మ‌నం ఆహారంగా తీసుకునే ఆకుకూర‌ల్లో గోంగూర ఒక‌టి. గోంగూర పేరు చెబితే చాలా మందికి నోట్లో నీళ్లు ఊరుతుంటాయి.
తెలుగువారు అమితంగా ఇష్ట‌ప‌డే ఆహార ప‌దార్థాల్లో గోంగూర ఒక‌టి. ఈ గోంగూర‌తో ప‌ప్పు, ప‌చ్చ‌డి వంటి వాటిని త‌యారు చేస్తుంటారు.
గోంగూర ప‌చ్చ‌డిని ఆంధ్ర మాత అని కూడా అంటారు. తెలంగాణ ప్రాంతం వారు దీనిని పుంటి కూర అని అంటారు.
గోంగూర ప‌చ్చ‌డి చాలా టేస్టీగా ఉంటుంది. రుచిక‌ర‌మైన ఆహార ప‌దార్థం. గోంగూర‌తో నిల్వ ప‌చ్చ‌డిని కూడా త‌యారు చేస్తారు.
సంవ‌త్స‌రం పొడ‌వునా నిల్వ ఉండి ఉప్పులో ఊర‌వేసిన గోంగూర అత్య‌వ‌స‌ర ప‌రిస్థితుల్లో సిద్ధంగా ఉండే కూర.
గోంగూర‌లో కొండ గోంగూర, మంచి గోంగూర అనే ర‌కాలు ఉంటాయి. కొండ గోంగూర కాడ కొద్దిగా ఎరుపు రంగులో ఉంటుంది. ఆకు కొద్దిగా వ‌గ‌రు రుచితో ఉంటుంది. దీనిని ఎక్కువగా నిల్వ ప‌చ్చ‌ళ్ల‌కు వాడ‌రు.
మంచి గోంగూర పుల్ల‌గా ఉంటుంది. పండు మిర‌ప‌కాయ‌ల‌ను, గోంగూర‌తో క‌లిపి కొద్దిగా ఉప్పు వేసి తొక్కి నిల్వ ప‌చ్చ‌డి త‌యారు చేస్తారు.
మ‌న గోంగూర విదేశాల‌కు ప‌చ్చ‌డి రూపంలో ఎగుమ‌తి అవుతుంది. మాన‌వాళికి గోంగూర ఎంత‌గానో మేలు చేస్తుంది.
బోధకాలు, శ‌రీరంలో వాపులు, రేచీక‌టి, శ‌రీరంలో వ్ర‌ణాలు, వాపులు త‌గ్గ‌డానికి దివ్యౌష‌ధంగా గోంగూర ప‌నిచేస్తుందని నిపుణులు చెబుతున్నారు.
గోంగూర‌లో ఔష‌ధ గుణాలని ప‌రిశోధ‌కులు ఎప్పుడో కనిపెట్టారు. వ్ర‌ణాలు, గ‌డ్డ‌ల‌పైన గోంగూర ఆకుల్ని ఆముదంతో క‌లిపి దంచి వేడి చేసి ప‌ట్టు వేస్తే అవి త్వ‌ర‌గా తగ్గిపోతాయి.
వ్ర‌ణాలు, గ‌డ్డ‌ల వ‌ల్ల క‌లిగే బాధ తగ్గి అవి త్వ‌ర‌గా ప‌గిలిపోతాయి. రేచీక‌టి అనే కళ్ల ప్రాబ్లంతో బాధ‌ప‌డేవారు భోజ‌నంలో ప‌ప్పుగా లేదా ప‌చ్చ‌డిగా గోంగూర‌ను వాడితే కొంత మేర ఫ‌లితం ఉంటుంది.
త‌ర‌చూ గోంగూర వాడుతూ గోంగూర పూల‌ను దంచి అర క‌ప్పు ర‌సం తీసి దానికి అర క‌ప్పు పాలు క‌లిపి తాగితే రేచీక‌టి త‌గ్గుతుంది.
బోధకాలు త‌గ్గ‌డానికి, శ‌రీరంలో వాపులు త‌గ్గ‌డానికి గోంగూర, వేపాకు క‌లిపి నూరి ఆ ప‌దార్థాన్ని ప‌ట్టించాలి. అలా చేస్తే అవి పూర్తిగా మానిపోతాయి.
విరేచ‌నాలు ఎక్కువవుతూ ఉంటే కొండ గోంగూర నుండి తీసిన జిగురును నీటిలో క‌లిపి తాగాలి. ఇలా చేయ‌డం వ‌ల్ల వెంట‌నే తగ్గిపోతాయి.
మిర‌ప‌కాయ‌లు వేయ‌కుండా ఉప్పులో ఊర‌బెట్టిన గోంగూర‌ను అన్నంతో క‌లిపి తిన్నా విరేచ‌నాలు త‌గ్గుతాయి.
దగ్గు, ఆయాసం, తుమ్ములతో ఇబ్బందిప‌డే వారు గోంగూర‌ను ఎలా తీసుకున్నా కూడా మంచి ఫ‌లితం క‌లుగుతుంది. ఇది ఎంతో మేలు చేస్తుంది.
శ‌రీరంలో నీరు చేరిన‌ప్పుడు ఈ ఆకుకూర ప‌త్యం చాలా మంచిద‌ని నిపుణులు చెబుతున్నారు. విట‌మిన్ ఎ, విట‌మిన్ బి1, బి2, బి9, సి దీనిలో చాలా ఉంటుంది.
గోంగూర తీసుకోవ‌డం వ‌ల్ల దంత సమస్యలు దూరమవుతాయి. ఇందులో ఎక్కువగా ఉండే క్యాల్షియం ఎముక‌ల‌కు ఎంతో మేలు చేస్తుంది.
గోంగూర‌లో ఉండే ఫోలిక్ యాసిడ్, మిన‌ర‌ల్స్ యాంటీ ఆక్సిడెంట్లుగా ప‌నిచేస్తాయి. గుండె, మూత్ర‌పిండాల సమస్యలు, క్యాన్స‌ర్ లు రాకుండా కాపాడ‌తాయి.
గోంగూర మ‌న ఆరోగ్యానికి ఓ ర‌క్ష‌ణ క‌వ‌చంలా ప‌నిచేస్తుందన‌డంలో ఏ మాత్రం సందేహం లేదు. కాబ‌ట్టి దీన్ని త‌ప్ప‌నిస‌రిగా వాడమని నిపుణులు సలహా ఇస్తున్నారు.
నోట్: పైన టిప్స్ పాటించేముందు మీ దగ్గర్లోని డాక్టర్, నిపుణులు సలహా కూడా తీసుకోండి.