follow us:
ప్రంపంచ దేశాలు భయపడిందే జరిగింది. రష్యా ఉక్రెయిన్ పై యుద్ధం ప్రారంభించింది. ఇప్పటికే ఉక్రెయిన్ లో మార్షల్‌ లా విధించారు. ఉక్రెయిన్ కూడా ఎదురు దాడి ప్రారంభించింది. అమెరికా రష్యా దాడిని ఖండించడమే కాక.. మరిన్ని ఆంక్షలు విధిస్తామని హెచ్చరిస్తోంది. ఈ క్రమంలో అసలు రష్యా-ఉక్రెయిన్ మధ్య యుద్ధానికి కారణమే అమెరికా అని.. దాని స్వార్థ ప్రయోజనాల కోసమే ఇరు దేశాల మధ్య ఉద్రిక్తతలను పెంచి.. చివరకు యుద్ధానికి దారి తీసే పరిస్థితులు తీసుకువచ్చిందని అంటున్నారు అంతర్జాతీయ వ్యవహారాల నిపుణులు. అసలు ఈ రెండు దేశాల మధ్య యుద్ధం రావాలని అమెరికా ఎందుకు భావించింది.. యుద్ధం వస్తే దానికి కలిగే ప్రయోజనాలు ఏంటనే వివరాలు..
ప్రపంచంలో అమెరికాకు ధీటుగా నిలిచే దేశంగా గుర్తింపు ఉన్నది రష్యాకు మాత్రమే. ఆర్థికంగా, సైనిక పరంగా, ఆయుధపరంగా కూడా రష్యా.. అమెరికాకు సమానంగా ఉంది అంటున్నారు విశ్లేషకులు. ఈ క్రమంలో తనకు ధీటుగా ఎదుగుతున్న రష్యాకు చెక్ పెట్టాలంటే దానికి సమీప దేశంలో తన పెత్తనం కొనసాగాలనేది అమెరికా ఆలోచన. అందుకే నాటో కూటమిలో చేరాలని ఉక్రెయిన్ పై ఒత్తిడి తెస్తోంది. ఆ కూటమిలో చేరితే ఊరుకునేది లేదని రష్యా బలంగా హెచ్చరించింది. ఫలితంగా రెండు దేశాల మధ్య ఉద్రిక్తతలు పెరిగాయి. చివరకు యుద్ధానికి దారి తీసింది.
ఉక్రెయిన్ లో క్రూడ్‌ ఆయిల్‌ నిక్షేపాలతో పాటు సహజ వాయువు కూడా ఎక్కువగా లభిస్తుంది. ఈ క్రమంలో ఉక్రెయిన్ స్వంతంత్ర ప్రకటించుకున్న నాటి నుంచి అమెరికా, సహా ఇతర ప్రపంచ దేశాలు ఉక్రెయిన్ లో ఈ రంగంలోనే పెట్టుబడులు పెడుతున్నాయి. ఉక్రెయిన్ నాటోలో చేరితే.. అమెరికా అధ్యక్ష ఎన్నికల ముందువరకు కూడా ఉక్రెయిన్ లో జో బైడెన్‌ కుమారుడు హంటర్‌ బైడెన్‌ పెత్తనమే కొనసాగిందని డొనాల్డ్‌ ట్రంప్‌ ఎన్నికలకు ముందు ఆధారలతో సహ వెల్లడించారు. ఇప్పుడు ఉక్రెయిన్ ను నాటో లో చేర్చుకుంటే.. ఆ దేశం అమెరికా చేతిలో కీలుబొమ్మ అవుతుంది. అదే జరిగితే వ్యాపార పరంగా, రక్షణపరంగా రష్యాకు పెను ముప్పుగా మారుతుంది. అందుకు ఉక్రెయిన్ ను నాటోలో చేర్చుకోవద్దని డిమాండ్‌ చేస్తోంది.
యుద్ధానికి రష్యాను బాధ్యురాలు చేసి.. ఆంక్షలు
రష్యా ఉక్రెయిన్ పై దాడి ప్రారంభించింది. తాము వేర్పాటువాదులపై మాత్రమే దాడి చేస్తామని.. ప్రజలపై కాదని ప్రకటించారు. మరోవైపు ఉక్రెయిన్ కూడా ఎదురుదాడి ప్రారంభించింది. ఉక్రెయిన్ కు మద్దతుగా నాటో దేశాలు సైన్యాన్ని పంపుతాయి అనే వాదన బలంగా వినిపిస్తోంది. సరిగ్గా అమెరికా కోరుకున్నది కూడా ఇదే. రష్యా-ఉక్రెయిన్ మధ్య యుద్ధం కాస్తా.. రష్యా-నాటోగా మారితేనే అమెరికాకు తాను ఆశించిన లాభం దక్కుతుంది. నాటో దేశాల బలగాలను ఓడించడం రష్యాకు అంత సులభం కాదు. ఈ క్రమంలో రష్యా మద్దతుదారులు కూడా రంగంలోకి ఎంట్రీ ఇస్తారు. భారీ ఎత్తున ప్రాణ నష్టమే కాక.. రష్యా ఆర్థికంగా కూడా భారీగా నష్టపోతుంది. ప్రాణనష్టానికి కారణం రష్యానే అని అంతర్జాతీయ సమాజంలో.. దానిపై ఆరోపణలు చేసి ఆంక్షలు విధించాలని అమెరికా వ్యూహం అంటున్నారు విశ్లేషకులు.
అణ్వాయుధాల అవసరం..
మరోవైపు ఈ యుద్ధం కారణంగా మరో సారి అత్యాధునిక ఆయుధాలు, అణ్యాయుధాల అవసరాన్ని ప్రపంచ దేశాలు గుర్తిస్తాయి. ప్రస్తుతానికైతే అణ్వాయుధాల వినియోగంపై నిషేధం ఉన్నప్పటికి.. భవిష్యత్తు అవసరాలను దృష్టిలో పెట్టుకుని.. అన్ని దేశాలు అణ్యాయుధాలను సమకూర్చుకునే ప్రయత్నాలు ప్రారంభిస్తాయి. ఈ క్రమంలో అన్ని దేశాలు అమెరికా వైపే చూడాల్సిన పరిస్థితి. ఆర్థికంగా ఇది అమెరికాకు బాగా కలసి వస్తుంది అంటున్నారు విశ్లేషకులు.
ఒక్క మాటలో చెప్పాలంటే ప్రత్యక్షంగా యుద్ధం ఉక్రెయిన్ కి, రష్యా మధ్య జరుగుతున్నా గాని.. పరోక్షంగా ఇది అమెరికా, రష్యాల మధ్య జరుగుతున్న యుద్ధమే. క్లియర్ గా చెప్పాలంటే ఉక్రెయిన్ కు పశ్చిమాన ఉన్న భాగాన్ని ఐరోపా దేశాలు, తూర్పు భాగాన్ని రష్యా వాడుకుంటున్నాయి. అయితే ఉక్రెయిన్ ని రష్యా కంట్రోల్ చేయడం అనేది ఈ ఐరోపా దేశాలకు నచ్చడంలేదు. ముఖ్యంగా అమెరికాకు నచ్చడం లేదు. ఫలితమే ఈ యుద్ధ పరిస్థితులు అంటున్నారు. మరి దీనికి ఎలాంటి ముగింపు లభిస్తుందో చూడాలి. దీనిపై మీ అభిప్రాయాలను కామెంట్స్‌ రూపంలో తెలియజేయండి.
