చైనాలో ఇటీవల ఓ విచిత్రమైన సంఘటన చోటుచేసుకుంది. రోజుల తరబడి పెద్ద ఎత్తున గొర్రెలు ఆగకుండా వృత్తాకారంలో తిరుగుతూనే ఉన్నాయి. అందుకు సంబంధించిన వీడియోలు సోషల్ మీడియాలో ప్రత్యక్షం కావడం, అందరూ ఏదో జరగబోతోందంటూ ప్రచారం చేయడం చక చకా జరిగిపోయాయి. గొర్రెలు ఇలా ప్రవర్తించడంపై నిపుణులు సైతం ఆశ్చర్యం వ్యక్తం చేశారు. ఉత్తర చైనాలోని ఇన్నర్ మంగోలియా ప్రాంతంలో ఈ ఘటన జరిగింది. పది రోజులకుపైగా పెద్ద సంఖ్యలో గొర్రెలు ఒకరకంగా అరుపులు చేస్తూ, వృత్తాకారంలో తిరుగాయి. ఏ మాత్రం గాడి తప్పకుండా కచ్చితమైన సర్కిల్లల్లో నిత్యం తిరుగుతూనే ఉన్నాయి.
చైనా, ఇన్నర్ మంగోలియాకు చెందిన మయో అనే వ్యక్తి వందల సంఖ్యలో గొర్రెలను పెంచుతున్నాడు. అందులో కొన్ని గొర్రెలు నవంబర్ తొలి వారం నుంచి వింతగా ప్రవర్తించడం మొదలు పెట్టాయి. వృత్తాకారంలో తిరగడం ప్రారంభించాయి. తొలుత కొన్ని గొర్రెలు ఇలా నడవడం మొదలుపెట్టగా.. వాటికి మరిన్ని తోడయ్యాయి. అలా ఏకంగా పది రోజులపాటు ఆ మందలోని గొర్రెలన్నీ క్రమం తప్పకుండా తిరుగుతూనే ఉన్నాయట. అందుకు సంబంధించినవీడియోను చైనా మీడియా.. నవంబర్ 16న సోషల్ మీడియాలో పోస్టు చేసింది. అయితే గొర్రెలు ఇలా ప్రవర్తించడానికి కారణం వ్యాధి కారణమంటూ నిపుణులు చెప్తున్నారు.
The great sheep mystery! Hundreds of sheep walk in a circle for over 10 days in N China’s Inner Mongolia. The sheep are healthy and the reason for the weird behavior is still a mystery. pic.twitter.com/8Jg7yOPmGK
— People’s Daily, China (@PDChina) November 16, 2022
లిస్టెరియోసిస్ అనే బాక్టీరియా సోకడం వల్లే గొర్రెలు అలా వింతగా ప్రవర్తిస్తూ ఉండవచ్చని పశువైద్య నిపుణులు చెప్తున్నారు. దీనినే సర్కింగ్ వ్యాధి అని పిలుస్తారట. ఆకలి తగ్గడం, జ్వరం, పాక్షిక పక్షవాతం, వృత్తాకారంలో తిరగడం వంటివి ఈ వ్యాధి లక్షణాలట. ఈ వ్యాధి సోకిన జంతువులు 48 గంటల్లోనే మరణించే ప్రమాదం ఉందని వీరు చెప్తున్నారు. అయితే, ఇవి మాత్రం ఆరోగ్యంగా ఉండడంతోపాటు సుమారు రెండు వారాలు ఏకధాటిగా వృత్తాకారంలో తిరిగాయి.
అయితే, వింత ప్రవర్తను బాక్టీరియా కారణం కాదని అంటున్నారు ఇంగ్లండ్ హార్ట్ ప్యూరీ యూనివర్సిటీకి చెందిన ప్రొఫెసర్ మ్యాట్ బెల్. చాలాకాలం పాటు గొర్రెలు దొడ్డిలోనే ఉండడం మూలంగానే అలా ప్రవర్తించి ఉంటాయని అంటున్నారు. ‘చాలాకాలంగా అవి దొడ్డికే పరిమితం అయ్యి ఉండొచ్చు. ఆ కారణంగానే బయటకు రాగానే.. అవి తమ పరిధిని దాటి పోకుండా అలాగే ఉండిపోయాయి. గుండ్రంగా తిరిగిన వాటి మూస ప్రవర్తనకు కారణం కూడా అదే. వాటిలో మందలోని కొన్ని గొర్రెలు అలా ప్రవర్తిస్తే.. పోనుపోనూ మిగతావి కూడా అనుసరిస్తూ ఉండిపోయాయి..” అని మ్యాట్ బెల్ తెలిపారు. అయితే ప్రస్తుతం అవి ఇంకా అలాగే తిరుగుతున్నాయా..? లేదా అనే విషయంపై మాత్రం స్పష్టత లేదు.
