follow us:
యూట్యూబ్‌ చూసి కొందరు వంటలు, కోర్సులు, డాన్సులు నేర్చుకుంటారు.. పనికొచ్చే విషయాలు నేర్చుకుంటే, తెలుసుకుంటే జీవితంలో ఏదో విధంగా ఉపయోగం ఉంటుంది.. కానీ అనవసరం అయినవి నేర్చుకుంటే కష్టాలు కొనితెచ్చుకున్నట్లే.. ఇంకొంతమంది జనాలను మోసం చేసి ఈజీ మనీ ఎలా సంపాదించాలో నేర్చుకుంటారు. ఇలా అడ్డదారిలో డబ్బు సంపాదించాలనే తప్పుడు ఆలోచనలో ఒక ముఠా ఏకంగా కర్సెనీ నోట్లనే ముద్రించడం యూట్యూబ్‌లో చూసి నేర్చుకుంది. దాన్ని వెంటనే ఆచరణలో పెట్టి లక్షలకు లక్షలు ముద్రించేసింది. వాటిని చెలామణిలోకి తేవాలనే ప్రయత్నంలో పోలీసులకు చిక్కింది. తక్కువ కాలంలో మోసాన్ని మెట్లుగా మార్చుకుని ధనవంతులు కావలన్న వారి కలలు కల్లలైయ్యాయి. ఇందులో షాకింగ్‌ విషయం ఏమిటంటే.. ఈ దొంగ తెలివి ఒక ఇంటర్‌ కుర్రాడికి వచ్చింది.. అతనికి తండ్రి సహకారం కూడా ఉంది.
కృష్ణ జిల్లాలోని పెడనలో దక్షిణ తెలుగుపాలెంకు చెందిన ముచ్చు శివ తన తల్లి వైద్యఖర్చుల నిమిత్తం రామలక్ష్మీవీవర్స్‌కాలనీకి చెందిన వాసా వెంకటేశ్వరరావు దగ్గర అప్పుగా రూ.2వేలు తీసుకున్నాడు. వీటితో శివ స్థానికంగా మెడికల్‌ దుకాణంలో మందులు కొనుగోలు చేసేందుకు నగదు ఇచ్చాడు. మెడికల్‌ షాపులో ఉన్న వ్యక్తి ఆ నోట్లలో తేడాను గమనించి.. ఇవి దొంగనోట్లు అని చెప్పడంతో శివ తిరిగి వాసా వెంకటేశ్వరరావు వద్దకు వెళ్లాడు. వెంకటేశ్వరరావు అవి దొంగనోట్లు కాదని, తనకు వీరభద్రపురంలోని కాసా నాగరాజు, అతని కుమారుడు ఇచ్చారని చెప్పి వెళ్లిపోయాడు. అనుమానం వచ్చిన శివ పెడన పోలీసులకు ఫిర్యాదు చేశారు. దీంతో పోలీసులు తొలుత వెంకటేశ్వరరావును విచారించి, ఆపై కాసా నాగరాజు ఇంటికి వెళ్లి శనివారం అర్ధరాత్రి సోదాలు చేశారు.
ఈ సోదాల్లో కలర్‌ జిరాక్స్‌ మిషన్‌తో పాటు ల్యాప్‌టాప్, కటింగ్‌ మిషన్, రూ.4లక్షలు విలువ గల నకిలీ కరెన్సీ నోట్లు, రూ.32,700 అసలు నగదు దొరికింది. దీంతో నాగరాజును పూర్తిస్థాయిలో విచారించగా.. అసలు విషయాలు బయటకొచ్చాయి. నాగరాజు, ఇంటర్‌ చదివే తన కుమారుడు ఇద్దరూ కలిసి ఇంట్లోనే నకిలీ నోట్లు ముద్రిస్తున్నట్లు ఒప్పుకున్నాడు. యూట్యూబ్‌లో నకిలీ నోట్లకు సంబంధించిన వీడియో చూసి, మూడు నెలలుగా ముద్రణపై ప్రాక్టీస్‌ చేసినట్లు చెప్పాడు. నకిలీ నోట్లు ఎవరెవరికి.. ఎంతెంత ఇచ్చిన దానిపై పోలీసులు విచారణ చేయగా రూ.40వేలు లేదా రూ.35వేలు అసలు నగదు తీసుకుని రూ.లక్ష నకిలీ కరెన్సీ నోట్లు ఇస్తున్నట్లు వారు వివరించారు. ఇలా నకిలీ కరెన్సీ నోట్లు తీసుకుని చెలామణి చేసేందుకు సిద్ధమైన వారిని కూడా పోలీసులు అదుపులోకి తీసుకున్నారు.
