follow us:
ఇంటర్నేషనల్ డెస్క్- ఏపనైనా అందరూ చేసినట్టే మనమూ చేస్తే అందులో కొత్తేముంది చెప్పండి. అందరిలా కాకుండా కాస్త వెరైటీగా చేస్తేనే సమాజంలో గుర్తింపు వస్తుంది. ఇదిగో సరిగ్గా ఇలాగే ఆలోచించాడో యువకుడు. కరోనా వ్యాక్సిన్ సర్టిఫికెట్ విషయంలో ఇటలీకి చెందిన యువకుడు చేసిన పనికి అధికారులే కాదు, అంతా ఆశ్చర్యపోతున్నారు. ఇంతకీ ఆ కుర్రాడు ఏంచేశాడనే కదా మీ సందేహం. ఐతే అసలు విషయం తెలుసుకుందాం..
ఇటలీ లోఈ నెల 6 నుంచి షాపింగ్ మాల్స్, రెస్టారెంట్స్, క్రీడా ప్రాంగణాలకు వెళ్లేవారు కరోనా వ్యాక్సినేషన్ సర్టిఫికేట్ చూపించడం తప్పనిసరి అని నిబంధన విధించారు. దీంతో ఎప్పుడూ వ్యాక్సినేషన్ సర్టిఫికేట్‌ను తమతోపాటు ఉంచుకోవడం అక్కడి ప్రజలకు తప్పనిసరన్నమాట. ఇలా వ్యాక్సినేషన్ సర్టిఫికెట్ ను తమతో పాటు తీసుకెళ్లడం కొంత మందిని చిరాకును తెప్పించక మానదు కదా.
ఈ క్రమంలోనే వ్యాక్సిన్ సర్టిఫికేట్ విషయంలో ఓ యువకుడు సరికొత్తగా ఆలోచించాడు. రెగ్గియో కాలబ్రియాకు చెందిన ఆండ్రియా కొలొనెట్టా అనే యువకుడు కరోనా వ్యాక్సినేషన్ సర్టిఫికేట్ విషయంలో కాస్తా డిఫరెంట్‌గానే ఆలోచించాడు. ఇటీవలే రెండు డోసుల టీకా తీసుకున్న ఆండ్రియాకు క్యూఆర్ కోడ్ రూపంలో వ్యాక్సినేషన్ సర్టిఫికేట్ జారీ చేశారు అధికారులు. బయట షాపింగ్ మాల్స్, రెస్టారెంట్స్‌కు వెళ్లినప్పుడు వ్యాక్సినేషన్ సర్టిఫికేట్ తప్పనిసరి కావడంతో ఏంచేయాలా అని ఆలోచించాడా కుర్రాడు.
బాగా ఆలోచించాక తనకు జారీ అయిన కరోనా వ్యాక్సినేషన్ సర్టిఫికేట్ కు సంబందించిన క్యూఆర్ కోడ్‌ను స్కాన్ చేసే విధంగా చేతిపై టాటూగా వేయించుకున్నాడా యువకుడు. కొవిడ్ వ్యాక్సిన్ క్యూఆర్ కోడ్ టాటూను వేయడానికి సుమారు రెండు గంటల సమయం పట్టిందట. ఇంకేముంది అతను ఎక్కడికెళ్లిన ఈ టాటూను స్కాన్ చేస్తే చాలు వ్యాక్సినేషన్ వివరాలు వచ్చేస్తున్నాయి. ఇక తనతో పాటు వ్యాక్సిన్ సర్టిఫికెట్ ను తీసుకెళ్లాల్సిన అవసరం లేదని ఆండ్రియా రిలీఫ్ గా ఫీల్ అవుతున్నాడు. ఆండ్రియా చేసిన ఈ వెరైటీ ఆలోచనకు అంతా ఫిదా అవుతున్నారు.
