సింగర్ మనోకు అరుదైన గౌరవం.. ఆ యూనివర్శిటీ నుండి

పీహెచ్‌డీ లేదా వివిధ రంగాల్లో చేసిన విశేషమైన కృషి, సేవలకు గానూ యూనివర్శిటీలు కానీ ప్రభుత్వాలు గౌరవ డాక్టరేట్ అందిస్తుంటాయి. డాక్టరేట్ రావడమనేది చాలా అతి పెద్ద గౌరవంగా భావిస్తుంటారు. ఇప్పటికే అనేక రంగాల్లో సేవలందించినందుకు గానూ గౌరవ డాక్టరేట్‌ను పొందినవారున్నారు. తాజాగా ఆ జాబితాలోకి మరో గాయకుడు చేరారు. ఆయన మరెవరో కాదూ.. ప్రముఖ ప్లే బ్యాక్ సింగర్ మనో అలియాస్ నాగూర్ బాబు. ఆయనను రిచ్‌మండ్‌ గాబ్రియేల్‌ యూనివర్సిటీ డాక్టరేట్‌తో సత్కరించింది. సినీ సంగీత ప్రపంచానికి చేస్తున్న సేవలకుగాను ఆయనకు ఆ గౌరవం దక్కింది.

ఈ విషయాన్ని మనో సోషల్ మీడియా వేదికగా తెలియజేస్తూ ఆనందం వ్యక్తం చేశారు.‘భారతీయ సంగీత పరిశ్రమలో.. గాయకుడిగా, సంగీత దర్శకుడిగా 38 సంవత్సరాల పాటు 15 భాషల్లో 25 వేలకుపైగా పాటలను అందించాను. ఈ కృషికి గుర్తింపుగా రిచ్‌మండ్ గాబ్రియేల్ విశ్వవిద్యాలయం నాకు డాక్టరేట్‌ అందించింది. నన్ను సపోర్ట్‌ చేసే వారందరికీ కృతజ్ఞతలు. మీ ప్రేమాభిమానాలు ఎప్పుడూ ఇలానే ఉండాలి’ అని మనో ట్వీట్ చేశారు. సంబంధిత పట్టా పట్టుకుని దిగిన ఫొటోను అభిమానులతో పంచుకున్నారు. అంతేకాకుండా తన ట్విట్టర్‌లో డాక్టర్ మనో అని మార్చుకున్నారు. మనో 14 ఏళ్ల వయస్సులోనే సినిమా రంగంలోకి అడుగుపెట్టారు. సంగీతంపై ఉన్న మక్కువతో ప్రముఖ సంగీత దర్శకుడు ఎం. ఎస్‌. విశ్వనాథన్‌ దగ్గర అసిస్టెంట్‌గా చేరారు. ఆయన గాయకుడే కాదూ. డబ్బింగ్ ఆర్టిస్టు కూడా. ఎక్కువగా రజనీకాంత్ సినిమాలకు డబ్బింగ్ చెప్పారు.

మరో సంగీత దర్శకుడు చక్రవర్తి వద్ద పనిచేశారు. అలా ఒక్కో మెట్టు ఎక్కుతూ 1985లో గాయకుడిగా మారారు. ప్రియా ప్రియతమా రాగాలు , తిరుమల తిరుపతి వెంకటేశా, కిలకిల నవ్వే కోకిల కోసం, ముక్కాలా ముకాబులా అంటో అన్ని రకాల జోనర్స్ లో సాంగ్స్ పాడారు మనో.  టాప్ హీరోలందరీ సినిమాలో పాటలు పాడారు. ఈ తరం నటుల సినిమాల్లో కూడా తన గాత్రాన్ని ఆలపించారు. డబ్బింగ్ ఆర్టిస్టుగా పలు చిత్రాలకు తన గళాన్ని అందించారు. ఇలా పలు తమిళ సినిమాల్లోని ప్రముఖ హీరో రజనీకాంత్‌ పాత్రకు తెలుగు డబ్బింగ్‌ చెప్పింది మనోనే. కమల్‌హాసన్‌, రఘువరన్‌, అక్షయ్‌కుమార్‌, అనుపమ్‌ఖేర్‌ తదితరులు పోషించిన కొన్ని పాత్రలకూ మనో డబ్బింగ్ చెప్పారు. సంగీత దర్శకుడిగా, నటుడిగా, పలు టెలివిజన్‌ కార్యక్రమాలకు న్యాయ నిర్ణీతగా మనో తనదైన ముద్ర వేశారు.

Bestowed with #Doctorate by Richmond Gabriel University on my completion more then 25k songs 15 Indian languages and 38years in Indian musical industry as a singer and musician.

Humbled, Honoured and much love to all who has supported me, all always 💐 pic.twitter.com/lEkMxmALPt

— Dr Mano (@ManoSinger_Offl) April 16, 2023