నెలకు రూ. 5 వేలు పొందే పథకం? ఈ స్కీంలో ఎలా చేరాలి?

పెన్షన్ ఉంటే వృద్ధాప్యంలో ఉండదు ఏ టెన్షన్. వృద్ధులకు పెన్షన్ అనేది చాలా అవసరం. కొడుకులు చూస్తారో లేదో, కూతుర్లకు చూసే అవకాశం ఉంటుందో లేదో, అసలు చూద్దామన్నా చూసే ఆర్ధిక స్థోమత పిల్లలకి ఉంటుందో లేదో? ఎప్పుడు ఏం జరుగుతుందో చెప్పలేని పరిస్థితి. ఇలాంటి పరిస్థితుల్లో ఎవరి మీద ఆధారపడకుండా ఉండాలంటే పెన్షన్ చాలా ముఖ్యం. పట్టుదల ఉన్నా ఒంట్లో పట్టు ఉండని ఏజ్ అది. ఆ ఏజ్ లో సాధించాల్సింది పిల్లల్ని కాదు, అటల్ పెన్షన్ యోజన పథకాన్ని. ఆ ఏజ్ లో పడాల్సింది టెన్షన్ కాదు, మీ ఖాతాల్లో పెన్షన్. మరి టెన్షన్ లేకుండా పెన్షన్ పొందాలంటే ఏం చేయాలి? ఈ పెన్షన్ పథకానికి ఎలా అప్లై చేయాలి? వంటి వివరాలు ఇప్పుడు తెలుసుకుందాం.  

వృద్ధులకు ప్రభుత్వాలు ఎలాగూ నెలకి 2 వేలో, 3 వేలో ఇస్తున్నాయి. ఇవి కాకుండా ఇంకో రూ. 5 వేలు రావాలంటే మాత్రం ‘అటల్ పెన్షన్ యోజన’ పథకంలో చేరాల్సి ఉంటుంది. 60 ఏళ్లు దాటిన తర్వాత ఒకరి మీద ఆధారపడకుండా ఉండేందుకు ప్రజలకు సామాజిక భద్రత కల్పించే పథకమే ఈ ‘అటల్ పెన్షన్ యోజన పథకం’. ఈ పథకంలో ఎవరైనా చేరచ్చు. ఈ పథకంలో చేరిన తర్వాత నెల, 3, 6 నెలలకొకసారి డబ్బులను పెట్టుబడిగా పెట్టాలి. అలా 60 ఏళ్లు వచ్చే వరకూ పెట్టుకుంటూ వెళ్తే.. ఆ తర్వాత నెలకి పెట్టుబడి పెట్టిన సొమ్ము బట్టి రూ. వెయ్యి నుంచి రూ. 5 వేలు పెన్షన్ వస్తుంది.      

పెన్షన్ పథకం గురించి పూర్తి వివరాలు:

• 18 నుంచి 40 ఏళ్లు వయసున్న భారతీయులెవరికైనా ఈ పథకం వర్తిస్తుంది.
• పథకంలో చేరడానికి కనీస వయసు 18, గరిష్ట వయసు 40  
• పెన్షన్ వర్తించాలంటే కనీసం 20 ఏళ్లు గ్యాప్ ఉండాలి.
• 60 ఏళ్లు దాటిన తర్వాత రూ. వెయ్యి నుంచి రూ. 5 వేలు వరకూ ఖచ్చితంగా పెన్షన్ ఇస్తుంది కేంద్ర ప్రభుత్వం. 
• జీవిత భాగస్వామి చనిపోయిన వారికి జీవితాంతం పెన్షన్ ఇస్తుంది.
• ఒకవేళ ఈ పథకంలో చేరిన భార్యాభర్తలిద్దరూ చనిపోతే.. మొత్తం పెన్షన్ డబ్బు నామినీకి చెల్లించబడుతుంది. 
• ఈ పథకం కింద నెలకి ఖచ్చితమైన పెన్షన్ వస్తుంది. రూ. వెయ్యి, రూ. 2 వేలు, రూ. 3 వేలు, రూ. 4 వేలు, రూ. 5 వేలు నెలకి 60 ఏళ్లు దాటిన వారికి చెల్లిస్తుంది. ఈ పెన్షన్ వారు అప్పటి వరకూ పెట్టే పెట్టుబడి మీద ఆధారపడి ఉంటుంది.
• ఈ ఐదేళ్లలోపు డిసెంబర్ 31 2015కి ముందు ఎవరైతే నేషనల్ పెన్షన్ స్కీంలో చేరి ఐదేళ్ల పాటు డబ్బులు కట్టారో.. వారిలో అర్హత గల వారికి ఏడాదికి 50 శాతం లేదా కనీసం రూ. వెయ్యి చొప్పున ప్రభుత్వం సహకారం అందిస్తుంది.
• ఈ పథకంలో చేరడం వల్ల ట్యాక్స్ బెనిఫిట్స్ ఉంటాయి. 

 ఈ పెన్షన్ పథకం వీరికి వర్తించదు:

• ఆగస్ట్ 10న కేంద్ర ఆర్ధిక మంత్రిత్వ శాఖ జారీ చేసిన గెజిట్ నోటిఫికేషన్ ప్రకారం.. ఆదాయపు పన్ను చెల్లించే పన్ను దారులు ఎవరైతే ఉన్నారో వారికి అక్టోబర్ 1 తర్వాత ఈ అటల్ పెన్షన్ యోజన పథకంలో చేరే అవకాశం ఉండదు. 
• ఎవరైనా అక్టోబర్ 1న గానీ, ఆ తర్వాత గానీ జాయినైతే.. ఆగస్ట్ 10న లేదా అంతకు ముందు ఆదాయపు పన్ను చెల్లింపు దారుడిగా గుర్తిస్తే కనుక వారి ఖాతాలు వెంటనే తొలగించబడతాయని కేంద్ర ఆర్ధిక మంత్రిత్వ శాఖ ప్రకటించింది.
• అయితే అప్పటి వరకూ చెల్లించిన సొమ్మును వెనక్కి ఇచ్చేస్తారు. 
• కాబట్టి ఆదాయపు పన్ను చెల్లించేవారు రేపటి లోగా ఈ పథకంలో చేరితే ఎలాంటి సమస్యలు ఉండవు.

అటల్ పెన్షన్ యోజన పథకం ఏపీవై ఖాతాని తెరవడం ఎలా?:

• కస్టమర్ సేవింగ్స్ బ్యాంక్ అకౌంట్ హోమ్ బ్రాంచ్ కి వెళ్లి ఈ స్కీంలో చేరవచ్చు.
• ఆన్ లైన్ ఇంటర్నెట్ బ్యాంకింగ్ ద్వారా కూడా ఈ స్కీంలో చేరవచ్చు. 
• కామన్ సర్వీస్ పాయింట్ కి వెళ్లి ఏపీవై ఖాతా తెరవచ్చు. 
• దాదాపు అన్ని బ్యాంకులోనూ అటల్ పెన్షన్ యోజన స్కీం దరఖాస్తులు అందుబాటులో ఉన్నాయి. 
• దరఖాస్తుని పూర్తి చేసి.. బ్యాంకులో సమర్పిస్తే మీ ఖాతా తెరుచుకుంటుంది. 
• కన్ఫర్మేషన్ మెసేజ్ రిజిస్టర్డ్ మొబైల్ నంబర్ కి ఎస్ఎంఎస్ వస్తుంది.  

వెబ్ సైట్ ద్వారా ఆన్ లైన్ లో ఏపీవై ఖాతా తెరవడం ఎలా?:

• https://enps.nsdl.com/eNPS/ApySubRegistration.html లింక్ ను క్లిక్ చేయాలి. 
• మొదటగా మీకు ఏ బ్యాంకులో అయితే ఖాతా ఉందో ఆ బ్యాంకుని సెలెక్ట్ చేసుకోవాలి. 
• ఆ తర్వాత బ్యాంకు ఖాతా నంబర్ ఎంటర్ చేయాలి. 
• ఆఫ్ లైన్ కేవైసీ, ఆధార్ నంబర్, వర్చువల్ ఐడీ అనే ఆప్షన్స్ లో ఒక ఆప్షన్ సెలెక్ట్ చేయాలి. 
• ఆఫ్ లైన్ కేవైసీ సెలెక్ట్ చేస్తే.. మెయిల్ ఐడీ (ఆప్షనల్), ఆధార్ తో లింక్ అయిన మొబైల్ నంబర్, ఆధార్ యొక్క చివరి అంకెను ఎంటర్ చేసి.. ఆధార్ ఆఫ్ లైన్ ఈకేవైసీ ఎక్స్ఎంఎల్ ఫైల్ అప్ లోడ్ చేయాలి. ఆ తర్వాత పేపర్ లెస్ ఆఫ్ లైన్ కేవైసీ కోసం కోడ్ షేర్ చేసి.. క్యాప్చా కోడ్ ఎంటర్ చేయాలి. 
• రెండో ఆప్షన్ ఆధార్ సెలెక్ట్ చేస్తే.. ఆధార్ నంబర్, క్యాప్చా కోడ్ ఎంటర్ చేసి సబ్మిట్ చేస్తే ఓటీపీ జనరేట్ అవుతుంది. ఆ ఓటీపీ ఎంటర్ చేస్తే అప్లికేషన్ ప్రాసెస్ అవుతుంది. 
• ఆ తర్వాత మీ వ్యక్తిగత వివరాలు, ఇతర వివరాలు, నామినీ డీటెయిల్స్ ఎంటర్ చేయాలి. 
• పెన్షన్ అమౌంట్ ఎంత రావాలనుకుంటున్నారో అంత అమౌంట్ ని సెలెక్ట్ చేసుకోవాలి. 
• నెలకి, 3 నెలలకి, 6 నెలలకి ఈ మూడింటిలో మీరు కట్టే వీలుని బట్టి ఒక ఆప్షన్ సెలెక్ట్ చేసుకోవాలి. 
• ఫైనల్ గా దరఖాస్తుని సబ్మిట్ చేయాలి. అలా చేశాక మీ ఖాతా ఓపెన్ అవుతుంది. 

ఖాతా తెరవడం కోసం ఇక్కడ క్లిక్ చేయండి

ఈ పథకంలో కనీసం రూ. 42 నుంచి పెట్టుబడి పెట్టచ్చు. రూ. 42 రూపాయలు పెట్టుబడి పెడితే.. 60 ఏళ్ల తర్వాత నెలకి రూ. వెయ్యి పెన్షన్ పొందవచ్చు. అంతకంటే ఎక్కువ పెన్షన్ కావాలంటే ఇంకా ఎక్కువ పెట్టుబడి పెట్టాలి. ఇలా కనీసం 20 ఏళ్ల పాటు పెట్టుబడి పెడుతూ వెళ్ళాలి. మీరు చెల్లించే దాని బట్టి నెలకి రూ. 1000 నుంచి రూ. 5 వేల వరకూ గ్యారంటీగా పెన్షన్ ఉంటుంది. ఈ ఖాతా తెరిచే ముందు మీ బ్యాంకు ఖాతాలో బ్యాలన్స్ ఉండాలి. 

• ఇది కూడా చదవండి: మీ ఆదాయాన్ని రెట్టింపు చేసే పోస్టాఫీస్ పధకం.. లక్షకి 2 లక్షలు పక్కా!
• ఇది కూడా చదవండి: Google Startup School: బిజినెస్ చేయాలనుకునే వారికి గూగుల్ సాయం.. ఎలాగంటే..?