నేనెప్పుడూ స్పిన్నర్లను సీరియస్‌గా తీసుకోలేదు.. కానీ ఈ సారి మాత్రం!

అంతర్జాతీయ క్రికెట్‌లో దూకుడుకు మారుపేరుగా నిలిచిన భారత మాజీ ఓపెనర్‌ వీరేంద్ర సెహ్వాగ్‌.. ఆటకు వీడ్కోలు పలికిన అనంతరం సోషల్‌ మీడియాలో తన చెనుకులతో కట్టిపడేస్తున్నాడు. విభిన్న అంశాలపై తనదైన శైలిలో స్పందిస్తూ.. నవ్వులు పూయించడంతో పాటు.. ఆలోచింపచేసేలా ట్వీట్లు చేసే మన వీరేంద్రుడు.. తాజాగా ఓ బాలీవుడ్‌ సినిమా ట్రైలర్‌పై ఆసక్తికర వ్యాఖ్యలు చేశాడు. కెరీర్‌ పీక్స్‌లో ఉన్నప్పుడు అటు పేసర్లు, ఇటు స్పిన్నర్లు ఉతికి ఆరేసిన వీరూ.. ఏనాడు ప్రత్యర్థి బౌలర్లకు జడిసిన దాఖలాలు లేవు. సెహ్వాగ్‌ పరుగుల ప్రవాహానికి పలువురు బౌలర్ల అంతర్జాతీయ క్రికెట్‌కు ఫుల్‌స్టాప్‌ పడిన సందర్భాలు కూడా ఉన్నాయి. తాజాగా అభిషేక్‌ బచ్చన్‌ కీలక పాత్ర పోషిస్తున్న బాలీవుడ్‌ మూవీ ‘ఘూమర్‌’ ట్రైలర్‌ విడుదలైంది. ఇది చూసిన అనంతరం వీరూ చేసిన ట్వీట్‌ ఇప్పుడు వైరల్‌గా మారింది.

‘సాధారణంగా నేను స్పిన్నర్లు పెద్దగా సీరియస్‌గా తీసుకోను.. కానీ ఇది కాస్త భిన్నంగా ఉన్నట్లుంది. ఘూమర్‌ చూసేందుకు ఆసక్తిగా ఎదురుచూస్తున్నా’ అని ట్వీట్‌ చేశాడు. దీనికి అభిషేక్‌ సమాధానమిస్తూ.. ‘ఒక్కసారి ఈ అమ్మాయిని ఎదుర్కొంటే సీరియస్‌గా తీసుకోక తప్పదు. ఇది ముమ్మాటికీ నిజం. ధన్యవాదాలు. నీ ట్రైలర్‌ మీకు నచ్చినందుకు సంతోషిస్తున్నా’ అని రీట్వీట్‌ చేశాడు. మరి స్పిన్నర్ల గురించి చర్చ జరుగుతున్న ఈ చిత్రంలో ఏముందా అని అనుకుంటున్నారా? ఇది ఓ క్రికెటర్‌ జీవితానికి సంబంధించిన చిత్రమని గతంలోనే చిత్ర బృందం వెల్లడించింది.

ఆర్‌. బల్కీ దర్శకత్వంలో తెరకెక్కిన ఈ చిత్రంలో అభిషేక్‌ బచ్చన్‌, సయామీ ఖేర్‌, షబానా ఆజ్మీ, అంగద్‌ బేడి, నసీర్‌ ఖాన్‌, అమితాబ్‌ బచ్చన్‌ తదితరులు కీలక పాత్రలు పోషించారు. ఈ నెల 18న ప్రేక్షకుల ముందుకు రానున్న ఈ చిత్ర ట్రైలర్‌ను శుక్రవారం విడుదల చేయగా.. సర్వత్ర ప్రశంసలు వ్యక్తమవుతున్నాయి. హంగేరీ షూటర్‌ కరోలీ టాక్స్‌ జీవిత కథను ఆధారంగా చేసుకొని ఈ సినిమా రూపొందిచినట్లు గతంలో అభిషేక్‌ వెల్లడించిన విషయం తెలిసిందే. మరి ఈ రియల్‌ స్టోరీ భారత ప్రేక్షకులను ఏమేరకు ఆకట్టుకుంటుందో మరికొన్ని రోజుల్లో తేలనుంది. అయితే ట్రైలర్‌లో మాత్రం తాగుబోతు కోచ్‌గా అభిషేక్‌ బచ్చన్‌ పలికిన సంభాషణలు సినిమాపై అంచనాలు పెంచుతున్నాయి. ‘లాజీకల్లీ ఎవరైనా ఒంటి చేత్తో దేశానికి ప్రాతినిధ్యం వహించగలరా.. ముమ్మాటికీ కుదరని పని. కానీ జీవితమనేది లాజిక్‌లకు అందనిది. ఇది మ్యాజిక్‌తో ముడి పడి ఉంది’ అని అభిషేక్‌ చెప్పే డైలాగ్‌లు ఆసక్తి రేకెత్తిస్తున్నాయి. కెరీర్‌లో ఓడిపోయి.. జీవితంలో ఏది సాధించలేకపోయిన ఓ కోచ్‌గా అభిషేక్‌.. ప్రమాదంలో చేతిని కోల్పోయి ఒంటిచేత్తోనే దేశానికి ప్రాతినిధ్యం వహించేందుకు కష్టపడే అమ్మాయిగా సయామీ ఖేర్‌ ఈ ట్రైలర్‌లో దర్శనమిచ్చారు.

I never took spinners seriously but this one looks special.
Waiting to watch the film.

Lovely #GhoomerTrailer pic.twitter.com/SM8TEhaFfc

— Virender Sehwag (@virendersehwag) August 5, 2023