ఇలా పెళ్లి చేసుకుంటే రూ.2.50 లక్షలు వస్తాయి.. ఈ పథకం గురించి తెలుసా!

ప్రస్తుత కాలంలో పెళ్లి తంతు ఎంత భారంగా మారిందో ప్రత్యేకంగా చెప్పాల్సిన పని లేదు. జీవితంలో ఒక్కసారే జరిగే వేడుక అని చెప్పి.. అప్పు చేసి మరి ఆడంబరంగా వివాహం తంతు నిర్వహిస్తున్నారు. మధ్యతరగతి, ధనవంతుల ఇళ్లల్లో అయితే ఖర్చు గురించి మాట్లాడాల్సిన అవసరం లేదు. మరి పేదల సంగతి ఏంటి. అందునా ఆడపిల్ల వివాహం అంటే కట్నకానుకల పేరుతో బోలేడు ఖర్చు అవుతుంది. ఈ నేపథ్యంలో ప్రభుత్వాలు నిరుపేద యువతలకు వివాహ సందర్భంగా ఆర్థిక సాయం చేస్తున్న సంగతి తెలిసిందే. ప్రస్తుతం రెండు తెలుగు రాష్ట్రాల్లో ఇలాంటి పథకాలు అమల్లో ఉన్నాయి. అయితే కేంద్ర ప్రభుత్వం కూడా వివాహ సందర్భంగా ఆర్థిక సాయం చేసే పథకాన్ని ఒకదాన్ని ప్రారంభించింది. ఈ పథకం ద్వారా ఏకంగా 2.50 లక్షల రూపాయలు అందిస్తోంది. ఇంతకు ఆ పథకం పేరేంటి.. ఎవరికి వర్తిస్తుంది.. ఎలా అప్లై చేసుకోవాలి వంటి పూర్తి వివరాలు..

నాగరిక సమాజంలో బతుకుతున్నామని గొప్పగా చెప్పుకుంటున్నప్పటికి.. నేటికి కూడా మన సమాజంలో కులాల పేరుతో కుమ్ములాడుకోవడం మాత్రం తగ్గలేదు. పైగా కొన్నేళ్ల నుంచి ఈ భావన మరింత ముదిరినట్లు కొన్ని సంఘటనలు చూస్తే అర్థం అవుతుంది. నేటికి కూడా మన సమాజంలో కులాంతర వివాహాలను అంగీకరించలేకపోతున్నాం. పెద్దలను ఎదిరించి ఇలా కులాంతర వివాహాలు చేసుకుంటే.. ఏకంగా కన్నప్రేమను సైతం మర్చిపోయి బిడ్డలను కడతేరుస్తున్న తల్లిదండ్రులను చూస్తున్నాం. ఈ నేపథ్యంలో సామాజిక అసమానతలు రూపుమాపేందుకు కేంద్ర ప్రభుత్వం ఓ వినూత్న పథకాన్ని తీసుకువచ్చింది.

ఈ పథకం కింద కులాంతర వివాహాలను ప్రోత్సాహించడం 2.50 లక్షల రూపాయల ఆర్థిక సాయం అందజేస్తుంది కేంద్ర ప్రభుత్వం. ఆ పథకమే ‘డాక్ట‌ర్ అంబేద్కర్ స్కీమ్ ఫ‌ర్ సోష‌ల్ ఇంటిగ్రేష‌న్ త్రూ ఇంట‌ర్ క్యాస్ట్ మేరేజెస్’. ద‌ళితులు ఇతర కులాలకు చెందిన వారిని వివాహం చేసుకునేలా వారిని ప్రోత్స‌హించడం కోసం ఈ ప‌థ‌క‌ం తీసుకువచ్చారు. 2013లో కేంద్ర ప్రభుత్వం దీన్ని ప్రారంభించింది. ఇందుకోసం అంబేద్కర్‌ ఫౌండేషన్‌ను స్థాపించి.. దీని ద్వారా ఈ పథకాన్ని అమలు చేస్తోంది. ఈ ప‌థ‌కం వివ‌రాలు ఏమిటి.. దీనికి అర్హులెవరు.. ఎలా ద‌ర‌ఖాస్తు చేసుకోవాలి.. ఈ ప‌థ‌కం ద్వారా ఆర్థిక సహాయం అందుకోవడం ఎలా.. నియమ నిబంధనలేమిటి వంటి వాటికి సంబంధించిన పూర్తి వివరాలు..

అర్హులెవరంటే..

• 18 సంవ‌త్స‌రాల వ‌య‌సు నిండిన యువ‌తీయువ‌కులు
• కులాంత‌ర వివాహం చేసుకున్నవారు ఈ పథకానికి అర్హులు.
• వివాహ‌మైన జంట‌ల్లోని వ‌ధూవ‌రుల్లో ఒకరు త‌ప్ప‌నిస‌రిగా ద‌ళితులై ఉండాలి.
• అంతేకాక ఈ కులాంత‌ర వివాహం హిందూ వివాహ చ‌ట్టం ప్రకారం రిజిస్టరై ఉండాలి.
• ఈ కులాంతర వివాహాన్ని సబ్ రిజిస్ట్రార్ కార్యాలయంలో రిజిస్ట్రేషన్ చేయించి ఉండాలి.
• ఈ కులాంత‌ర వివాహం చ‌ట్ట‌బ‌ద్ధ‌మైన‌ద‌న‌ని తెలియ‌జేస్తూ వ‌ధూవ‌రులిద్ద‌రూ ఒక అఫిడ‌విట్ స‌మ‌ర్పించాలి
• మొదటిసారి వివాహం చేసుకుంటున్న వారికి మాత్రమే ఈ పథకం కింద ఆర్థిక సాయం అందుతుంది.
• పెళ్లి చేసుకున్న జంటలో దళిత సామాజిక వర్గానికి చెందిన వారు తప్పనిసరిగా తమ క్యాస్ట్‌ సర్టిఫికెట్‌ సమర్పించాలి.
• దళిత సామాజిక వర్గానికి చెందని భాగస్వామి కూడా తన కుల ధ్రువీకరణ పత్రం సమర్పించాల్సి ఉంటుంది.
• అలానే ఈ పథకానికి అప్లై చేసుకునే కులాంతర వివాహం చేసుకున్న జంట తప్పనిసరిగా తమ ఆధార్ కార్డులను సమర్పించాలి.

ఎలా ధ‌ర‌ఖాస్తు చేసుకోవాలి

• ఈ పథకం ద్వారా కేంద్ర ప్రభుత్వం ఇచ్చే ఆర్థిక సాయం పొందాలంటే.. కులాంతర వివాహం చేసుకున్న వారు నిబందనల ప్రకారం తమ దరఖాస్తును తమ ప్రాంతానికి చెందిన పార్లమెంటు సభ్యుడు/ శాసనసభ్యుడు/ జిల్లా కలెక్టర్ ద్వారా సిఫారసు చేయించుకోవాలి.
• పైన పేర్కొన్న వ్యక్తుల ద్వారా మాత్రమే దరఖాస్తు అంబేద్కర్ ఫౌండేషన్‌కు చేరాలి.
• లేదంటే వారి సిఫారసు లేఖ అప్లికేషన్‌కు జత చేసి పంపించాలి.

ఆన్‌లైన్‌లో దరఖాస్తు చేసుకోవడం ఎలా

డాక్ట‌ర్ అంబేద్క‌ర్ ఫౌండేష‌న్ వెబ్‌సైట్‌లో ఈ ద‌ర‌ఖాస్తు ఫారం ల‌భిస్తుంది. http://ambedkarfoundation.nic.in/icms.html ద్వారా దరఖాస్తు నమూనా పొందవచ్చు.

ఆంధ్ర‌ప్ర‌దేశ్ రాష్ట్రానికి చెందిన వారు https://gsws-nbm.ap.gov.in/NBM/#!/Login పెళ్లికానుక ప‌థ‌కం పోర్ట‌ల్ ద్వారా ఈ ప‌థ‌కానికి న‌మోదు చేసుకోవచ్చు.

తెలంగాణ‌ రాష్ట్రానికి చెందిన వారు https://telanganaepass.cgg.gov.in/ వెబ్‌సైటులోకి వెళ్లి అందులో Incentive/ Financial Assistance Name : Intercaste Marriage Incentive Award Registration/ Application Print/Status క్లిక్ చేసి దాని ద్వారా ద‌ర‌ఖాస్తు చేసుకోవ‌చ్చు.

కులాంతర వివాహం చేసుకున్న నాటి నుంచి ఏడాది లోపు ఆ దంపతులు ఈ పథకం కింద కేంద్ర ప్రభుత్వం అందించే 2.50 లక్షల ఆర్థిక సాయం పొందడానికి దరఖాస్తు చేసుకోవాలి.

ఆదాయ పరిమితి ఎంత ఉండాలంటే

• మొదట్లో ఇలా కులాంతర వివాహం చేసుకుంటున్న జంటల్లో.. దళిత భాగస్వామి కుటుంబ ఆదాయ పరిమితి రూ.5 లక్షల లోపు ఉండాలని కేంద్రం నిర్ణయించింది.
• కానీ తరువాత కేంద్ర ప్రభుత్వం ఈ నిబంధనను తొలగించింది.
• కులాంతర వివాహం చేసుకునే దళితులకు ఎలాంటి ఆదాయ పరిమితి లేకుండానే ఈ పథకం వర్తించేలా ప్రస్తుతం నిబంధనలు మార్చారు.

ఈ పథకం ద్వారా లభించే మొత్తాన్ని దంపతుల పేరిట ఉండే జాయింట్‌ బ్యాంక్‌ అకౌంట్‌లో ఈ మొత్తాన్ని జమ చేస్తారు. అయితే ఈ మొత్తాన్ని ఎన్ని విడతలలో ఇవ్వాలనేది ఫౌండేషన్ విచక్షణాధికారాలను బట్టి ఉంటుంది. కొన్నిసార్లు ఒకేసారి 2.50 లక్షల రూపాయలను ఆ దంపతుల జాయింట్‌ బ్యాంక్‌ ఖాతాలో జమ చేస్తారు.. కొన్ని సందర్భాలలో మొదట 1.50 లక్షల రూపాయలను చెల్లించి మిగతాది ఆ జంట పేరిట ఫిక్స్‌డ్ డిపాజిట్ చేస్తారు. 3 సంవత్సరాల పాటు ఈ ఫిక్స్‌డ్ డిపాజిట్టును నిర్వహించి మూడేళ్ల తరువాత వడ్డీ సహా ఆ డబ్బను ఆ దంపతులకు చెల్లిస్తారు.

దరఖాస్తులు అందాల్సిన చిరునామా

కులాంతర వివాహం చేసుకున్న వారు పెళ్లి కానుక కోసం తమ దరఖాస్తులను ఆయా రాష్ట్రాల జిల్లా మేజిస్ట్రేట్, జిల్లా కలెక్టరు/ డిప్యూటీ కమిషనరు/సంక్షేమ శాఖ ద్వారా సిఫారసు చేయించుకుని వారి ద్వారా ఆ దరఖాస్తులను ఈ కింద చిరునామాకు చేరేలా చూసుకోవాలి.

డాక్టర్ అంబేద్కర్ ఫౌండేషన్
జీవన్ ప్రకాష్ బిల్డింగ్
9వ అంతస్థు
25, కె.జి.మార్గ్
న్యూదిల్లీ – 110001

మరిన్ని వివరాలకు Consultant.daf@govcontractor.in011-26180211, 8588038789 ఫోన్ నంబర్లను కానీ సంప్రదించొచ్చు.

కులాంత‌ర వివాహాల‌ను ప్రోత్స‌హించ‌డానికి కేంద్ర ప్రభుత్వం ఇంత భారీ మొత్తంలో ఆర్థిక సాయం అంద‌జేస్తున్నా.. ఇప్ప‌టికీ దీని గురించి చాలామందికి అవ‌గాహ‌న లేక‌పోవ‌డం, కులాల క‌ట్టుబాట్లు మీర‌లేక‌పోవ‌డం త‌దిత‌ర కార‌ణాల వ‌ల్ల ఈ ప‌థ‌కాన్ని ఉప‌యోగించుకుంటున్న వారి సంఖ్య తక్కువగానే ఉందని అధికారులు తెలుపుతున్నారు. .