పీఎఫ్ ఖాతా ఉద్యోగులు అందరికీ ఉంటుంది. ఉద్యోగి జీతంలో నెల నెల కొంత మొత్తం ఈ పీఎఫ్ ఖాతాలో జమ అవుతూ ఉంటుంది.
ఈ ఖాతాలన్నీ ఉద్యోగుల భవిష్య నిధి(ఈపీఎఫ్ఓ) అధీనంలో ఉంటాయి. ఈ మొత్తానికి ప్రతి ఏటా వడ్డీ కూడా జమ అవుతుంది.
పీఎఫ్ ఖాతా నుంచి ఉద్యోగి అత్యవసర సమయాల్లో పాక్షికంగా కొంత సొమ్మును విత్డ్రా చేసుకునే సదుపాయం కూడా ఉంది.
ఆరోగ్య సమస్యలు, ఇంటి అవసరాలు వంటి వాటి కోసం కొంత మొత్తంలో డబ్బును వెనక్కి తీసుకోవచ్చు.
అయితే ఇటీవల కాలంలో ఈ డబ్బు దోచేయడానికి సైబర్ నేరగాళ్లు ప్రయత్నిస్తున్నారట. ఈ క్రమంలో ఈపీఎఫ్ఓ తమ ఖాతాదారులను హెచ్చరించింది.
సైబర్ నేరగాళ్లు కళ్లు ఇప్పుడు ఈపీఎఫ్ఓ ఖాతాదారులపై పడ్డాయని.. కావున ఉద్యోగులు జాగ్రత్తగా ఉండాలని ఈపీఎఫ్ఓ సూచించింది.
ఈ మేరకు ఉద్యోగుల భవిష్య నిధి(ఈపీఎఫ్ఓ) ఆన్‌లైన్ స్కామ్ హెచ్చరికలను విడుదల చేసింది.
ఖాతాదారులు ఎవరూ వారి యూఏఎన్ నెంబర్/ పాస్‌వర్డ్/ పాన్/ ఆధార్/ బ్యాంక్ ఖాతా వివరాలు లేదా ఏదైనా ఇతర వ్యక్తిగత లేదా ఆర్థిక వివరాలను ఎవరితోనూ షేర్ చేయొద్దని ఈపీఎఫ్ఓ తెలిపింది.
ఈపీఎఫ్ఓ సిబ్బంది కూడా ఈ వివరాలను కాల్స్, మెసేజెస్, ఈ-మెయిల్, వాట్సాప్, సోషల్ మీడియా ద్వారా ఎవరిని అడగరని వెల్లడించింది.
అలాగే ఫేక్ కాల్స్/మెసేజ్‌ల పట్ల జాగ్రత్తగా ఉండాలని, మెసేజ్ రూపంలో వచ్చే వచ్చే ఫేక్ లింకులతో కూడా జాగ్రత్తగా ఉండాలని ఈపీఎఫ్ఓ ఖాతాదారులను సూచించింది.
అలాంటి కాల్స్ లేదా మెసేజ్ లు వస్తే స్థానిక పోలీసు/సైబర్ క్రైమ్ బ్రాంచ్‌కు ఫిర్యాదు చేయాలని ఈపీఎఫ్ఓ పేర్కొంది.
చూశారుగా.. సైబర్ నేరగాళ్ల ఎత్తుగడలు. ఉద్యోగులూ మీరు జాగ్రత్త.