follow us:
దివంగత హాస్యనటుడు అల్లు రామలింగయ్య శత జయంతి వేడుకులను ఘనంగా ప్లాన్ చేశారు అయన తనయుడు, నిర్మాత అల్లు అరవింద్. అల్లు రామలింగయ్య శతజయంతి సందర్భంగా అల్లు స్టూడియోను గ్రాండ్ గా ప్రారంభించారు. ఈ వేడుకకు మెగాస్టార్ చిరంజీవి ముఖ్య అతిథిగా పాల్గొని స్టూడియోని ప్రారంభించడం జరిగింది. ప్రస్తుతం అల్లు స్టూడియోకి సంబంధించి ఫోటోలు సోషల్ మీడియాలో వైరల్ అవుతున్నాయి. ఈ స్టూడియోను హైదరాబాద్ సిటీకి బయట కోకాపేట ఏరియాలో నిర్మించారు. గతేడాది మొదలైన ఈ స్టూడియో నిర్మాణం ఇటీవల పూర్తవడంతో తాజాగా ఓపెనింగ్ చేశారు.
ఈ సందర్భంగా చిరంజీవి మాట్లాడుతూ.. “శ్రీ అల్లు రామలింగయ్య గారు, మా మావయ్య. ఆయన శతజయంతి సందర్భంగా ఈ ఉత్సవాలు జరపడం అనందంగా ఉంది. ఇది చాలా అరుదైన సంఘటన. నటులలో కొద్దిమందికి మాత్రమే ఇంతటి అభిమానం, ఆప్యాయత లభిస్తాయి. ఈరోజు అల్లు అరవింద్, ఆయన కుమారుడు బన్నీ, శిరీష్, బాబీ ఇండస్ట్రీలో అగ్రస్థానంలో ఉన్నారంటే.. దశాబ్దాల క్రితం పాలకొల్లులో అల్లు రామలింగయ్య గారి ఆలోచనే కారణం. ఆయన వేసిన బాటలోనే ఇప్పుడు నిర్మాతగా అరవింద్, హీరోలుగా బన్నీ, శిరీష్ రాణిస్తున్నారు. అందుకు అల్లువారి తరతరాలు ఆయనను స్మరించుకుంటూ ఉండాలి” అని చెప్పుకొచ్చారు.
ఇక కోకాపేట ప్రాంతంలో దాదాపు 10 ఎకరాల విస్తీర్ణంలో అల్లు స్టూడియోని భారీ స్థాయిలో నిర్మించింది అల్లు ఫ్యామిలీ. అడ్వాన్స్ టెక్నాలజీతో, సినిమాలకు కావాల్సిన అన్ని సదుపాయాలతో ఈ స్టూడియోని నిర్మించారు. మరో విషయం ఏంటంటే.. అల్లు అర్జున్ హీరోగా నటిస్తున్న పాన్ ఇండియా మూవీ పుష్ప-2 షూటింగ్ ఈ స్టూడియోలోనే జరగనున్నట్లు సమాచారం. పుష్ప-2 షూటింగ్ కి సంబంధించి అన్ని ఏర్పాట్లు ప్రస్తుతం జరుగుతున్నట్లు తెలుస్తుంది. అల్లు స్టూడియో ప్రారంభోత్సవానికి చిరంజీవి, ఆయన భార్య సురేఖ, అల్లు అర్జున్ ఫ్యామిలీ అందరూ పాల్గొన్నారు.
నటుడు అల్లు రామలింగయ్య గురించి తెలుగు ప్రేక్షకులకు పరిచయం అక్కర్లేదు. హాస్యనటుడిగా ఎన్నో వందల సినిమాలు చేసిన ఆయన.. తెలుగు ప్రేక్షకుల గుండెల్లో చిరస్థాయిగా నిలిచిపోయారు. ఆయన కుమారుడుగా అల్లు అరవింద్ ఇండస్ట్రీలో స్టార్ ప్రొడ్యూసర్ గా ఎదిగి.. ఆహా అనే ఓటిటి ప్లాట్ ఫామ్ కూడా స్థాపించారు. ఇక అల్లు రామలింగయ్య మనవళ్లుగా అల్లు అర్జున్, అల్లు శిరీష్ లు ఇండస్ట్రీలో హీరోలుగా కొనసాగుతున్నారు. ఇదిలా ఉండగా.. 10 ఎకరాల్లో అల్లు స్టూడియోస్ నిర్మాణం జరుగుతుండగా.. ప్రస్తుతానికి స్టూడియోలో ఒక ఫ్లోర్ నిర్మాణం పూర్తయినట్లు తెలుస్తుంది. అయితే.. ఈ స్టూడియోని ఇండోర్ షూటింగ్స్ కోసం నిర్మిస్తున్నట్లు సినీవర్గాలు చెబుతున్నాయి. ఫ్యూచర్ లో పోస్ట్ ప్రొడక్షన్ వర్క్ కి వీలుగా సన్నాహాలు చేయనున్నారట.
