పుజారాకి అవమానం! మరీ ఇంత దారుణమా?

టీమిండియా ప్లేయర్‌ ఛతేశ్వర్‌ పుజారా.. ఒకప్పుడు తన అద్భుతమైన ఆట తీరుతో అద్భుతంగా రాణించేవాడు. టీమిండియాలో రాహుల్‌ ద్రవీడ్‌ స్థానాన్ని.. భర్తీ చేసే సత్తా పుజారా సొంతం అని భావించిన అభిమానులు.. అతడిని ముద్దుగా నయావాల్‌ అని పిలుచుకునేవారు. 2018-19 బోర్డర్-గవాస్కర్ సిరీస్‌ లో అద్భుతంగా రాణించిన పుజారా.. ఆ తర్వాత నుంచి ఫామ్‌ కోల్పోయి.. పేలవ ప్రదర్శన కొనసాగిస్తున్నాడు. చివరగా సౌతాఫ్రికా పర్యటనలో దారుణంగా విఫలం కావడంతో.. ప్రస్తుతం రంజీలకు పరిమితం అయ్యాడు. అయితే అక్కడ కూడా పెద్దగా రాణించడం లేదు. దాంతో పుజారాకు ఇక టీమిండియాలో స్థానం లభించడం కష్టం అంటున్నారు విశ్లేషకులు.

రంజీ ట్రోఫీలో సౌరాష్ట్రకు ప్రాతినిధ్యం వహిస్తున్న పుజారా.. ముంబైతో జరిగిన మ్యాచ్‌లో డకౌట్‌ అయ్యాడు. తొలి ఇన్నింగ్స్‌లో నాలుగు బంతులు ఎదుర్కొన్న పుజారా ఖాతా తెరవకుండానే పెవిలియన్‌కు చేరాడు. ముంబై బౌలర్‌ మోహిత్ అవస్తీ బౌలింగ్‌ ఎదుర్కొన్న పుజారా ఎల్బీ రూపంలో వెనుదిరిగాడు. కాగా గత కొంత కాలంగా ఫామ్‌ కోల్పోయిన పుజారాకి భారత జట్టులో చోటు దక్కడం ఇప్పటికే కష్టంగా మారింది. మార్చిలో శ్రీలంకతో జరిగే రెండు మ్యాచ్‌ల టెస్ట్ సిరీస్‌కు మరి కొద్దిరోజుల్లో జట్టును బీసీసీఐ ఎంపిక చేయనుంది.

ఇలాంటి పరిస్థితుల్లో పుజారా డకౌట్‌ కావడం అతడికి తీవ్ర నష్టాన్ని కలిగించే అంశంగా మారింది. ఈ డకౌట్‌ విషయం.. అతడు జట్టులోకి వచ్చే అవకాశాలను మరింత దెబ్బతీశాయి. ఇక పుజారా 2018-19 బోర్డర్-గవాస్కర్ సిరీస్‌లో అత్యధిక పరుగులు చేసిన ఆటగాడిగా నిలిచాడు. ఈ సిరీస్‌లో నాలుగు టెస్టులు ఆడిన పుజారా 521 పరుగులు చేశాడు. అయితే అప్పటి నుంచి పుజారా తన ఫామ్‌ను కోల్పోయాడు. 2019 నుంచి ఇప్పటి వరకు 27 టెస్టులాడిన పుజారా కేవలం 1287 పరుగుల మాత్రమే చేశాడు. ఇవన్నీ పక్కన పెడితే.. ఒక యువ బౌలర్ వేసిన బంతికి పుజారా లాంటి సీనియర్ ఆటగాడు డకౌట్ కావడం అందరిని ఆశ్చర్యానికి గురి చేస్తోంది. మలింగా, స్టెయిన్, స్టార్క్, ఆండర్సన్, సౌథీ, బ్రాడ్ లాంటి హేమాహేమీ బౌలర్లు కూడా ఒకప్పుడు పుజారా వికెట్ తీయలేక అల్లాడిపోయిన వారే. అలాంటి పుజారా.. ఇప్పుడు ఇలా ఊరు, పేరు లేని బౌలర్ చేతిలో కూడా డకౌట్ కావడం అతనికి అవమానకరమైన విషయమే అనే కామెంట్స్ వినిపిస్తున్నాయి. మరి.. ఈ విషయంలో మీ అభిప్రాయాన్ని కామెంట్స్ రూపంలో తెలియజేయండి.