follow us:
పాకిస్తాన్‌లో వరదలు బీభత్సం సృష్టిస్తున్నాయి. గత కొన్ని రోజులుగా ఎడతెరిపి లేకుండా కురుస్తున్న భారీ వర్షాల కారణంగా ఆ దేశంలోని దాదాపు సగానికి పైగా ప్రాంతాలు నీట మునిగాయి. దేశంలోని 160 జిల్లాలకు గాను 110 జిల్లాల్లో వరదలు వచ్చినట్లు పాక్‌ నేషనల్‌ డిజాస్టర్‌ మేనేజ్‌మెంట్‌ అథారిటీ తెలిపింది. వరదల కారణంగా భారీ ఆస్తి నష్టం, ప్రాణ నష్టం సంభవించింది. సుమారు 11 వందల మంది మరణించినట్లు అధికారులు చెబుతున్నారు. మృతుల సంఖ్య ఇంకా పెరిగే అవకాశం ఉందని అధికారులు అంటున్నారు. దాదాపు 8 లక్షల పశువులు చనిపోయాయని, 20 లక్షల హెక్టార్ల మేరకు పంటలు దెబ్బతిన్నాయని పాకిస్తాన్ ఎన్‌డీఎంఏ వెల్లడించింది. 2 లక్షల 18 వేల ఇళ్ళు ధ్వంసం కాగా 4 లక్షల 52 వేల ఇళ్ళు దెబ్బతిన్నాయి.
ఇదిలా ఉంటే పాకిస్తాన్‌కి పలు దేశాలు ఆర్ధిక సహాయాన్ని అందిస్తున్నాయి. ఈ నేపథ్యంలో భారత్‌ కూడా సాయం అందించేందుకు సిద్ధమైనట్లు వార్తలు వస్తున్నాయి. పాకిస్తాన్‌కు సహాయం అందించేందుకు భారత్‌ చర్చలు జరిపినట్లు జాతీయ మీడియా పేర్కొంది. దీనిపై ఇంకా ఎలాంటి స్పష్టత లేదు గానీ భారత ప్రభుత్వం పాకిస్తాన్‌కి సహాయం చేసేందుకు మొగ్గు చూపుతున్నట్లు వార్తలు వస్తున్నాయి. గతంలో అప్పటి యూపీ ప్రభుత్వం 2005లో పాకిస్తాన్‌లో భూకంపం వచ్చినప్పుడు, 2010లో వరదలు వచ్చినప్పుడు సహాయం చేసింది.
Saddened to see the devastation caused by the floods in Pakistan. We extend our heartfelt condolences to the families of the victims, the injured and all those affected by this natural calamity and hope for an early restoration of normalcy.
— Narendra Modi (@narendramodi) August 29, 2022
దీంతో ఇప్పుడు బీజేపీ ప్రభుత్వం కూడా సహాయం అందిస్తుందని భావిస్తున్నారు. అదే జరిగితే 2014లో బీజేపీ అధికారంలోకి వచ్చిన తర్వాత ప్రకృతి విపత్తు కారణంగా చిన్నాభిన్నమైన పాకిస్తాన్‌కు భారత్‌ సాయం చేయడం ఇదే తొలిసారి అవుతుంది. కాగా పాకిస్తాన్ వరదలపై ప్రధాన మంత్రి నరేంద్ర మోదీ స్పందించారు. పాకిస్తాన్‌లో వరదలు సృష్టించిన బీభత్సం చూసి బాధపడ్డానని, ప్రకృతి వైపరిత్యంలో గాయపడిన కుటుంబాలకు, నష్టపోయిన వారికి సంతాపాన్ని తెలియజేస్తున్నానని, పాకిస్తాన్ దేశం త్వరగా కోలుకోవాలని ప్రధాని ట్వీట్ చేశారు.
