follow us:
ఏపీ ప్రభుత్వం వినూత్న పథకాలతో ముందుకు వెళ్తున్న సంగతి తెలిసిందే. దానిలో ఒకటి రేషన్ సరుకుల డోర్‌ డెలివరీ. వాహనాల ద్వారా ఇంటి దగ్గరకే రేషన్ సరుకుల సరఫరా పథకాన్ని ప్రభుత్వం ప్రారంభించింది. ఈ క్రమంలో ఇంటి దగ్గరకే సరుకుల సరఫరా పథకాన్ని, అందుకు సంబంధించిన జీవోలను సవాలు చేస్తూ ఏపీ చౌకధరల దుకాణదారుల సంక్షేమ సంఘం హైకోర్టులో పిటిషన్ దాఖలు చేసింది. దీనిపై విచారణ జరిపిన కోర్టు ఆసక్తికర వ్యాఖ్యలు చేసింది. రేషన్ సరుకుల్ని వీలు కుదిరినప్పుడు అరగంట సమయం కేటాయించి కి.మీ. దూరంలోని దుకాణానికి వెళ్లి సరకులు తెచ్చుకోలేని స్థితిలో ప్రజలు లేరని వ్యాఖ్యానించింది. దీని వల్ల ప్రజాధనం నిరుపయోగం అవుతుందని కోర్టు అభిప్రాయపడింది.
అలాగే ఈ రేషన్ సరకులు పంపిణీ చేసినందుకు డీలరుకు ఇచ్చే కమీషన్‌తో పోలిస్తే.. వాహనాల ద్వారా డోర్‌ డెలివరీ కోసం ప్రజాధనాన్ని భారీగా వినియోగిస్తున్నారని అభిప్రాయపడింది. ఈ విధానం ప్రజాధనాన్ని వృథా చేయడం కాదా అని ప్రశ్నించింది.. ఈ సొమ్ముతో పేదప్రజలకు మరిన్ని సరకులు అందించొచ్చని వ్యాఖ్యానించింది. ప్రభుత్వం ఇటీవల పాఠశాలల విలీనం పేరుతో 3, 4, 5 తరగతుల విద్యార్థులు కిలో మీటర్ల దూరం వెళ్లి చదువుకోవాల్సిన పరిస్థితి ఉందన్నారు. అలాంటప్పుడు పక్కనే ఉన్న రేషన్ షాపులను కాదని వాహనాల ద్వారా ఇంటి దగ్గరే సరకులు ఇస్తామనడంలో హేతుబద్ధత ఏమిటని ప్రశ్నించింది.
రేషన్ డెలివరీ మొబైల్‌ వాహనం ఎప్పుడొస్తుందో తెలీక నిరుపేదలు, రోజుకూలీలు వేచి చూడాల్సి వస్తుందన్నారు. దీని కోసం వారు తమ పనులు మానుకోవాల్సిన పరిస్థితులు ఉన్నాయన్నారు. రేషన్ వాహనాల ద్వారా ఇంటింటికీ పంపిణీ ప్రభుత్వ విధాన నిర్ణయమని.. ఇందులో కోర్టు జోక్యం చేసుకోజాలదని ఏజీ శ్రీరామ్‌ అన్నారు.. పూర్తి వివరాలతో కౌంటర్‌ వేయడానికి గడువు కోరారు. అయితే హైకోర్టు లేవనెత్తిన ప్రశ్నలన్నింటికి వివరణ ఇస్తూ కౌంటర్‌ దాఖలు చేయాలని ప్రభుత్వాన్ని ఆదేశించింది. అలాగే ఏ నిబంధనలను అనుసరించి వాహనాల ద్వారా ఇంటింటికీ సరకుల పంపిణీకి సిబ్బందిని నియమించారో వివరాలు ఇవ్వాలంది. విచారణను మూడు వారాలకు వాయిదా వేసింది. మరి దీనిపై మీ అభిప్రాయాలను కామెంట్స్‌ రూపంలో తెలియజేయండి.
