తిలక్ వర్మ వరల్డ్ కప్ కి పనికిరాడు! మాజీ సెలక్టర్ వార్నింగ్

భారత క్రికెట్ లోకి మరో యంగ్ క్రికెటర్ దూసుకొస్తున్నాడు. ఇందులో పెద్దగా ఆశ్చర్యం లేకపోయినా ఒక తెలుగు కుర్రాడు తక్కువకాలంలోనే ఇలా జాతీయ జట్టులోకి దూసుకురావడం తెలుగు వారు గర్వించదగ్గ విషయం. గత రెండేళ్లుగా తిలక్ వర్మ ప్రస్తానం చూసుకుంటే ఎంతో పరిణితి చెందిన ఆటతీరు కనబరుస్తున్నాడు. వచ్చిన ప్రతి అవకాశాన్ని రెండు చేతులా ఒడిసిపట్టుకుంటున్నాడు. ఫస్ట్ క్లాస్ క్రికెట్, ఐపీఎల్ తాజాగా అంతర్జాతీయ క్రికెట్ లో తన సత్తా చూపిస్తున్నాడు. ఇటీవలే విండీస్ పర్యటనలో టీ 20 ల ద్వారా అంతర్జాతీయ క్రికెట్ లో అడుగుపెట్టిన ఈ యంగ్ స్టర్ ఏకంగా వరల్డ్ కప్ రేస్ లోకి వచ్చాడు. ప్రస్తుతం తిలక్ వర్మ ఆట తీరు చూసిన వారెవరైనా ప్రశంసించకుండా ఉండలేరు.

మరో రెండు నెలలో స్వదేశంలో వరల్డ్ కప్ జరగనున్న సంగతి తెలిసిందే. ఇందులో భాగంగా కీలక ప్లేయర్ల గాయాలు టీమిండియాని కలవరపెడుతున్నాయి. ముఖ్యంగా మిడిల్ ఆర్డర్ సమస్య జట్టుని బాగా వేధిస్తుంది. పంత్ దాదాపుగా వరల్డ్ కప్ రేస్ నుంచి నిష్క్రమించగా.. అయ్యర్, రాహుల్ గాయాల విషయంలో ఒక క్లారిటీ లేదు. ఇక కీలకమైన నాలుగో స్థానం కోసం మరోసారి యాజమాన్యానికి పెద్ద తలనొప్పిగా మారింది. ఇదిలా ఉండగా ఇటీవలే వెస్టిండీస్ పర్యటనలో భాగంగా తిలక్ వర్మ నాలుగో స్థానంలో అదరగొట్టిన సంగతి తెలిసిందే. ఈ నేపథ్యంలో తిలక్ నాలుగో స్థానానికి సరైనోడు అని అభిమానులతో పాటు ఎక్స్ పర్ట్స్ భావిస్తున్నారు. అయితే ఇంత త్వరగా తిలక్ వర్మని జట్టులోకి తీసుకొని రావడం తొందరపాటు అవుతుందని భారత మాజీ సెలక్టర్ సబా కరీం పేర్కొన్నాడు.

ఈ సందర్భంగా మాట్లాడిన సబా కరీం ” తిలక్ వర్మ ఇంకొన్నాళ్లు ఓపిక పట్టాల్సిన అవసరం ఉంది. తిలక్ వర్మ ప్రస్తుతం టీ 20 లు అద్భుతంగా ఆడుతున్నాడు. ఇప్పటివరకు ఒక్క వన్డే కూడా ఆడని తిలక్ వర్మని ఆసియా కప్, వరల్డ్ కప్ లాంటి టోర్నీలకు సెలక్ట్ చేయడం తొందరపాటు అవుతుంది. గతంలో అద్భుతమైన ఫామ్ లో ఉన్న విజయ్ శంకర్ ని ఎలాంటి వన్డే అనుభవం లేకుండా వరల్డ్ కప్ జట్టులోకి తీసుకొచ్చారు. అదేవిధంగా టీ 20 ప్రపంచ కప్ లో వరుణ్ చక్రవర్తిని సెలక్ట్ చేస్తే అతడు పూర్తిగా తేలిపోయాడు. ఇప్పుడు తిలక్ వర్మని జట్టులోకి తీసుకుంటే కూడా అలాంటి ప్రమాదమే ఏర్పడే అవకాశం ఉంది”. అని తెలిపాడు. మరి ఈ మాజీ సెలక్టర్ వ్యాఖ్యలు మీకెలా అనిపించాయో కామెంట్ల రూపంలో తెలపండి.