రింకూ సింగ్ చేతిలో ఆ బౌలర్ బలి.. రెండు రోజుల క్రితం చెప్పినట్లే!

ఐపీఎల్ తాజా సీజన్ లో ఇప్పటివరకు జరిగిన మ్యాచులేమో కానీ ఆదివారం మాత్రం నెక్స్ట్ లెవల్ ఎంటర్ టైన్ మెంట్ వచ్చింది. గుజరాత్ తో మ్యాచులో కోల్ కతా అస్సలు గెలిచే ఛాన్స్ లేదని అందరూ ఫిక్సయిపోయారు. అలాంటి టైంలో యంగ్ క్రికెటర్ రింకు సింగ్ లోని అపరిచుతుడు బయటకొచ్చాడు. అప్పటివరకు కూల్ గా ఆడుతున్నవాడు కాస్త రెచ్చిపోయి విధ్వంసం సృష్టించాడు. చివరి ఓవర్ లో వరసగా ఐదు సిక్సులు కొట్టి అసాధ్యం అనుకున్న గెలుపుని రియాలిటీలో సుసాధ్యం చేసి చూపించాడు. అయితే ఇలా చేస్తాడని రింకు సింగ్ కి కూడా తెలిసుండదు. కానీ అతడి చేతిలో బలైపోయిన బౌలర్ రెండు రోజుల ముందే కనిపెట్టాడు. ఇంతకీ ఏం జరిగింది?

ఇక వివరాల్లోకి వెళ్తే.. కోల్ కతా నైట్ రైడర్స్ జట్టుని ఐపీఎల్ లో అండగ్ డాగ్స్ అనొచ్చు. గంభీర్ కెప్టెన్సీలో గతంలో రెండుసార్లు కప్ గెలిచింది కానీ ఆ తర్వాత నుంచి ప్రతి సీజన్ లో తడబడుతూనే వస్తోంది. ఈసారి కెప్టెన్ శ్రేయస్ అయ్యర్ గాయపడటంతో ఎలాంటి ప్రదర్శన చేస్తుందోనని అందరూ అనుకున్నారు. అందుకు తగ్గట్లే తొలి మ్యాచులో ఓడినప్పటికీ.. ఆ తర్వాత రెండింటిలో అద్భుత విజయాలు సాధించింది. ఆర్సీబీతో మ్యాచులో శార్దుల్ సూపర్ బ్యాటింగ్ చేస్తే.. తాజాగా గుజరాత్ పై రింకు చెలరేగి ఆడాడు. విజయానికి 29 పరుగులు అవసరమైన దశలో ఏకంగా 5 సిక్సులు బాది శెభాష్ అనిపించుకున్నాడు. రింకు దెబ్బకు బలైపోయిన బౌలర్ యష్ దయాల్.. మ్యాచ్ తర్వాత గ్రౌండ్ లోనే బ్యాండ్ తో ముఖం కప్పేసుకున్నాడు.

స్వతహాగా ఫ్రెండ్స్ అయిన రింకు-యష్.. సరిగ్గా రెండు రోజుల ముందే సోషల్ మీడియాలో చాట్ చేసుకున్నారు. బెంగళూరు జట్టుపై కోల్ కతా 81 పరుగుల తేడాతో విజయం సాధించింది. ఈ మ్యాచులో రింకు.. 46 పరుగులు చేసి ఆకట్టుకున్నాడు. ఈ క్రమంలోనే మ్యాచ్ గెలిచిన తర్వాత రింకు ఇన్ స్టాలో పోస్ట్ పెట్టాడు. దీనికి కామెంట్ పెట్టిన యష్ దయాల్.. ‘బిగ్ ప్లేయర్ భాయ్’ అని అతడిని సంభోదించాడు. విచిత్రం ఏంటంటే.. ఇప్పుడు అదే యష్ దయాల్ బౌలింగ్ లో ఐదు సిక్సులు కొట్టి నిజంగానే తాను బిగ్ ప్లేయర్ అని రింకు నిరూపించాడు. ఇలా రెండు రోజుల క్రితం చెప్పింది చెప్పినట్లు జరగడం చూసి నెటిజన్స్ అవాక్కవుతున్నారు. అది యష్ దయాల్ బౌలింగ్ అయ్యేసరికి సానుభూతి చెబుతున్నారు. మరి రింకు-యష్ మధ్య అనుకున్నది అనుకున్నట్లు జరగడంపై మీ అభిప్రాయం ఏంటి? కింద కామెంట్ చేయండి.