార్ మమ్ముట్టి కొడుకు నుంచి దుల్కర్ సల్మాన్ అంటే ఒక బ్రాండ్ అనే స్టేజ్ కి తనను తాను ట్రాన్స్ఫర్మ్ చేసుకున్నారు. సెకండ్ షో అనే మలయాళ సినిమాతో 2012లో హీరోగా ఎంట్రీ ఇచ్చిన దుల్కర్.. ఉస్తాద్ హోటల్, విక్రమాదిత్యన్, బెంగళూర్ డేస్, సిఐఏ, చార్లీ వంటి సినిమాలతో వరుస విజయాలు అందుకున్నారు. ఆ తర్వాత తమిళ ఫిల్మ్ ఇండస్ట్రీలో కాలు మోపారు. అది కూడా ద్విభాషా చిత్రం. తమిళంలో ‘వాయి మూడి పేసవం’, మలయాళంలో ‘సంసారం ఆరోగ్యథిన్ హానికరం’ అనే సినిమాలతో ఇటు మలయాళం, అటు తమిళంలో కవర్ చేశారు. ఆ తర్వాత మణిరత్నం డైరెక్షన్ లో ‘ఓకే కన్మణి’ సినిమాలో నటించారు.
ఆ సినిమా కల్ట్ క్లాసిక్ హిట్ గా నిలిచింది. తర్వాత మళ్ళీ సోలో అనే ద్విభాషా చిత్రంలో నటించారు. ఇది కూడా తమిళ, మలయాళ భాషల్లో తెరకెక్కింది. ఈ సినిమాలో దుల్కర్.. ఏకంగా నాలుగు పాత్రల్లో నటించారు. దుల్కర్ చూపించే వేరియేషన్స్ మామూలుగా ఉండవు. మలయాళం, తమిళ ఇండస్ట్రీలు అయిపోయాయి, ఇక తర్వాత దుల్కర్ కన్ను తెలుగు ఇండస్ట్రీ మీద పడింది. మహానటి సినిమాతో దుల్కర్ అతి పెద్ద విజయాన్ని అందుకున్నారు. దుల్కర్ పెర్ఫార్మెన్స్ కి తెలుగు ప్రేక్షకులు ముగ్ధులైపోయారు. సహజమైన నటనతో అందరినీ ఆకట్టుకున్నారు. ఆ తర్వాత దుల్కర్ నటించిన మలయాళ, తమిళ సినిమాలు తెలుగులో డబ్ అయ్యాయి. కొన్ని హిట్ అయ్యాయి కూడా. అయితే రీసెంట్ గా రిలీజైన సీతారామం సినిమాతో దుల్కర్ ఖాతాలో మరో బ్లాక్ బస్టర్ హిట్ చేరింది.
ఇది దుల్కర్ సల్మాన్ చేసిన రెండవ స్ట్రైట్ సినిమా. ఈ సినిమాలో తన పాత్రకి తానే డబ్బింగ్ చెప్పుకున్నారు. ఈ సినిమాతో దుల్కర్ కి ఇక్కడ అభిమాన సంఘాలు ఏర్పడ్డాయి. ఇక్కడే కాదు, కోలీవుడ్, బాలీవుడ్ లో కూడా పాన్ ఇండియా స్టార్ రేంజ్ లో దుల్కర్ ని అభిమానించడం మొదలుపెట్టారు. మధ్యలో బాలీవుడ్ ని వదిలేసాం. బాలీవుడ్ లేకుండా పాన్ ఇండియా మూవీ అసంపూర్తిగా ఉంటుంది. కాబట్టి బాలీవుడ్ లో కూడా మన దుల్కర్ బాబు జెండా పాతేశారు. మాలీవుడ్, కోలీవుడ్, టాలీవుడ్.. ఇక నెక్స్ట్ బాలీవుడ్డే అంటూ ముంబైలో వాలిపోయారు. అక్కడ కర్వాన్ అనే రోడ్ ట్రిప్ కామెడీ సినిమాతో బాలీవుడ్ ఎంట్రీ ఇచ్చారు. ఈ సినిమా బాక్సాఫీస్ వద్ద ఫెయిల్ అయ్యింది.
కానీ దుల్కర్ నటనకి బాలీవుడ్ ప్రేక్షకులు ఇంప్రెస్ అయ్యారు. ఈ సినిమా బాక్సాఫీస్ వద్ద ఫెయిల్ అయినా గానీ ఓటీటీ ప్లాట్ ఫార్మ్స్ లో బాగా ఆడింది. ఆ తర్వాత నటించిన ‘ది జోయా ఫ్యాక్టర్’ సినిమా కూడా డిజాస్టర్ అయ్యింది. ఆ తర్వాత వచ్చిన “చుప్: ది రివేంజ్ ఆఫ్ ది ఆర్టిస్ట్” సినిమా హిట్ టాక్ తెచ్చుకుంది. సెప్టెంబర్ 23న రిలీజ్ అయ్యింది. రికార్డ్ బ్రేకింగ్ స్థాయిలో ఈ సినిమాకి అడ్వాన్స్ బుకింగ్ లు అయ్యాయి. అది దుల్కర్ సల్మాన్ రేంజ్ అంటే. వరుసగా రెండు ప్లాప్ లు పడ్డా గానీ ఈ సినిమాకి ఆ స్థాయి బుకింగ్స్ వచ్చాయంటే మామూలు విషయం కాదు. బాలీవుడ్ స్టార్ ఆమిర్ ఖాన్ నటించిన లాల్ సింగ్ చడ్డా, బాలీవుడ్ స్టార్ అక్షయ్ కుమార్ నటించిన రక్షా బంధన్ సినిమాల కంటే ఎక్కువ టికెట్లు ఈ సినిమాకి తెగాయి.
ఇలా మలయాళంలో మొదలుపెట్టి.. కోలీవుడ్ వచ్చి.. అక్కడ నుంచి టాలీవుడ్ కొచ్చి.. అక్కడ నుంచి బాలీవుడ్ కి వెళ్లి… ఇలా వెళ్లిన ప్రతీ ఇండస్ట్రీలో హిట్సు, సూపర్ హిట్సు, బ్లాక్ బస్టర్ హిట్సు కొట్టి.. స్థానికంగా ఉండే స్టార్ హీరోలకు పోటీగా అభిమానులను సొంతం చేసుకోవడం అంటే చిన్న విషయమా? ఇంకో విశేషం ఏంటంటే.. దుల్కర్ మలయాళం మాతృభాష కాబట్టి వస్తుంది.. అది కాకుండా తమిళం, తెలుగు, హిందీ భాషలు చాలా స్పష్టంగా, చక్కగా మాట్లాడతారు. అతని సినిమాలకి అతనే డబ్బింగ్ చెప్పుకుంటారు. వేరే వారికి అవకాశం ఇవ్వరు. ఇలా అన్ని భాషల్లో పట్టు ఉండి, అన్ని ఇండస్ట్రీల్లో స్ట్రైట్ మూవీ తీసి హిట్ కొట్టిన హీరో ఎవరైనా ఉన్నారా? ఇప్పటి వరకూ లేరు. కాబట్టి దుల్కర్ సల్మానే అసలైన పాన్ ఇండియా స్టార్ అనేది అభిమానుల మాట. ఇప్పుడు చెప్పండి దుల్కర్ పాన్ ఇండియా స్టార్ కాదంటారా?..
