ఈ ఏడాది సంక్రాంతిని ఏ రోజు జరుపుకోవాలి? జనవరి 14? జనవరి 15?

ప్రస్తుతం తెలుగు రాష్ట్రాల్లో సంక్రాంతి శోభ అప్పుడే వెల్లివిరుస్తోంది. పల్లెల్లో అప్పుడే పండగ వాతావరణం కనిపిస్తోంది. మకర సంక్రాంతి అంటే తెలుగు రాష్ట్రాల్లో ఎంత పెద్ద పండగో ప్రత్యేకంగా చెప్పాల్సిన పనిలేదు. అయితే ఈ ఏడాది సంక్రాంతి తేదీల్లో మాత్రం ఒకింత గందరగోళం నెలకొంది. పండగను జనవరి 14న జరుపుకోవాలా? లేక జనవరి 15న జరుపుకోవాలా? అనే సందిగ్ధతలో ఉన్నారు. అయితే మరి పంచాంగం ప్రకారం పండగ ఏ రోజు జరుపుకోవాలో చూద్దాం.

ఈ సంవత్సరం సంక్రాంతి జరుపుకునే విషయంలో కొన్ని సందేహాలు ఉన్న విషయం తెలిసిందే. కొందరు జనవరి 14న పండగ అని చెబుతుంటే.. ఇంకొందరు కాదు జనవరి 15న సంక్రాంతి అని చెబుతున్నారు. ఈ ఏడాది మకర సంక్రమణం రాత్రిపూట జరగడమే ఈ కన్ఫూజన్ రావడానికి ముఖ్య కారణం. సూర్యుడు మకర రాశిలోకి ప్రవేశించడాన్ని మకర సంక్రమణం అంటారు. ఆ రోజే సంక్రాంతిని జరుపుకుటారు. అయితే అది రాత్రి కావడంతో పెద్ద సమస్యే వచ్చి పడింది.

సూర్యుడు మకర రాశిలో సంచరించిన రోజునే మకర సంక్రాంతిగా జరుపుకుంటారు. అయితే ఈ ఏడాది జనవరి 14వ తారీఖు శనివారం రాత్రి 8 గంటల 45 నిమిషాలకు సూర్యుడు మకర రాశిలోకి ప్రవేశించనున్నాడు. సంక్రాంతికి స్నానాలు, దానాలు చేస్తుంటారు. మరి మకర సంక్రమణం రాత్రిపూట జరుగుతోంది కాబట్టి.. రాత్రులు అలాంటివి చేయకూడదు. అయితే ఈ ఏడాది సంక్రాంతిని 15వ తారీఖు జరుపుకోవాలని పండితులు చెబుతున్నారు. అంటే ఈ ఏడాది ఆదివారం మకర సంక్రాంతి అనమాట.

మకర సంక్రమణం రాత్రిపూట జరిగింది కాబట్టిి.. ఉదయ తిథికి సంక్రాంతిని జరుపుకోవాలి. అంటే సూర్యుడు ఉదయించిన తర్వాత జరుపుకోవాలని సూచిస్తున్నారు. అంటే తెల్లవారితే జనవరి 15 ఆదివారం రోజున మకర సంక్రాంతిని జరుపుకోవాలని చెబుతున్నారు. ఈసారి మకర సంక్రాంతి ఆదివారం రోజున వస్తోంది. సంక్రాంతికి సూర్య భగవాణుడిని ఆరాధిస్తారు. పైగా ఈసారి సూర్యూడికి ఇష్టమైన రోజు ఆదివారమే సంక్రాంతి కావడంతో ఇంకా మంచిదని చెబుతున్నారు.