సామాన్యుడికి మరో షాక్.. భారీగా పెరిగిన గ్యాస్ సిలిండర్ ధర

దేశ వ్యాప్తంగా గత కొన్ని రోజులుగా వరుసగా చమురు ధరలు సామాన్యులకు చుక్కలు చూపిస్తున్న విషయం తెలిసిందే. మరోవైపు రోజురోజుకూ పెరుగుతున్న నిత్యావసరాల ధరలు సామాన్యుడికి భారంగా మారాయి. దీనితోనే సతమతమవుతుంటే.. ఇప్పుడు ప్రభుత్వ చమురు మార్కెటింగ్ కంపెనీలు నవంబర్ 1 నుంచి ఎల్పీజీ గ్యాస్ సిలిండర్ల ధరలను భారీగా పెంచింది. గ్యాస్ కంపెనీలు వాణిజ్య గ్యాస్ సిలిండర్ల ధరను అమాంతం పెంచుతూ దీపావళి షాక్ ఇచ్చారు.

ఇక 19 కేజీల గ్యాస్ బండ ధరను రూ.266 పెంచుతున్నట్లు సోమవారం ప్రకటించింది. పెరిగిన ధరతో హైదరాబాద్‌లో రూ.2,175, విజయవాడలో రూ. 2,170గా ఉంది. కాకపోతే గృహాల్లో వాడే ఎల్‌పీజీ సిలిండర్ల ధరలను పెంచక‌పోవ‌డం కాస్త ఊర‌టనిస్తోంది. అయితే ఎల్‌పీజీ గ్యాస్ సిలిండర్ల ధర నెలకోసారి మారుతోన్న విష‌యం తెలిసిందే. ఆ సిలిండర్లు కొనుగోలు చేసిన అనంత‌రం సబ్సిడీ మొత్తం నేరుగా ల‌బ్ధిదారుల‌ బ్యాంకు ఖాతాలో జమ అవుతుంది. ప్రస్తుతం ఢిల్లీలో ఇప్పుడు సబ్సిడీ లేని 14.2 కిలోల సిలిండర్ ధర రూ.899.50. కోల్‌కతాలో ఎల్‌పీజీ సిలిండర్ ధర రూ.926, ముంబైలో రూ.899.50. చెన్నైలో సబ్సిడీయేతర సిలిండర్ ధర ఇప్పుడు రూ.915.50గా ఉంది.

ఢిల్లీలో 19 కిలోల వాణిజ్య‌ గ్యాస్ సిలిండర్ ధర రూ.1,734 నుంచి రూ.2,000.50 కు పెరిగింది. ముంబైలో గ్యాస్‌ సిలిండర్‌ ధర రూ.1950, కోల్‌కతాలో రూ.2073.50, చెన్నైలో రూ.2133కు చేరింది. వాణిజ్య సిలిండర్లను ఎక్కువగా హోటళ్లు, ఇత‌ర సంస్థ‌లు వినియోగిస్తుంటాయి. పెరిగిన ధరలకు చిరు వ్యాపారులు ఆందోళన చెందుతున్నారు.. తమ వ్యాపారాలు ఎలా సాగించాలని ఆవేదన వ్యక్తం చేస్తున్నారు.

LPG prices for commercial cylinders increased by Rs 266 from today onwards. Commercial cylinders of the 19 kg in Delhi will cost Rs 2000.50 from today onwards which was costing Rs 1734 earlier. No increase in domestic LPG cylinders.

— ANI (@ANI) November 1, 2021