సామాన్యుల నెత్తిన మరో పిడుగు.. భారీగా పెరగనున్న పాల ధరలు!

పెరుగుతున్న ధరలతో సామాన్యులు నరకం చూస్తున్నారు. కడుపు నిండా తిందామన్నా.. పది సార్లు ఆలోచించాల్సి వస్తోంది. అగ్గిపెట్టె మొదలు.. ఆయిల్‌ వరకు అన్నింటి ధరలు కొండెక్కాయి. నిత్యవసరాలు, కూరగాయలు వంటి వాటి కోసం ఓ కుటుంబం నెలకు సుమారు 6 వేల పైనే ఖర్చు చేయాల్సి వస్తోంది. ఇప్పటికే పెట్రోల్‌, డీజిల్‌, కూరగాయలు వంటి వాటి ధరలు కొండెక్కుతున్నాయి. ఈ బాదుడు చాలదన్నట్లు.. ఇప్పుడు ఈ జాబితాలోకి పాలు కూడా చేరాయి. పొద్దున లేవగానే ముఖం కడుక్కుని వేడి వేడి టీ తాగకపోతే.. చాలా మందికి రోజు గడవదు. టిఫిన్‌ తినడం అయినా మానేస్తారేమో కానీ.. టీ తాగడం మాత్రం మానుకోరు. అలాంటిది పాల ధరలు పెరగడం.. చాయ్‌ ప్రియులకు షాక్‌ అనే చెప్పవచ్చు. పాల ధర లీటర్‌ మీద ఏకంగా 3 రూపాయలు పెరగనుంది. ఆ వివరాలు..

తెలంగాణ ప్రభుత్వం సామాన్యులకు షాక్‌ ఇచ్చేందుకు రెడీ అవుతోంది. రాష్ట్రంలో అత్యధికంగా వినియోగించే విజయ పాల ధరలను పెంచుతూ నిర్ణయం తీసుకుంది. ఈ మేరకు తెలంగాణ రాష్ట్ర పాడి పరిశ్రమాభివృద్ధి సహకార సమాఖ్య ఉత్తర్వులు కూడా జారీ చేసింది. విజయ పాలకు సంబంధించి లీటర్‌ మీద గరిష్టంగా 3 రూపాయలు పెంచనుంది. పెరిగిన ధరలు.. శనివారం నుంచి అనగా.. ఏప్రిల్‌ 8 నుంచి అమల్లోకి వస్తాయి. విజయ పాలకు సంబంధించి లీటర్‌పై గరిష్టంగా రూ.3 పెంచుతూ ప్రభుత్వం నిర్ణయించింది. దీంతో సామాన్యులపై మరింత భారం పడనుంది.

డబుల్ టోన్డ్ మిల్క్ ధర లీటర్‌పై గతంలో రూ.51 నుంచి రూ.55కు పెంచారు. ఇప్పుడు దానిని రూ.58 పెంచుతున్నట్లు తాజా ఉత్తర్వుల్లో పేర్కొన్నారు. ఇక అరలీటర్ టోన్డ్ మిల్క్ ధర గతంలో రూ.26 ఉండగా.. ఇప్పుడు రూ.27కు పెంచినట్లు ప్రభుత్వం స్పష్టం చేసింది. కొత్తగా పెరిగిన ధరలు శనివారం నుంచి అమల్లోకి రానున్నాయి. పాల ధరలను పెంచే ముందు పాడి రైతులతో ప్రభుత్వం సమావేశం నిర్వహిస్తూ ఉంటుంది.

కానీ ఈ సారి అలాంటి సమావేశం నిర్వహించకుండానే పాల ధరలు పెంచినట్లు ప్రచారం సాగుతోంది. గుట్టుచప్పుడు కాకుండా విజయ పాల ధరలను పెంచుతున్నట్లు ప్రభుత్వం ఉత్తర్వులు జారీ చేసింది అనే విమర్శలు వినిపిస్తున్నాయి. అయితే నిర్వహణ ఖర్చు పెరగడం, రవాణా ఖర్చులు, పాల సేకరణ ధరలు పెరగడంతో పాల ధరలు పెంచినట్లు విజయ డెయిరీ చెబుతోంది. మరి పెంచిన ధరలపై మీ అభిప్రాయాలను కామెంట్స్‌ రూపంలో తెలియజేయండి.

ఈరోజు ఏపీ, తెలంగాణకు సంబంధించిన లేటెస్ట్ న్యూస్.. జాతీయ, అంతర్జాతీయ వార్తలు.. ఎడ్యుకేషన్, బిజినెస్, సినిమా, స్పోర్ట్స్, టెక్ అప్డేట్స్.. ఆధ్యాత్మిక, ఆరోగ్య సమాచారంతో పాటు, వైరల్ కథనాల కోసం సుమన్ టీవీ యాప్‌ను డౌన్‌లోడ్ చేసుకోండి.