స్త్రీలు పొట్టి బట్టలు ధరిస్తే.. మగాళ్ల మనసు చలించదా?

ఇమ్రాన్ ఖాన్.. ఇప్పుడు పాకిస్థాన్ ప్రధాని. మాజీ క్రికెటర్. అప్పట్లో పాకిస్థాన్ కి వరల్డ్ కప్ సాధించి పెట్టడంలో ఇమ్రాన్ దే కీలక పాత్ర. దీంతో.., ఇమ్రాన్ ని పాకిస్థాన్ నెత్తిన పెట్టుకుంది. ఆ అభిమానంతోనే ఆయన్ని దేశ ప్రధానిని కూడా చేశారు అక్కడి ప్రజలు. కానీ.., ప్రధానిగా బాధ్యత చేపట్టినప్పటి నుండి ఇమ్రాన్ ఖాన్ తన బాధ్యతలను నిర్వర్తించడంలో పూర్తిగా విఫలం అవుతూ వస్తున్నారు. ఆ దేశంలో ఇప్పుడు మహిళల పట్ల వరుసగా జరుగుతున్న అఘాయిత్యాలు మహిళలను కలవర పరుస్తున్నాయి. ఈ నేపథ్యంలో దేశ ప్రధాని హోదాలో ఇమ్రాన్ ఖాన్ మహిళల వస్త్రధారణపై సంచలన కామెంట్స్ చేశారు.

“మహిళలు పొట్టి దుస్తులు ధరిస్తే రేప్ లు జరిగే అవకాశం పెరుగుతుంది. మగవారిపై ఆ పొట్టి డ్రెస్ లు కచ్చితంగా ప్రభావం చూపిస్తాయి. స్త్రీలు తమ శరీరం కనిపించేలా దుస్తులు ధరిస్తే మగవారి మనస్సు చలిస్తుంది. పురుషులు రోబోలు అయితే తప్ప.., వారు చలించకుండా ఉండరు. ఇక్కడ ఎలా నడుచుకోవాలనే ఇంగిత జ్ఞానం మనకే ఉండాలి’’ అని ఇమ్రాన్ ఖాన్ సంచలన వ్యాఖ్యలు చేశారు. దేశ ప్రధాని స్థానంలో ఉండి ఇమ్రాన్ ఖాన్ ఇలాంటి కామెంట్స్ చేయడంతో.. పాకిస్థాన్ మహిళలో ఇమ్రాన్ పై విమ్మర్శలకు దిగారు. అక్కడి మీడియా, ప్రతిపక్షాలు సైతం ఇమ్రాన్ ఖాన్ వ్యాఖ్యలను ఖండిస్తున్నాయి.

పాకిస్తాన్‌లో మహిళల పట్ల అఘాయిత్యాలు పెరుగుతున్న మాట వాస్తవమే. కానీ.., ఈ దారుణాలను మహిళల వస్త్రధారణతో ఇమ్రాన్ ముడిపెట్టడం దారుణమని ఇంటర్నేషనల్ కమిషన్ ఆఫ్ జూరిస్ట్స్ లీగల్ అడ్వైజర్ రీమా ఒమర్ అసహనం వ్యక్తం చేశారు. కాగా.., ఈ విషయంలో ప్రధాని వ్యాఖ్యలను వక్రీకరించారని ఇమ్రాన్ సోషల్ మీడియా వ్యవహారాలు చూసే అధికార ప్రతినిధి డాక్టర్ అర్ స్లాన్ ఖాలిద్ అభిప్రాయపడ్డారు. నిజానికి ఇమ్రాన్ ఖాన్ ఇలాంటి వ్యాఖ్యలు చేయడం ఇదే తొలిసారి కాదు. ఈ ఏడాది ఏప్రిల్ లోనూ ఇమ్రాన్ ఇలాంటి దారుణమైన కామెంట్స్ చేసి ట్రోల్స్ కి గురయ్యారు.