కస్టమర్లకు అలర్ట్‌.. సిబిల్‌ స్కోర్‌ బాగాలేకపోతే ఇక అంతే

ప్రస్తుత కాలంలో బ్యాంక్‌ నుంచి రుణం పొందాలంటే.. ముందుగా గుర్తుకు వచ్చేది సిబిల్‌ స్కోర్‌. ఈ స్కోర్‌ ఆధారంగానే బ్యాంక్‌ లు రుణాలు మంజూరు చేస్తాయి. ఇది ఎంత తక్కువ ఉంటే.. బ్యాంక్‌ నుంచి లోన్‌ వచ్చే అవకాశాలు అంత తక్కువ. అందుకే ప్రస్తుతం ప్రతి ఒక్కరు సిబిల్‌ స్కోర్‌ ను పెంచుకునే ప్రయత్నం చేస్తున్నారు. సిబిల్‌ స్కోర్‌ ను పెంచుకోవడం ఎంత ముఖ్యమో.. దాన్ని అలానే స్థిరంగా కాపాడుకోవడం కూడా అంతే ముఖ్యం అంటున్నాయి బ్యాంకులు. ఎప్పుడైనా లోన్‌ కోసం అప్లై చేస్తే.. బ్యాంకులు ముందుగా చేసే పని మీ క్రెడిట్‌ స్కోర్‌ కోసం అప్లై చేయడం. దాన్ని యాక్సెస్ చేసి స్కోర్ బాగుంటే లోన్ అప్లికేషన్‌కు ఆమోదం తెలియజేస్తాయి. లేదంటే రిజెక్ట్ చేస్తాయి. సిబిల్ స్కోర్ బాగున్నా కూడా కొంత మందికి లోన్ రాకపోవచ్చు. దీనికి ఇతర అంశాలు కారణంగా ఉంటాయి. ఆదాయం, లోన్ రీపేమెంట్ కెపాసిటీ వంటి వాటిని చూస్తారు.

సిబిల్‌ స్కోర్‌ ఎంత ఉంటే మేలు..
సిబిల్ స్కోర్ అనేది 300 నుంచి 900 మధ్యలో ఉంటుంది. 750కి పైన స్కోర్ ఉంటే అది మంచి స్కోర్ అని అర్థం చేసుకోవాలి. ఇలాంటి వారికి సులభంగానే రుణాలు లభిస్తాయి. ఈఎంఐ కరెక్ట్ టైమ్‌కు చెల్లిస్తుండటం చాలా ముఖ్యం. అప్పుడు సిబిల్ స్కోర్ దెబ్బతినకుండా ఉంటుంది. అలాగే క్రెడిట్ కార్డు బిల్లులు కూడా కరెక్ట్ టైమ్‌కు కడుతూ ఉండాలి.

ఇన్సూరెన్స్‌ పాలసీ తిరస్కరించే అవకాశం..
ఆర్‌బీఐ రూల్స్ ప్రకారం చూస్తే ఫిన్‌టెక్ కంపెనీలు కూడా సిబిల్ స్కోర్‌ను యాక్సెస్ చేస్తాయి. ఒకవేళ సిబిల్ స్కోర్ బాగలేకపోతే.. ఇన్సూరెన్స్ రంగంతో అనుసంధానమైన ఫిన్ టెక్ కంపెనీలు మీకు ఇన్సూరెన్స్ పాలసీని తిరస్కరించే ఛాన్స్ ఉంటుందని నివేదికలు పేర్కొంటున్నాయి. అంతేకాకుండా స్టాక్ బ్రోకర్ కూడా డీమ్యాట్ అకౌంట్ ఓపెనింగ్‌కు నిరాకరించొచ్చు. అంటే మీరు స్టాక్ మార్కెట్‌లో ఇన్వెస్ట్ చేయడం కుదరదు.

అందువల్ల మీరు సిబిల్ స్కోర్‌ను జాగ్రత్తగా కాపాడుకుంటూ రావాలి. కరెక్ట్‌ టైమ్‌కు ఈఎంఐలు, క్రెడిట్ కార్డు బిల్లులు కడుతూ రావాలి. అలాగే పర్సనల్ లోన్స్ ఎక్కువగా తీసుకోకపోవడం ఉత్తమం. ఇవి అన్‌సెక్యూర్డ్ రుణాలు. అలాగే క్రెడిట్ కార్డులపై ఉన్న లిమిట్‌ను పూర్తిగా వొడొద్దు. దీని వల్ల కూడా సిబిల్ స్కోర్‌పై ప్రతికూల ప్రభావం పడే అవకాశముంది. భవిష్యత్‌లో క్రెడిట్ స్కోర్‌కు మరింత ప్రాధాన్యం పెరగొచ్చు. అందుకే దీనితో జాగ్రత్తగా ఉండాలి.