follow us:
మెగా స్టార్‌ చిరంజీవి పుట్టిన రోజు వేడుకలను సోమవారం అంగరంగ వైభవంగా నిర్వహిస్తున్నారు. బాస్‌ పుట్టిన రోజు సందర్భంగా హైదరాబాద్‌ హైటెక్స్‌లో చాలా గ్రాండ్‌గా వేడుకలు చేస్తున్నారు. మెగాస్టార్ కార్నివాల్ పేరుతో జరిగిన ఈ ఈవెంట్‌కు మెగా హీరోలతో పాటు అభిమానులు భారీగా హాజరయ్యారు. ఈ సందర్భంగా మెగా బ్రదర్ నాగబాబు తీవ్ర భావోద్వేవగానికి గురయ్యారు. తన అన్నతమ్ములను ఎవరైనా విమర్శిస్తే.. తాట తీస్తా అంటూ ఘాటుగా హెచ్చరించారు. అంతేకాక.. చిరంజీవి గురించి పలు ఆసక్తికర విషయాలు చెప్పుకొచ్చాడు. ఆ వివరాలు..
ఈ సందర్భంగా నాగబాబు.. ఇండస్ట్రీలో చిరంజీవి ప్రస్థానం గురించి మాట్లాడుతూ.. ‘‘1976లో మా అన్న వయసు అప్పుడు 21 సంవత్సరాలు. ఇండస్ట్రీలో తనదైన ముద్ర వేయాలని.. తనకంటూ ఓ గుర్తింపు ఉండాలని నెల్లూరు నుంచి హైదరాబాద్‌కు వచ్చాడు. ఆ ప్రస్థానం నేడు మహా సామ్రాజ్యం అయ్యింది. ఇది మాములు విషయం కాదు. అన్నయ్యతో నాకు 62 ఏళ్ల అనుబంధం. ఆయన గురించి నాకంటే బాగా చెప్పేవారు ఇండస్ట్రీలో ఎవరు లేరు. అన్నయ్య పుట్టిన రోజు అంటే ఇంట్లో ఎంతో ప్రత్యేకమై రోజు. అన్న పుట్టినరోజును మా అమ్మ ఎప్పుడు ప్రత్యేకంగా చేసేవారు. అన్నయ్య ఇప్పుడు అందరికీ హీరో కావచ్చు. కానీ నాకు చిన్నప్పటి నుంచే హీరో. ఆయనకు చిన్నప్పటి నుంచి ఎంతో ఫాలోయింగ్‌ ఉంది’’ అంటూ చెప్పుకొచ్చారు.
‘‘మా అన్న సామ్రాజ్యం ఎంతలా విస్తరించిందంటే.. ఒక తమ్ముడికి నిర్మాతగా జీవితాన్ని ఇచ్చి నిలబెట్టాడు.. అది నేను. ఇంకొక తమ్ముడు పవన్ కళ్యాణ్. తను నిరంతర ఆలోచనవాది. పవన్ కళ్యాణ్ డైరెక్టర్‌ అవుదామని అనుకున్నాడు. అప్పుడు అన్నయ్యే.. డైరెక్షన్‌ తర్వాత చేయోచ్చు.. నీలో మంచి స్పార్క్ ఉంది.. ముందు నువ్వు హీరో అవ్వు..’ అని అన్నయ్య కళ్యాణ్ బాబుతో చెప్పారు. అన్నయ్య మాటను ఒప్పుకుని ఇవాళ పవర్ స్టార్‌గా మీ అందరి ముందుకు వచ్చాడు. రాజకీయ చైతన్యం తీసుకువచ్చిన వ్యక్తి జనసేనాని. భవిష్యత్తులో ఆంధ్రప్రదేశ్ ముఖ చరిత్రను మార్చే దమ్మున్న వ్యక్తి పవన్ కళ్యాణ్. అంతగొప్ప వ్యక్తిని ఆంధ్ర రాష్ట్రానికి ఇచ్చిన వ్యక్తి మెగాస్టార్ చిరంజీవి’’ అన్నారు.
‘‘బన్నీ, చరణ్, వరుణ్, సాయి ధరమ్ తేజ్, వైష్టవ్, నిహారిక, శిరీష్ మా బిడ్డలందరికి అన్నయ్యే బంగారు భవిష్యత్ ఇచ్చాడు. మా అన్నయ్య రుణం తీర్చుకోలేం. ఆయన ఎంత మంచి వాడో నాకు తెలుసు. అయినా కొంతమంది తనని విమర్శిస్తుంటారు. మా అన్నయ్య చిరంజీవిని, పవన్ కళ్యాణ్‌ను ఎవరు విమర్శించినా నేను గట్టిగానే రియాక్ట్‌ అవుతాను. అందుకు నన్ను వివాదాస్పద వ్యక్తి అంటున్నారు. మీరు ఏమనుకున్నా పర్లేదు.. నా అన్నను.. తమ్ముడిని ఎవరైనా ఏమైనా అంటే తాటతీస్తా.. అందులో ఎలాంటి అనుమానమే లేదు’’ అంటూ నాగబాబు మాస్ వార్నింగ్ ఇచ్చారు. ప్రస్తుతం నాగబాబు వ్యాఖ్యలు నెట్టింట వైరల్‌గా మారాయి. మరి దీనిపై మీ అభిప్రాయాలను కామెంట్స్‌ రూపంలో తెలియజేయండి.
