follow us:
Jr NTR: ఆంధ్రప్రదేశ్‌లో ఎన్టీఆర్ హెల్త్‌ యూనివర్శిటీ పేరును వైఎస్సార్‌ హెల్త్‌ యూనివర్శిటీగా మారుస్తున్నట్లు ఏపీ ప్రభుత్వం నిర్ణయం తీసుకున్న సంగతి తెలిసిందే. ఈనేపథ్యంలో యూనివర్శిటీ పేరు మార్పుపై సీనియర్‌ ఎన్టీఆర్ మనవళ్లు కల్యాణ్‌ రామ్‌, జూ. ఎన్టీఆర్‌లు ట్విటర్‌ వేదికగా స్పందించారు. కల్యాణ్‌ రామ్‌ తన ట్వీట్‌లో ఏపీ ప్రభుత్వం చేసింది తప్పని అన్నారు. ఇక, జూ. ఎన్టీఆర్ స్పందిస్తూ.. ‘‘ఎన్టీఆర్, వైఎస్ఆర్ ఇద్దరూ విశేష ప్రజాదరణ సంపాదించిన గొప్ప నాయకులు. ఈ రకంగా ఒకరి పేరు తీసి ఒకరి పేరు పెట్టడం ద్వారా తెచ్చే గౌరవం వైఎస్ఆర్ స్థాయిని పెంచదు. ఎన్టీఆర్ స్థాయిని తగ్గించదు.
విశ్వవిద్యాలయానికి పేరు మార్చడం ద్వారా ఎన్టీఆర్ సంపాదించుకున్న కీర్తిని, తెలుగుజాతి చరిత్రలో వారిస్థాయిని, తెలుగు ప్రజల హృదయాల్లో ఉన్న వారి జ్ఞాపకాలను చెరిపివేయలేదు’’ అని పేర్కొన్నారు. ఎక్కడా ఎవ్వరినీ విమర్శించకుండా.. హద్దులు దాటకుండా తన ట్వీట్‌లో సమతూకం పాటించారు. ఇదే జూ ఎన్టీఆర్‌పై తెలుగు తమ్ముళ్లకు ఆగ్రహాన్ని తెప్పిస్తోంది. యూనివర్శిటీకి తాతగారి పేరు తీసేయటాన్ని జూనియర్‌ తేలిగ్గా తీసుకున్నారంటూ మండిపడుతున్నారు. కేవలం ట్వీట్‌తో సరిపెట్టడం ఏంటని ప్రశ్నిస్తున్నారు. ఆ ట్వీట్‌లో సీనియర్‌ ఎన్టీఆర్‌ను వైఎస్సార్‌తో పోల్చటం.. ఎక్కడా ప్రభుత్వాన్ని తప్పుబట్టకపోవటాన్ని తీవ్రంగా పరిగణిస్తున్నారు. ప్రస్తుతం ఇదే తెలుగు దేశం పార్టీలో హాట్ టాపిక్‌గా మారింది.
జూనియర్‌ ఎన్టీఆర్ వ్యవహార శైలిపై కొందరు పార్టీ నాయకులు, కార్యకర్తలు నిప్పులు చెరుగుతున్నారు. గతంలో టీడీపీ అధ్యక్షుడు చంద్రబాబు నాయుడు సతీమణి నారా భువనేశ్వరిపై ఏపీ అసెంబ్లీలో అవమానకర వ్యాఖ్యలు చేసినపుడు కూడా జూ. ఎన్టీఆర్ సరిగా స్పందించలేదని అంటున్నారు. కర్ర విరగకూడదు.. పాము చావకూడదు అన్న విధంగా వ్యవహరించారని మండిపడుతున్నారు. కుటుంబ సభ్యుల విషయంలో కూడా జూ. ఎన్టీఆర్ ఇలా ప్రవర్తించటం ముమ్మాటికీ తప్పని అంటున్నారు. మరి, జూ. ఎన్టీఆర్‌పై తెలుగు తమ్ముళ్లు ఆగ్రహం వ్యక్తం చేయటంపై మీ అభిప్రాయాలను కామెంట్ల రూపంలో తెలియజేయండి.
— Jr NTR (@tarak9999) September 22, 2022
ఇవి కూడా చదవండి : Anil Kumar Yadav: NTR, కల్యాణ్‌ రామ్‌లపై మాజీ మంత్రి అనిల్‌ యాదవ్‌ ఫైర్‌!
