బ్రేకింగ్: వందే భారత్ ఎక్స్‌ప్రెస్ రైల్లో చెలరేగిన మంటలు..

ఇటీవల కాలంలో వరుసగా రైలు ప్రమాదాలు చోటు చేసుకుంటున్నాయి. గత నెలలో ఒడిశాలోని బాలాసోర్ వద్ద మూడు రైళ్లు ప్రమాదానికి గురైన సంగతి తెలిసిందే. ఈ ఘటనలో వందల మంది తమ ప్రాణాలను కోల్పోయారు. జూలై నెలలో తెలంగాణలోని ఫలక్ నుమా ఎక్స్ ప్రెస్ రైలులో షార్ట్ సర్క్యూట్ కారణంగా మంటలు చెలరేగాయి. అయితే ప్రయాణికులు వెంటనే రైలు గొలుసు లాగడంతో ప్రమాదం తప్పింది. తాజాగా మరో రైలు ప్రమాదానికి గురైంది. వందే భారత్ ఎక్స్ ప్రెస్ రైలు బోగీలో మంటలు చెలరేగాయి. సోమవారం ఉదయం మధ్యప్రదేశ్ లోని బినా సిటీలోని ఈ ఘటన చోటు చేసుకుంది. భోపాల్ నుంచి ఢిల్లీ వెళ్తుండగా ప్రమాదం సంభవించింది.

రైలు బోగీలోంచి మంటలు, దట్టమైన పొగలు వస్తున్న వీడియోలు సోషల్ మీడియాలో వైరల్ అవుతున్నాయి. రైలు నంబర్ 20171 భోపాల్-హజ్రత్ నిజాముద్దీన్ వందే భారత్ ఎక్స్ ప్రెస్ రైలు సోమవారం ఉదయం 5:40 గంటలకు భోపాల్ లోని రాణి కమల్పతి స్టేషన్ నుంచి బయలుదేరింది. బినా సిటీ రైల్వే స్టేషన్ ముందు కుర్వై కేతోర వద్ద సి-14 బోగీలోంచి మంటలు వచ్చాయి. ఉదయం 7:10 గంటలకు రైలు కుర్వై కేతోర స్టేషన్ లో ఆగిపోయింది. ప్రయాణికులు వెంటనే రైలు దిగేశారు. ప్రమాద సమయంలో బోగీలో 36 మంది ప్రయాణికులు ఉన్నారు. ఈ ఘటనలో ఎలాంటి ప్రాణ నష్టం జరగలేదు. అగ్నిమాపక సిబ్బందికి సమాచారం ఇవ్వడంతో మంటలను అదుపు చేసేందుకు వారు ఘటనా స్థలానికి చేరుకున్నారు.

సి-14 బోగీలోని పవన్ కుమార్ అనే వ్యక్తి కూర్చున్న సీటు కింద నుంచి మంటల శబ్దం వచ్చిందని బ్యాటరీ వల్ల అగ్ని ప్రమాదం జరిగిందని పవన్ కుమార్ అనే ప్రయాణికుడు తెలిపాడు. అప్పుడు బోగీలో ఉన్న ప్రయాణికులందరూ పరుగులు పెట్టారని.. రైలు ఆగిన తర్వాత బ్యాటరీ నుంచి మంటలు రావడం చూశానని అన్నారు. బినా రైల్వే స్టేషన్ ముందు కుర్వై కేతోర గ్రామం వద్ద రైలు ఆగిపోయింది. అగ్నిమాపక సిబ్బందితో కలిసి స్థానికులు మంటలను ఆర్పేందుకు ప్రయత్నిస్తున్నారు. రాణి కమల్పతి-హజ్రత్ నిజాముద్దీన్ రైలు మధ్యప్రదేశ్ యొక్క మొట్టమొదటి వందే భారత్ ఎక్స్ ప్రెస్ రైలు. దీన్ని ఏప్రిల్ 1న ప్రధాని నరేంద్ర మోదీ జెండా ఊపి ప్రారంభించారు.

VIDEO | A fire broke out in a coach of Vande Bharat Express going from Bhopal to Delhi’s Hazrat Nizamuddin Terminal at Kurwai Kethora railway station in Madhya Pradesh earlier today. No injury was reported in the incident.

(Source: Third Party) pic.twitter.com/m1Nj0mHJ46

— Press Trust of India (@PTI_News) July 17, 2023