Pawan Kalyan: పొత్తుల లెక్కలో తగ్గని జనసేనాని! ఇరకాటంలో చంద్రబాబు!

Pawan Kalyan: ఆంధ్రప్రదేశ్‌లో రాజకీయ రణరంగం అప్పుడే మొదలైంది. ఆయా పార్టీలు వచ్చే ఎన్నికల్లో తమ పార్టీని గెలిపించుకోవటానికి, అధికారంలోకి రావటానికి బిజీ బిజీగా పావులు కదుపుతున్నాయి. ప్రధాన పార్టీలైన టీడీపీ, వైఎస్సార్‌ సీపీలు వచ్చే ఎన్నికల్లో గెలుపుని ప్రతిష్టాత్మకంగా తీసుకున్నాయి. టీడీపీ విషయానికి వస్తే వచ్చే ఎన్నికల్లో గెలుపు తప్పని సరైంది. ముఖ్యంగా ఆ పార్టీ అధినేత చంద్రబాబునాయుడికి.. ఎందుకంటే.. వచ్చే ఎన్నికల్లో గెలవకపోతే పార్టీ షెడ్డుకు వెళ్లిపోవాల్సిందేనన్న చర్చ రాజకీయ వర్గాల్లో జోరుగా సాగుతోంది. మరోసారి వైఎస్సార్‌ సీపీ అధికారంలోకి వస్తే టీడీపీని నామరూపాలు లేకుండా చేసే అవకాశం కూడా ఉందన్న చర్చ కూడా జరుగుతోంది. ఈ నేపథ్యంలోనే చంద్రబాబు పొత్తులపై దృష్టి సారించారు. 2014లో జరిగిన మ్యాజిక్‌ను మరోసారి రిపీట్‌ చేసి, సీఎం కావాలన్న ఆలోచనల్లో ఉన్నారు. కానీ, తానొకటి తలిస్తే.. దైవం మరొకటి తల్చినట్లు పరిస్థితి ఇందుకు భిన్నంగా ఉన్నాయి. 2014లో టీడీపీకి అండగా నిలిచిన జనసేన, బీజేపీలు ఇప్పుడు ఒక జట్టుగా మారాయి.

పవర్‌ స్టార్‌ పవన్‌ కల్యాణ్‌తో పొత్తుకు చంద్రబాబు ఎంతో ఆసక్తి చూపిస్తున్నారు. కానీ, పవన్‌ మాత్రం తనను సీఎం అభ్యర్థిగా ప్రకటించిన పార్టీకే మద్దతిస్తానని చెప్పకనే చెప్పారు. 2014, 2019 ఎన్నికల్లో తాను తగ్గానని వచ్చే ఎన్నికల్లో తగ్గేదిలే అని స్పష్టం చేశారు. తన ముందు మూడు మార్గాలున్నాయని పవన్‌ చెప్పారు. అవి.. 1) ఒంటరిగా పోటీ చేయటం 2) బీజేపీ, జనసేన కలిసి పోటీ చేయటం 3) బీజేపీ,జనసేన,టీడీపీ కలిసి పోటీ చేయటం అని అన్నారు. ఇక్కడ కండీషన్లు వర్తిస్తాయని కూడా చెప్పారు. తనకు ప్రాధాన్యత ఇచ్చే పార్టీతో కలిసి ముందుకు వెళతానన్నారు. దీంతో పవన్‌ కల్యాణ్‌ను ఉమ్మడి సీఎం అభ్యర్థిగా ప్రకటించేందుకు బీజేపీ ఆలోచిస్తున్నట్లు తెలుస్తోంది. ఈ మేరకు అధిష్టానం కూడా దీనిపై చర్చలు జరుపుతోందట.పవన్‌తో కలిసి పోటీ చేస్తే బీజేపీకి లాభం ఉంటుంది. ఏపీలో బీజేపీ ఓటు బ్యాంకు అతి తక్కువ కాబట్టి కలిసి పోటీ చేయటం కలిసొస్తుందని బీజేపీ అధిష్టానం భావిస్తోందట. అయితే, చంద్రబాబు నాయుడ్ని.. పవన్‌ సీఎం అభ్యర్థి అనే మాట ఇరకాటంలో పడేసిందని సమాచారం. ఏపీలో జనసేనతో పోల్చుకుంటే టీడీపీ ఓటు బ్యాంకు చాలా ఎక్కువ. అలాంటి టీడీపీ.. తక్కువ ఓటు బ్యాంకు ఉన్న జనసేన వ్యక్తిని సీఎం అభ్యర్థిగా ప్రకటించటం ఏంటని ఆలోచిస్తున్నారంట. సీట్ల విషయంలో అయితే పర్లేదు కానీ, సీఎం అభ్యర్థి విషయంలో మాత్రం కుదరదన్నట్లుగానే ఉన్నారట. మరోవైపు ఓటమి భయం కూడా చంద్రబాబును వెంటాడుతున్నట్లు సమాచారం. 2019 ఎన్నికల్లో చాలా ప్రాంతాల్లో స్వల్ప ఓట్ల తేడాతోనే టీడీపీ అభ్యర్థులు ఓటమి పాలయ్యారు.

ఒకవేళ జనసేనతో కలిసి పోటీ చేసుంటే కచ్చితంగా గెలిచి ఉండేవారు. ఇలా ఈ సారి ఎన్నికల్లో కూడా జరిగితే పరిస్థితి దారుణంగా ఉంటుందని భయపడుతున్నారట. అలా జరగకుండా ఉండేందుకు ప్రయత్నాలు చేస్తున్నారట. పవన్‌ను సీఎం అభ్యర్థిని చేసేందుకు టీడీపీలోని చాలా మంది సీనియర్లు ఆసక్తిచూపించటం లేదట. పైపెచ్చు తీవ్రంగా వ్యతిరేకిస్తున్నారట. పార్టీ నేతల అభిప్రాయాలను సైతం పరిగణలోకి తీసుకుని ముందుకు వెళ్లే ఆలోచనల్లో చంద్రబాబు ఉన్నారట. అన్ని విషయాల్లో తగ్గినా.. సీఎం విషయంలో చంద్రబాబు తగ్గుతారో లేదో అన్నది ప్రశ్నార్థకంగా మారింది. మరి, వచ్చే ఎన్నికల్లో గెలుపు తప్పని సరైన నేపథ్యంలో చంద్రబాబు.. పవన్‌ కల్యాణ్‌ను ఉమ్మడి సీఎం అభ్యర్థిగా ప్రకటిస్తారా? లేదా? అన్న దానిపై మీ అభిప్రాయాలను కామెంట్ల రూపంలో తెలియజేయండి.

ఇవి కూడా చదవండి : Nagababu: వచ్చే సారి ఎన్నికల్లో పోటీ చేసేది లేదు: నాగబాబు