సూపర్‌ స్టార్‌ కృష్ణ మృతికి సంతాపం తెలిపిన టీమిండియా మాజీ క్రికెటర్!

లెజెండరీ యాక్టర్ సూపర్‌ స్టార్‌ ఘట్టమనేని కృష్ణ (80) కన్నుమూసిన సంగతి తెలిసిందే. కార్డియాక్‌ అరెస్టుతో బాధపడుతున్న ఆయన కాంటినెంటల్‌ ఆసుపత్రిలో చికిత్స పొందుతూ మంగళవారం ఉదయం 4.10 గంటల సమయంలో తుదిశ్వాస విడిచారు. ఆయన మరణం తెలుగు సినీ చిత్ర పరిశ్రమనే కాకుండా ఘట్టమనేని కుటుంబాన్ని కూడా తీవ్ర విషాదంలోకి నెట్టింది. ఈ వార్త తెలిసిన వెంటనే పలువురు ప్రముఖులు దిగ్భ్రాంతి వ్యక్తం చేస్తూ.. సామాజిక మాధ్యమాల ద్వారా సంతాపం తెలిపారు. ఈ క్రమంలో భారత మాజీ క్రికెటర్ మహమ్మద్ కైఫ్ కూడా.. సూపర్‌ స్టార్‌ కృష్ణను స్మరించుకుంటూ ట్వీట్ చేశాడు.

మహమ్మద్ కైఫ్ ఉత్తరాది క్రికెటర్ అయినా సూపర్‌ స్టార్‌ కృష్ణ అంటే ఎనలేని అభిమానమాట. ఈ క్రమంలో ఆయన మృతి తనను కలిచివేసినట్లు తెలుస్తోంది. దీంతో ఆయనను గుర్తు చేసుకుంటూ ఎమోషనల్‌ ట్వీట్‌ చేశారు. “కృష్ణ గారు.. మిమ్మల్ని మిస్ అవుతున్నాం..” అంటూ ట్వీట్‌ చేశారు.

#RIP krishna gaaru… you will be missed.

— Mohammad Kaif (@MohammadKaif) November 15, 2022

కాగా ఇప్పటికే ప్రముఖ క్రికెట్‌ వ్యాఖ్యాత హర్ష భోగ్లే సైతం కృష్ణ గారి మరణంపై స్పందించిన సంగతి తెలిసిందే. ఆయన మృతికి సంతాపం తెలుపుతూ.. ఎమోషనల్‌ ట్వీట్‌ చేశారు. “నా చిన్నతనం నుంచి మరొక పేరు వెళ్లిపోతుంది. తెలుగు స్టార్ కృష్ణ. ఎన్టీఆర్, ఏఎన్ఆర్, ఎస్వీఆర్‌లతో పాటు కృష్ణ, శోభన్‌బాబు, చంద్రమోహన్‌, మోహన్‌బాబు, జగ్గయ్య, గుమ్మడి, రేలంగి వంటి వారితో చేసిన సినిమాలు గుర్తుండిపోతాయి. ప్రధానంగా దూరదర్శన్‌లో..’ అంటూ హర్ష భోగ్లే ట్వీట్‌ చేశారు. క్రికెట్‌ కామెంటేటర్‌, ఎనలిస్ట్‌గా ప్రఖ్యాతి గాంచిన హర్ష.. చిన్నతనం మొత్తం హైదరాబాద్‌లోనే గడిచింది. ఆ సమయంలో ఎన్టీఆర్‌, ఏఎన్నార్‌, ఎస్వీఆర్‌ సినిమాలతో పాటు కృష్ణ, కృష్ణంరాజు వంటి వారి సినిమాలు చూస్తూ పెరిగారు. ఇప్పుడు కృష్ణ మృతితో తెలుగు సినిమాలతో ఆయనకున్న అనుబంధం, తెలుగు దిగ్గజ నటులను మరోసారి ఆయన గుర్తు చేసుకున్నారు.

Another name from my childhood passes on. Telugu star Krishna. Apart from the trinity of NTR, ANR & SVR, remember movies with Krishna, Sobhan Babu, Chandramohan, Mohan Babu, Jaggayya, Gummadi, Relangi. Mainly on Doordarshan.

— Harsha Bhogle (@bhogleharsha) November 15, 2022