సూపర్ మార్కెట్ షాపింగ్ ఖర్చు పెరిగిపోతుందా? ఖర్చు తగ్గించుకునే చిట్కాలివే..

సూపర్ మార్కెట్.. సూపర్ మార్కెట్ నువ్వు ఏం చేస్తావు అంటే.. వెయ్యి రూపాయల సరుకులు కొనాలని వచ్చిన వారితో కనీసం 10 వేల రూపాయల సరుకులు కొనిపిస్తా అన్నదట. సూపర్ మార్కెట్ల జోరు, సాధారణ పౌరుల పోరు చూస్తుంటే పరిస్థితి ఇలానే ఉందనిపిస్తుంది. అనిపించడం ఏమిటి పిండా మీల్.. అదే నిజం. రైలుపెట్టెలు అమ్మడం లేదు గానీ అమ్మితే గనుక.. అగ్గిపెట్టె కొందామని వెళ్లే వారి ఆలోచన సైతం మార్చేసి వారితో రైలుపెట్టె కొనేలా చేస్తారు. అదే సూపర్ మార్టులు, మార్కెట్ల వెనుక ఉన్న స్ట్రాటజీ. ఈ స్ట్రాటజీ అర్ధం కావాలంటే మళ్ళీ పెద్ద పెద్ద చదువులు, పుస్తకాలూ చదవక్కర్లేదు. జస్ట్ కామన్ సెన్స్ తో ఆలోచిస్తే సరిపోతుంది. 

కావాల్సినవి మాత్రమే కొనుక్కుని వచ్చేసేవాళ్లు హీరోలు, కావాల్సిన వాటితో పాటు అక్కర్లేనివి కూడా కొనుక్కునేవాళ్ళు కమెడియన్లు అని ప్రతి ఒక్కరికీ అనుభవం అయ్యే ఉంటుంది. అతిగా షాపింగ్ చేసే ఆమె, అస్సలు ఆలోచించని అతడు బాగుపడినట్టు షాపింగ్ చరిత్రలోనే లేదు. ఒకటి కొందామని వెళ్తే.. మరొకటి తగులుకుంటుంది. అయ్యో వారు మాత్రం బతకొద్దేమిటండి అని సానుభూతి చూపిస్తే సామాన్య జనం మన మీద మనమే సానుభూతి చూపించుకునే పరిస్థితి వస్తుంది. ఇది యాపారం.. మా స్ట్రాటజీలు, ఆఫర్లు ఇలానే ఉంటాయి అని వారు చెప్పకపోయినా తెలుసుకోవాల్సిన బాధ్యత ఒక సామాన్యుడిగా అందరి బాధ్యత. ఎందుకంటే నలిగిపోతున్న జీవితాల గురించి సామాన్యుడి కంటే బాగా ఇంకెవరికీ తెలియదు కాబట్టి.     

ఒకప్పుడు ఏమైనా సరుకులు కొనాలంటే ఇంటి దగ్గర్లోనే ఉన్న దుకాణాలకు వెళ్లి తెచ్చుకునేవారు. ఇప్పుడు 10 రూపాయలు తగ్గుతుందంటే 200 ఖర్చు పెట్టైనా సరే ఎక్కడో దూరంగా ఉన్న మార్టుకి వెళ్లి 2వేలు వదలగొట్టుకుని వస్తాం. ఏ, బీ, సీ, డీ ల పేరుతో అనేక సూపర్ మార్టులొచ్చేశాయి. అవి సూపర్ గానే ఉంటాయి. కొన్న సామాన్యులకు ఊఫర్ అదిరిపోతోంది. ఏం కావాలన్నా ఒకే చోట దొరుకుతున్నాయి. దీంతో రకరకాల ప్రదేశాలకి తిరిగే పని లేదు. కస్టమర్ల పని సులువైయిపోయింది. అదే సమయంలో మార్టుల యజమానుల పని కూడా సులువైపోయింది. కస్టమర్ల చేత అక్కర్లేని సరుకులు కొనిపించడం కూడా మార్టు యజమానుల సులువైన పని. కాబట్టి ఈ మార్టుల ట్రాప్ లో పడకుండా.. ఖర్చు తగ్గించుకోండిలా.

లిస్టు ప్రిపేర్ చేసుకోండి:

• ఒకప్పుడు ఏమైనా సరుకులు కొనాలంటే కావాల్సినవి మాత్రమే లిస్టు తయారుచేసుకునేవారు. ఒక చీటీ మీద కావాల్సిన సరుకుల జాబితా రాసి.. దాన్ని ఇంట్లో పిల్లలకో, భర్తకో ఇచ్చి పంపేవారు. అలా చేయడం వల్ల ఇంట్లో లేని సరుకులు మాత్రమే తెచ్చుకుంటారు. ఇంట్లో ఉన్న సరుకులు చీటీలో రాయరు కాబట్టి డబ్బు వృధా అనేది ఉండదు. 
• సూపర్ మార్కెట్ కి వెళ్ళినప్పుడు కూడా ఇదే పద్ధతిని అవలంభిస్తే మంచిది. చీటీ కాకపోయినా ఫోన్ లోనో, వాట్సాప్ లోనో లిస్టు పెట్టుకుని సరుకులు తీసుకుంటే డబ్బులు ఆదా అవుతాయి. 
• కొనే ముందు మీ ఫ్రిడ్జ్ లోని సరుకులను, వంట గదిలోని సరుకులను బాగా చెక్ చేసుకోండి. లేని సరుకుల పేర్లను మాత్రమే జాబితాలో చేర్చుకోండి. 
• ఇంట్లో ఆల్రెడీ ఉన్న సరుకులు మళ్ళీ తీసుకోవడం వల్ల పాడైపోవడం తప్ప ఇంకేం ఉండదు. 
• ఒకవేళ ధర తగ్గింది, మళ్ళీ తగ్గుతుందో లేదో అనుకుంటే కొనడం మంచిదే. కానీ ఇంట్లో మోతాదుకు మించి ఉంటే కొన్నా వృధా అవుతుంది. ఎక్కువ స్టాక్ ఉంటే సరుకులు పాడైపోతాయి. 

తక్కువగా కొనాలనుకునే సరుకుల వైపు వెళ్ళాలి:

• ఈ సూపర్ మార్కెట్ లు ఎలాంటివంటే.. మనకు కావాల్సినవి ఎక్కడో కంటికి దూరంగా పెట్టి.. అనవసరమైనవి మాత్రం లోపలకి ప్రవేశించగానే కంటికి కనిపించేలా పెడతారు. 
• కాబట్టి వాటి వైపు అస్సలు వెళ్ళకండి. ముందు మీరు ఏ సరుకులు కొనాలని ప్రిపేర్ అయి వచ్చారో అవి మాత్రమే కొనండి. 
• ఆ తర్వాత తప్పదు, కొనాల్సిందే అనుకుంటే అప్పుడు నచ్చిన సరుకులు కొనండి. 
• నచ్చిన సరుకులు వేరు, అవసరమైన సరుకులు వేరు. దేనికి ప్రాధాన్యత ఇస్తున్నారన్నదే ప్రధానం. 
• నచ్చిన సరుకులు ఎప్పుడూ కంటికి ఆకర్షణీయంగా కనబడతాయి. దీని వల్ల డబ్బులు వృధా. 
• మీరు ప్రిపేర్ చేసుకున్న జాబితాలో వస్తువు కనబడగానే బాస్కెట్ లో వేసుకుని.. టిక్ పెట్టుకోవాలి. 

బుధవారం షాపింగ్:

• గూగుల్ మ్యాప్స్ ప్రకారం.. బుధవారం రోజున మార్ట్స్ లో జనం రద్దీ తక్కువగా ఉంటుంది. కాబట్టి కంగారుపడడం, ద్రుష్టి మరలడం వంటివి ఉండవు.
• కాబట్టి బుధవారం సాయంత్రం షాపింగ్ చేయండి. ఆదివారం రద్దీగా ఉంటుంది కాబట్టి కంగారులో ఏం కొంటున్నారో కూడా అర్ధం కాదు. 

బ్రాండెడ్ కాకుండా మార్ట్ సరుకులకి ప్రాధాన్యత ఇవ్వండి: 

• ఇతర బ్రాండెడ్ కంపెనీల సరుకుల కంటే కూడా మార్ట్ యొక్క సొంత బ్రాండ్ సరుకులు కొంచెం చౌకగా ఉంటాయి. 
• కాబట్టి మార్ట్ యొక్క సొంత తయారీ సరుకులను కొనేందుకు ప్రయత్నించండి. 

ఫ్రిడ్జ్ ను సరిగా ఉపయోగించుకోండి:

• అవసరమైతే తప్ప మిగతా సమయంలో కూరగాయలు, ఇతర ఆహార పదార్థాలు ఫ్రిడ్జ్ లోనే ఉంచండి. 
• వాడకపోయినా బయట ఉంచడం వల్ల త్వరగా పాడైపోతాయి. ఇది మీ షాపింగ్ మీద ప్రభావం చూపిస్తుంది. 

ప్యాకింగ్ చేసిన సరుకులను ఇలా చేయండి:

• పిండి పదార్థాలు, పప్పులు, ఉప్పు, ఆయిల్ వంటి వాటిని సూపర్ మార్కెట్ వాళ్ళు ప్లాస్టిక్ కవర్లు, ప్లాస్టిక్ బ్యాగుల్లో ప్యాకింగ్ చేస్తారు. 
• వీటిని కవర్లతో ఉంచకుండా.. ఇంటికి వెళ్లిన వెంటనే స్టీల్ బాక్సుల్లో నిల్వ చేయండి. 
• ప్లాస్టిక్ కవర్లతో ఉంచడం వల్ల త్వరగా పాడవుతాయి. కొన్ని సరుకులు ఐతే బూజు పడతాయి. 
• మళ్ళీ కొనాల్సి వస్తుంది. కాబట్టి ప్లాస్టిక్ బ్యాగులను ఎవాయిడ్ చేయండి. ఫ్రిడ్జ్ లో కూరగాయలను కూడా ప్లాస్టిక్ కవర్లతో పెట్టకండి.

అవసరమైతే సరుకులను బల్క్ గా కొనండి:

• ధర తక్కువ ఉంది కాబట్టి.. ఆ సరుకులను బల్క్ గా కొనండి. 
• బల్క్ గా కొనడం వల్ల విడిగా కొనడం వల్ల అయ్యే ధర కంటే ఒక్కో దాని మీద తక్కువ ధర పడుతుంది. 

ఆకలితో సూపర్ మార్ట్ కి వెళ్ళకండి:

• ఆకలితో ఉన్నప్పుడు ఎక్కువ ఆహార పదార్థాలు కొనే అవకాశం ఉందని పరిశోధనలు చెబుతున్నాయి. 
• మీరు బాగా ఆకలిగా ఉన్నప్పుడు.. ప్రాసెస్డ్ లేదా ప్యాకేజ్డ్ ఫుడ్ కొనేందుకు ప్రేరణ కలుగుతుంది. 
• దీని వల్ల డబ్బులూ, ఆరోగ్యం రెండూ వృధానే. 

 సరుకుల ధరలను ట్రాక్ చేయండి:

• ఏ సరుకులు కొన్నా కూడా ఆ సరుకుల ధరలను గుర్తు పెట్టుకోండి. గత వారం ఉన్న ధర, ప్రస్తుతం ఉన్న ధర పోల్చి చూసుకోండి. 
• ఉదాహరణకు మీరు గత వారం ఒక వస్తువు కొంటే.. దాని ధర అప్పటి ధర ఉన్నా.. లేదా తగ్గినా కొనచ్చు. ఎక్కువ ఉంటే మాత్రం కొనకండి. 

బిల్లింగ్ దగ్గర టెంప్ట్ అవ్వకండి:

• బిల్లింగ్ దగ్గర కూడా మిమ్మల్ని టెంప్ట్ చేయడానికి ఆకర్షణీయమైన వస్తువులు పెడతారు. 
• లాస్ట్ మినిట్ లో వాటిని తీసి బాస్కెట్ లోనో, ట్రాలీలోనో వేస్తే ఇక మీ పని అంతే. 

మొహమాటం, భయం వదలండి:

• బడ్జెట్ దాటిపోయింది, బిల్లు అనుకున్న దానికంటే ఎక్కువ అయ్యింది అనుకంటే మొహమాటం లేకుండా, భయపడకుండా అవసరం లేని సరుకులు అక్కడే వదిలేయండి. 

ఆన్ లైన్ పేమెంట్ చేయండి:

• ఆన్ లైన్ పేమెంట్స్ చేస్తూ ఉండండి. రివార్డ్ పాయింట్స్ వస్తుంటాయి. 
• మీ దగ్గర క్రెడిట్ కార్డు ఉంటే స్వైప్ చేస్తే క్యాష్ బ్యాక్ కూడా వస్తుంది. 

ఆన్ లైన్ గ్రోసరీ షాపింగ్: 

• డబ్బులు ఆదా చేయాలనుకునేవారు ఆన్ లైన్ లో కొనడం ఉత్తమం
• సూపర్ మార్ట్ లేదా సూపర్ మార్కెట్ కి వెళ్లడం వల్ల అక్కడ ఆఫర్లు ఆకర్షిస్తూ ఉంటాయి. అవసరం లేకపోయినా కొనాలనిపిస్తుంది. దీని వల్ల అనుకున్న బడ్జెట్ కంటే ఎక్కువ డబ్బులు ఖర్చవుతాయి.
• కాబట్టి ఆన్ లైన్ లో షాపింగ్ చేయడం ఉత్తమం.
• ఆన్ లైన్ యాప్స్ లో కావాల్సినవి మాత్రమే డబ్బులు ఎంత అవుతున్నాయో లెక్క చూసుకుని.. ఎక్కువనిపిస్తే తీసేయవచ్చు.
• అదే డైరెక్ట్ గా షాపింగ్ చేస్తే ఎంత కొంటున్నామో, ఏంటో అనేది లెక్క ఉండదు. 

ఇతర గ్రోసరీ మార్కెట్ యాప్స్ లో ధరల పోలిక:

• పలానా మార్ట్ కి వెళ్లే ముందు దాని సంబంధిత వెబ్ సైట్ లో ఆయా సరుకుల ధరలు చూడండి. ఇతర మార్ట్ వెబ్ సైట్స్ లో ధరలు ఎంత ఉన్నాయో పోల్చి చూడండి. ఎక్కడ తక్కువగా ఉంటే అక్కడకి వెళ్ళండి. 
• యాప్స్ లో కూడా అన్ని గ్రోసరీ యాప్స్ లో ధరల వ్యత్యాసం గమనించండి. ఎక్కడ తక్కువైతే దాన్నుంచే ఆర్డర్ పెట్టుకోండి.

లాస్ట్ బట్ నాట్ లీస్ట్:

• ఇంట్లో వారానికి సరిపడా కూరగాయలు ఉంటే మళ్ళీ కూరగాయలు కొనకండి. 
• క్యారీ బ్యాగ్ ఇంట్లోంచి తీసుకెళ్లండి. 
• ఏ సరుకులు కొన్నా ఎక్స్ పైరీ డేట్ చూసి కొనండి. 
• కూరగాయలు వంటివి వృధా చేయకండి. దీని వల్ల డబ్బు ఆదా అవుతుంది.   
• వీలైతే మీ ఇంటి సమీపంలో ఉండే కూరగాయల మార్కెట్ కి వెళ్ళండి. అక్కడ పెద్ద పెద్ద మార్టులతో పోల్చుకుంటే తక్కువ ధర ఉంటుంది. కొంచెం ఎక్కువగా ఉన్నా కూడా అదనపు భారం అనేది ఉండదు. కావాల్సినవి మాత్రమే కొంటారు. 
• ఇక బయట వీధుల్లో కూరగాయల బండ్లు వస్తుంటాయి. వాళ్ళ దగ్గర కొనడం వల్ల కూడా డబ్బు ఆదా అవుతుంది. పైగా పెట్రోల్ కూడా ఆదా అవుతుంది. 
• ప్రజల వద్దకే పాలన అన్నట్టు.. ప్రజల వద్దకే సరుకులు ఆర్డర్ పెట్టకపోయినా వస్తాయి.   

ఖర్చుల విషయంలో బడ్జెట్ పద్మనాభంలా ఉంటేనే సిటీల్లో సొంత ఇల్లు కట్టుకోగలరు. లేదంటే ఈ జీవితం సూపర్ మార్కెట్లని.. ఏ, బీ, సీ, డీ మార్ట్ లని పోషించడానికే సరిపోతుంది. కాబట్టి ఫుల్ ఫోకస్ లో ఉండండి. మీరు వచ్చిన పని ఏంటో క్లారిటీగా చూసుకుని వెళ్ళండి. మార్ట్ వాళ్ళు ఆకర్షణీయమైన వస్తువులతో డిస్ట్రాక్ట్ చేస్తుంటారు. అస్సలు డిస్ట్రాక్ట్ అవ్వకండి. డబ్బు ఆదా చేయడమే లక్ష్యంగా ముందుకు సాగిపోండి. దాని కోసం ఈ చిట్కాలను పాటించండి.