follow us:
ఇటీవల కాలంలో థియేట్రికల్ రిలీజ్ అవుతున్న సినిమాలన్నీ కొద్దిరోజులకే ఓటిటి బాటపడుతున్న సంగతి తెలిసిందే. థియేటర్లలో రిలీజ్ అయ్యాక ఓటిటిలోకి వచ్చినా.. డైరెక్ట్ ఓటిటి రిలీజైనా చూసేందుకు ప్రేక్షకులు సిద్ధంగానే ఉన్నారు. అయితే.. ఎంత పెద్ద స్టార్ హీరోల సినిమాలైనా ఓటిటికి రెండు నెలల్లోపే వచ్చేస్తున్నాయి. అలాంటిది ఓ డెబ్యూ హీరో మూవీ.. నాలుగు నెలలు గడుస్తున్నా ఓటిటిలోకి రాకపోవడం గమనార్హం. ఆ హీరో ఎవరో కాదు.. శరవణ స్టోర్స్ యజమాని లెజెండ్ శరవణన్. అవును.. హీరో కావాలన్న కలను తన 52వ ఏట నెరవేర్చుకున్నాడు శరవణన్. ఆయన డెబ్యూ చేసిన మూవీ ‘ది లెజెండ్‘.
శరవణ స్టోర్స్ ద్వారా బిజినెస్ మ్యాన్ గా పాపులారిటీ సంపాదించుకున్న శరవణన్.. అదే స్టోర్ కి సంబంధించి ఎన్నో యాడ్స్ లో నటించాడు. అయినా హీరోగా సినిమాలు చేయాలనే కోరిక తీరకపోవడంతో.. యాభై రెండేళ్ల వయసులో ఎంట్రీ ఇచ్చాడు. అదికూడా సొంతంగా బ్యానర్ పెట్టి.. తన సినిమాని తానే ప్రొడ్యూస్ చేసుకోవడం విశేషం. దాదాపు రూ. 60 కోట్లకు పైగా బడ్జెట్ తో రూపొందిన ‘ది లెజెండ్’ సినిమాని.. ఏకంగా తమిళ, తెలుగుతో పాటు పాన్ ఇండియా స్థాయిలో రిలీజ్ అందరికీ షాకిచ్చాడు. ఎలాగో తన సినిమాకు పెట్టుబడి ఎంతైనా పెట్టగలడు కాబట్టి.. స్టార్ కాస్ట్, టెక్నికల్ టీమ్ ని పెట్టి ‘ది లెజెండ్’ మూవీని తెరపైకి తీసుకొచ్చాడు.
టెక్నికల్ గా సినిమాకు కావాల్సినవన్నీ బాగా సెట్ అయినప్పటికీ, హీరోగా మాత్రం శరవణన్ సెట్ కాలేదని.. ఆయన యాక్టింగ్ కామెడీగా ఉందనే విమర్శించారు ప్రేక్షకులు. అయినా అవేవీ లెక్క చేయకుండా హీరో కావాలనే డ్రీమ్ కంప్లీట్ చేసుకున్నాడు. అయితే.. హీరోగా నటించడం, సినిమా చేయడం వరకు బాగానే ఉంది. కానీ.. థియేట్రికల్ రిలీజ్ తర్వాత సినిమాని ఓటిటిలో రిలీజ్ చేయకపోవడమే చర్చనీయాంశంగా మారింది. జూలైలో విడుదలైన ఈ సినిమా.. డిసెంబర్ దగ్గరపడినా ఓటిటి కన్ఫర్మ్ చేయలేదు. ఈ క్రమంలో తాజాగా సినిమా ఓటిటి రిలీజ్ కి సంబంధించి ఓ క్రేజీ న్యూస్ సోషల్ మీడియాలో వైరల్ అవుతోంది.
ఆ మధ్య లెజెండ్ మూవీని ఓటిటి రిలీజ్ చేసే ఆలోచనలు లేవని చెప్పినట్లు వార్తలొచ్చాయి. కానీ.. ఎట్టకేలకు లెజెండ్ శరవణన్ తన ఆలోచనలు మార్చుకొని ఓటిటి రిలీజ్ చేయడానికి ఒప్పుకున్నట్లు తెలుస్తోంది. ది లెజెండ్ మూవీ డిజిటల్ స్ట్రీమింగ్ హక్కులను డిస్నీ హాట్ స్టార్ సంస్థ సొంతం చేసుకుంది. కాగా.. రానున్న డిసెంబర్ లో సినిమాని స్ట్రీమింగ్ చేయనున్నట్లు కోలీవుడ్ వర్గాల సమాచారం. ఇదిలా ఉండగా.. ఈ సినిమాలో శరవణన్ సరసన ఊర్వశి రౌటేలా, యాషిక ఆనంద్, రాయ్ లక్ష్మి హీరోయిన్లుగా నటించారు. రఘువరన్ బిటెక్ ఫేమ్ ఆర్. వేల్రాజ్ సినిమాటోగ్రఫీ అందించగా.. హారిస్ జయరాజ్ సంగీతం అందించాడు. చూడాలి మరి ఈసారి ది లెజెండ్ ఓటిటి రిలీజ్ పక్కా చేస్తాడేమో!
