‘ఏజెంట్’ ఫ్లాప్​కు పూర్తి బాధ్యత మాదే.. అలా చేయడం వల్లే ఫెయిల్ అయ్యిందన్న నిర్మాత!

అక్కినేని వారసుడు అఖిల్​కు మరో పరాజయం ఎదురైంది. ఎలాగైనా హిట్ కొట్టాలన్న కసితో చేసిన ‘ఏజెంట్’ మూవీ కూడా ఈ యంగ్​ హీరోకు చేదు అనుభవాన్నే మిగిల్చింది. స్టార్ డైరెక్టర్ సురేందర్ రెడ్డి దర్శకత్వంలో, అనిల్ సుంకర నిర్మాణంలో తెరకెక్కిన ఈ చిత్రానికి మొదటి షో నుంచే మిక్స్​డ్ టాక్ వచ్చింది. ఈవెనింగ్ షోకు అది కాస్త ఫ్లాప్​ టాక్​గా మారింది. దీంతో ప్రేక్షకుల ఆదరణ కరువైంది. కలెక్షన్లలో అఖిల్​ ‘ఏజెంట్’ వెనుకబడిపోయాడు. సూపర్ హిట్ కొట్టాలనే ఉద్దేశంతో కండలు పెంచి, అదిరిపోయే యాక్షన్ స్టంట్​లు చేసి అఖిల్ ఎంత కష్టపడినా ఆశించిన ఫలితాన్ని మాత్రం అందుకోలేకపోయారు.

‘ఏజెంట్’ సినిమాకు ఆడియెన్స్ నుంచి మిశ్రమ స్పందనలు వచ్చినా.. ఇందులో అఖిల్ నటన, యాక్షన్ సీక్వెన్స్​లకు మంచి మార్కులు పడ్డాయి. యాక్టింగ్ పరంగా అఖిల్ చాలా మెరుగయ్యాడని, మరింత పరిణతితో నటించారని ప్రశంసలు అందుకున్నారు. ఇదిలా ఉండగా.. ఈ సినిమా ఫలితంపై నిర్మాత అనిల్ సుంకర స్పందించారు. ఈ మేరకు ట్విట్టర్​ వేదికగా ఆయన ఒక ఆసక్తికర ట్వీట్ చేశారు. ‘ఏజెంట్’ ఫెయిల్యూర్​కు పూర్తి బాధ్యత తమదేనన్నారు. చాలా కష్టతరమైన లక్ష్యాన్ని జయించగలమనే ప్రాజెక్టును మొదలుపెట్టామని, కానీ అందులో ఫెయిల్ అయ్యామన్నారు.

‘ఏజెంట్’ సినిమా విషయంలో ఒక ఘోర తప్పిదం చేశామన్నారు నిర్మాత అనిల్ సుంకర. బౌండెడ్ స్క్రిప్ట్ లేకుండా చిత్రాన్ని మొదలుపెట్టడం తాము చేసిన అది పెద్ద తప్పు అని ఆయన వెల్లడించారు. అలాగే కొవిడ్ వల్ల కూడా అనుకోని సమస్యలు సతమతం చేశాయన్నారు. ఈ చిత్ర ఫలితానికి సంబంధించి మన్నించమని అడగలేమని.. అయితే ఈ కాస్ట్​లీ మిస్టేక్ నుంచి ఎంతో నేర్చుకున్నామని అనిల్ సుంకర్ ట్వీట్​లో రాసుకొచ్చారు. ఈ సినిమా విషయంలో చేసిన తప్పులను మళ్లీ పునరావృతం కాకుండా చూసుకుంటామన్నారు. తమ మీద నమ్మకం ఉంచిన వారందరికీ అనిల్ క్షమాపణలు చెప్పారు. భవిష్యత్తు ప్రాజెక్టుల విషయంలో సరైన ప్లానింగ్, మరింత హార్డ్ వర్క్​తో పనిచేస్తామని వివరించారు.

We have to take the entire blame for #Agent. Though we know its an uphill task, we thought of conquering but failed to do so as we did a blunder starting the project without a bound script & innumerable issues including covid followed. We don’t want to give any excuses but learn…

— Anil Sunkara (@AnilSunkara1) May 1, 2023