follow us:
దొంగోడికి బీరువాల మీద, పర్సుల మీద తప్పితే వేరే వాటి మీద ఎమోషన్స్ పెంచుకోడు. పెంచుకుంటే అది తన వృత్తికే అవమానంగా ఫీలవుతాడు. తాళాలు బద్దలుకొడతాడు, అడ్డు వస్తే తలలు బద్దలుకొడతాడు. ఇలాంటి దొంగలున్న ఈ సమాజంలో దొంగతనం చేసిన డబ్బులు మళ్ళీ వెనక్కి తీసుకొచ్చి ఇచ్చే దొంగలు ఉంటారా? ఆ మన పిచ్చి కాకపోతే ఇలాంటోళ్లు సినిమాల్లో ఉంటారు గానీ నిజ జీవితంలో ఎక్కడుంటారు.. అని అనుకుంటే పెసరపప్పులో కాలేసినట్టే. నిజమే ఇలాంటి దొంగ శ్రీకాకుళం జిల్లాలో ఒకడున్నాడు. మొదట దొంగతనం చేయాలనిపించి చేశాడు. తిరిగి తీసుకొచ్చి ఇవ్వాలనిపించి ఇచ్చేశాడు. పైగా ఇదే నా మొదటి దొంగతనం అంటూ ఒక లేఖ పెట్టి పోయాడు.
వివరాల్లోకి వెళ్తే.. శ్రీకాకుళం జిల్లా బూర్జ మండలం కొల్లివలసకు చెందిన బెజ్జివరపు చక్రధరరావు.. కుటుంబ సమేతంగా ఆదివారం నాడు బంధువుల ఊరికి వెళ్ళాడు. అదే రోజు రాత్రి ఆ ఇంట్లో దొంగతనం జరిగింది. చక్రధరరావు సోమవారం ఇంటికి వచ్చేసరికి ఇంటి తాళం, బీరువా పగులగొట్టి ఉన్నాయి. బీరువాలో ఉండాల్సిన రూ. 11.20 లక్షలు కనిపించకపోవడంతో బాధితుడు పోలీసులకు ఫిర్యాదు చేశాడు. దీంతో పోలీసులు రంగంలోకి దిగి క్లూస్‌ టీంతో తనిఖీలు నిర్వహించారు. కట్ చేస్తే సోమవారం రాత్రి ఇంటి వెనుక తలుపుకి వేసి ఉన్న తాళాన్ని విరగ్గొట్టి ఆ దొంగోడు మళ్ళీ ఇంట్లోకి వచ్చాడు. ఆ డబ్బుల్ని, ఒక లేఖను ఇంట్లో పెట్టి వెళ్ళిపోయాడు. ఆ మరుసటి రోజు ఇంటి యజమాని డబ్బుల్ని, లేఖను చూసి కంగుతిన్నాడు. వెంటనే పోలీసులకు సమాచారం అందించడంతో పోలీసులు ఆ లేఖను, డబ్బును స్వాధీనం చేసుకుని కోర్టుకు అప్పగించారు. ఇంతకే ఆ లేఖలో ఏముందంటే.. ‘సారీ అన్నయ్య.. సారీ వదిన.. తప్పు చేశాను. ఇదే నా మొదటి దొంగతనం. నన్ను క్షమించండి. నన్ను పట్టుకుంటే ఆత్మహత్య చేసుకోవాల్సి వస్తుంది’ అంటూ రాసి ఉంది.
దీంతో తెలిసిన వ్యక్తే దొంగతనం చేసి ఉండవచ్చని, లేదా మంచి దొంగ అయి ఉండవచ్చని పోలీసులు భావిస్తున్నారు. ఈ వ్యవహారంపై పోలీసులు దర్యాప్తు చేస్తున్నారు. ఇతన్ని మనసున్న దొంగ అనాలా? లేక దొంగ మనసు మార్చుకున్న మంచి వ్యక్తి అనాలా? ఏదైతైనేం..ఎత్తుకెళ్ళిన డబ్బులు తిరిగిచ్చాడు. ఈరోజుల్లో తీసుకున్న అప్పే తిరిగివ్వడం లేదు. అలాంటి దొంగలతో పోలిస్తే ఈ దొంగ మంచోడే అంటూ నెటిజన్లు కామెంట్లు చేస్తున్నారు. దొంగతనం ఎవడైనా చేస్తాడు, కానీ లక్షలు దొంగతనం చేసి తిరిగిస్తాడే.. వాడు గొప్పోడు. తప్పు చేసే అవకాశం ఉండి కూడా చేయకపోవడం ఎంత గొప్ప లక్షణమో, చేసిన తప్పుని సరిదిద్దుకోవడం కూడా అంతే గొప్ప లక్షణం. మరి 11 లక్షలకు పైగా దొంగతనం చేసి తిరిగిచ్చిన ఆ మంచి దొంగపై మీ అభిప్రాయమేంటో కామెంట్‌ రూపంలో తెలియజేయండి.
