సంక్రాంతి అనగానే స్టార్ హీరోల సినిమాలే కాదు ప్రతిసారి ఎవరో ఒక చిన్న హీరో మూవీ కూడా థియేటర్లలో రిలీజ్ అవుతూ ఉంటుంది. అలా ఈసారి చిరు, బాలయ్య సినిమాలతోపాటు సంతోష్ శోభన్ నటించిన ‘కళ్యాణం కమనీయం’ కూడా ప్రేక్షకుల ముందుకు వచ్చింది. ‘ఏక్ మినీ కథ’, ‘మంచిరోజులొచ్చాయి’ లాంటి చిత్రాలతో తన మార్క్ క్రియేట్ చేసుకుంటున్నాడు సంతోష్ శోభన్. ఇక ప్రభాస్ సొంత బ్యానర్ అయిన యూవీ క్రియేషన్స్ నిర్మించిన ఈ సినిమాతో ప్రియా భవానీ శంకర్ హీరోయిన్ గా పరిచయమైంది. జనవరి 14న విడుదలైన ‘కళ్యాణం కమనీయం’ మూవీ ఎలా ఉంది? ఏంటనేది ఇప్పుడు రివ్యూలో చూద్దాం!
శివకు(సంతోష్ శోభన్) ఉద్యోగం ఉండదు. ఆ విషయం తెలిసి కూడా శ్రుతి(ప్రియా భవానీ శంకర్) ప్రేమిస్తుంది. పెద్దల్ని ఒప్పించి పెళ్లి కూడా చేసుకుంటుంది. ఎవరినీ డబ్బులు అడగొద్దని భర్తకు చెప్పి.. అతడి ప్రతి అవసరానికి డబ్బులిస్తూ ఉంటుంది. అంతా ఆనందంగా ఉందనుకున్న శివకు ఒక్కసారిగా షాక్ తగులుతుంది. ఉద్యోగం చేయాల్సిందేనని శివకు శ్రుతి అల్టిమేటం ఇస్తుంది. ఇక భార్యాభర్తల జర్నీలో చివరకు ఏం జరిగింది? శ్రుతికి ఉద్యోగం వచ్చిందని చెప్పిన శివ.. క్యాబ్ డ్రైవర్ అవతారం ఎందుకెత్తాడు? అసలు శివ, శ్రుతి మధ్య గొడవలకు మెయిన్ రీజన్ ఎవరు? చివరకు ఏమైంది అనేది తెలియాలంటే థియేటర్లలో మీరు సినిమా చూడాల్సిందే.
భార్యాభర్తల మధ్య అనుబంధం అనే కాన్సెప్ట్ తో ఫన్ ఎంటర్ టైనర్ గా తీసిన సినిమా ‘కళ్యాణం కమనీయం’. ఎలాంటి వల్గారిటీ, డబుల్ మీనింగ్ డైలాగ్స్ లేకుండా తీసిన న్యూ ఏజ్ ఫ్యామిలీ డ్రామా ఇది. చాలా నార్మల్ స్టోరీ కావడంతో పాటు యూత్ కి కచ్చితంగా రిలేట్ అవుతుంది. సింపుల్ స్టోరీ, స్క్రీన్ ప్లే, సీన్స్ తోనే సినిమా తీశారు. ఈ జనరేషన్ యూత్ అందరూ.. ఈ సినిమాలో తమను తాము చూసుకునేలా డైరెక్టర్ తీశాడు. ఇక హీరోహీరోయిన్లుగా చేసిన సంతోష్ శోభన్, ప్రియా భవానీ శంకర్.. చూడటానికి అందంగా కనిపించారు. జోడీ ఫ్రెష్ గా ఉండటంతో మంచి ఫీలింగ్ కలిగింది. భర్తకు ఉద్యోగం లేకపోవడం, ఖర్చులకు భార్య డబ్బులివ్వడం అనే కాన్సెప్ట్ గతంలో వచ్చిన ఓ తెలుగు సినిమాను గుర్తుచేస్తుంది. ఈ విషయంలో రెండింటికి కాస్త పోలికలు ఉన్నట్లు అనిపిస్తుంది.
ఇక ‘కళ్యాణం కమనీయం’ ట్రైలర్ చూస్తే దాదాపు మీకు స్టోరీ అర్థమైపోతుంది. కథలో పెద్దగా ట్విస్టులు ఏం ఉండవు. చిన్న చిన్నవి ఉన్నా కూడా సినిమా చూస్తుంటే మీకు ఫ్లోలో తెలిసిపోతాయి కూడా. అలానే ఆ ట్విస్టు ఎలా రివీల్ అవుతుందనేది కూడా మీకు ముందే తెలిసిపోతుంది. సినిమాలో హీరో, అతడి ఫ్రెండ్స్ మధ్య కామెడీ సీన్స్ రొటీన్ లా అనిపిస్తాయి. వీటి విషయంలో ఇంకాస్త శ్రద్ధ తీసుకుని ఉంటే బాగుండేది అనిపించింది. అలానే మ్యారేజ్ అనే విషయం గురించి ఇంకా డెప్త్ కి వెళ్తే ప్రేక్షకులకు నచ్చుతుంది. కానీ దర్శకుడు అనిల్ ఎందుకో ఆవైపు ఎక్కువగా దృష్టి పెట్టలేదనిపించింది.
గత సినిమాల్లో డిఫరెంట్ రోల్స్ లో కనిపించిన సంతోష్ శోభన్.. పక్కింటి అబ్బాయి రోల్ లో చక్కగా నటించాడు. ఉద్యోగం లేని కుర్రాడు, భర్తలా ఎమోషన్స్ ని బాగానే వర్కౌట్ చేశాడు. ఇక పెళ్లి, ఉద్యోగ ప్రయత్నాల్లో ఉన్న యువకులు అందరూ కూడా ఏదో ఓ సీన్ లో శివ క్యారెక్టర్ కు రిలేట్ అవుతారు. తమిళంలో ఇప్పటికే చాలా సినిమాలు చేసిన ప్రియాభవానీ శంకర్ ఈ సినిమాలో ఆకట్టుకునే ఫెర్ఫార్మెన్స్ ఇచ్చింది. చాలా సీన్లలో కళ్లతో యాక్ట్ చేసింది. నవ్వు కూడా చాలా ప్లెజెంట్ గా ఉంది. హీరోహీరోయిన్ల జోడీ చూడటానికి కలర్ ఫుల్ గా ఉంది. మిగిలిన రోల్స్ లో దేవి ప్రసాద్, పవిత్రా లోకేష్, కేదార్ శంకర్ తదితరులు ఉన్నంతలో బాగానే చేశారు. విలన్ గా చేసిన సత్యం రాజేష్.. ఉన్న మూడు నాలుగు సీన్లలో ఆకట్టుకున్నాడు. ఇక శ్రవణ్ భరద్వాజ్ కంపోజ్ చేసిన పాటలు బాగున్నాయి. బ్యాక్ గ్రౌండ్ మ్యూజిక్ సరిగ్గా సరిపోయింది. కార్తిక్ ఘట్టమనేని సినిమాటోగ్రఫీ రిచ్ గా ఉంది. యూవీ క్రియేషన్స్ నిర్మాణ విలువలు అదిరిపోయాయి. ప్రతి సీన్ లోనూ వారి ఖర్చు పెట్టిన డబ్బులు కనిపించింది.
చివరగా: కొత్తజంటలకు టైమ్ పాస్ మూవీ ‘కళ్యాణం కమనీయం’!
రేటింగ్: 2/5
