follow us:
అత్తా కోడళ్ళు అమ్మో ఇదో పెద్ద సబ్జెక్టు, అట్లాంటిక్ మహాసముద్రం కంటే పెద్దదని ఫీలవుతారు కొంతమంది. ఏ ఇంట్లో అయినా పొరపాటున కొడుకు పుట్టాడా ఇక ఈడి పని అయిపోయింది పాడు సమాజం ఆఫ్ ఇండియా నవ్వుకుంటుంది. ఇంట్లో ఇల్లాలు, వంటింట్లో ప్రియురాలు ఉన్నా కూడా మేనేజ్ చేయవచ్చేమో కానీ ఒకే ఇంట్లో భార్య, తల్లి ఉంటే మేనేజ్ చేయడం కష్టమని అత్తా, కోడళ్ల కొట్లాటలో నలిగిపోయే కొడుక భర్తలు భావిస్తుంటారు. ఒక చిన్ని నవ్వే నవ్వి యుద్ధాలన్నీ ఆపచ్చు అంటారు. మరి అత్తాకోడళ్ల గొడవను ఒక చిన్ని నవ్వుతో ఆపచ్చు కదా. కానీ అలా ఎందుకు చేయరు. అంటే నవ్వితే ‘నవ్వకండి సీరియస్ మేటర్’ అని చెప్పి చెరో దవడ పళ్ళు రాలగొడతారని భయమేమో. కారణం ఏదైనా గానీ అత్తాకోడళ్ల గొడవలోకి మగాళ్లు వెళ్లే సాహసం చేయరని అందరికీ తెలిసిందే.
అత్తా కోడళ్ళకు పడదు అన్న కాన్సెప్ట్ మీద కొన్ని వేల ఫ్రాంచైజీలు సీరియల్స్ రూపంలో, కామిక్స్, మీమ్స్ రూపంలో ఇప్పటికీ నడుస్తున్నాయి. అసలు అత్తా కోడళ్ళకి ఎందుకు పడదు అంటే ఉప్పు తక్కువైందని, పప్పు ఎక్కువైందని సిల్లీ రీజన్స్ చెప్తారు గానీ సైకలాజికల్ గా ఉన్న సమస్యలను సీరియస్ గా ఎవరూ బయటపెట్టరు. అసలు అత్తా, కోడళ్ల రిలేషన్ గురించి ఒక మహానుభావుడు ఏమన్నాడంటే.. ‘ది రిలేషన్ బిట్వీన్ అత్త అండ్ కోడలు మస్ట్ బి లైక్ ఏ రైస్ అండ్ రైస్ కుక్కర్, గ్యాస్ స్టవ్ అండ్ గ్యాస్ సిలిండర్, మ్యాచ్ బాక్స్ అండ్ మ్యాచ్ లా ఉండాలని అన్నాడు. నిత్యావసర సరుకులు, వంట సామాన్లలా కలిసి మెలిసి ఉండాలని, అత్తా కోడళ్ల బంధం పెనం మీద దోసలా పెనవేసుకోవాలని అంటారు. కానీ ఎంత అనుకున్నా దాదాపు చాలా ఇళ్లలో అత్తా కోడళ్ళు ఎడమొఖం, పెడమొఖం పెట్టుకుని ఉంటారని తెలిసిందే.
అసలు ఇలా ఉండడానికి కారణం ఏంటి? కొన్ని అధ్యయనాలు చెబుతున్న దాని ప్రకారం వారికి సైకలాజికల్ ప్రాబ్లమ్ ఉంటుందట. ముఖ్యంగా అత్త గారికి ఎక్కువగా ఉంటుందట. సాధారణంగానే మహిళలు కుటుంబం పట్ల పాజిటివ్ గా, సున్నితంగా ఉంటారు. మగాళ్లతో పోలిస్తే కుటుంబం గురించి ఎక్కువగా ఆలోచించేది ఆడవాళ్లే. భర్త పొద్దున్న వెళ్లి సాయంత్రం వస్తాడు. ఈలోపు ఇంట్లో ఎన్ని చక్కబెట్టాలి. ఈ కారణంగా తల్లిగా, భార్యగా అన్నీ తానే అయ్యి ఇంటిని చూసుకుంటుంది. ఒక హోమ్ మినిస్టర్ లా తానే మొత్తం చక్కబెడుతుంది. ఎప్పుడైతే కోడలు వస్తుందో అప్పుడు మొత్తం మారిపోతుంది. అప్పటి వరకూ కొడుకు మీద చూపించిన ప్రేమ.. కోడలి ప్రేమ కంటే తక్కువేమో అన్న అభద్రతా భావంలోకి వెళ్ళిపోతుంది.
ఇన్నాళ్లు అనుభవించిన హోమ్ మినిస్టర్ పదవి కోడలి చేతిలోకి పోతుందేమో అన్న భయం వెంటాడుతుంది. పెత్తనం కోడలికి దక్కకూడదని.. కొడుకుని తన గుప్పిట్లోనే పెట్టుకోవాలని భావిస్తుంది. ఇన్నాళ్లూ కంటికి రెప్పలా కాపాడుకుంటూ వచ్చిన కుటుంబాన్ని కొత్త కోడలు ఏం చేస్తుందన్న భయం నుంచే సాధింపులు పుట్టుకొస్తాయట. ఆర్ధిక లావాదేవీల్లో కూడా కోడలు పెత్తనం చెలాయిస్తే అత్తగారికి ఇష్టముండదు. దుబారా చేస్తుందేమో అన్న భయం ఎక్కువగా ఉంటుందట. కొడుకు సంసారాన్ని నాశనం చేసేస్తుందేమో అన్న భయం వెంటాడుతుందట. కొడుకు తమతో సమయం గడపడం లేదన్న కోపం కూడా ఉంటుందట. అప్పటి వరకూ తమ మాట విని, తమతో అన్నీ షేర్ చేసుకునే కొడుకు.. పెళ్లయ్యాక భార్యతో షేర్ చేసుకోవడం కూడా ఆమెని బాధిస్తుందట. భార్యతోనే ఎక్కువ సమయం గడపడం, తమకు ప్రాధాన్యత ఇవ్వడం లేదని అసూయతో కూడా కోడలిని కొడుకు ముందు బ్యాడ్ చేయాలని చూసే స్థితికి వెళ్తారట.
అప్పటి వరకూ కొడుకు తన మాట వినేవాడు.. పెళ్ళాం వచ్చాక వినడం లేదు అని బాధపడతారట. ఇంకో అసలైన కారణం ఏంటంటే.. చుట్టుపక్కల వాళ్లతో ఫ్రెండ్ షిప్. పక్కింట్లో ఉన్న అత్తగారితో ఈ ఇంటి కోడలు స్నేహం, ఈ ఇంట్లో ఉన్న అత్తగారితో పక్కింటి కోడలు స్నేహం. ఒకరి బలహీనతలు మరొకరికి షేర్ చేసుకుంటారు. అలా అది ఊరంతా పాకుతుంది. అది వాళ్లకు నచ్చదు. అసలు అత్తా, కోడళ్ళు ఇద్దరూ స్నేహంగా మాట్లాడుకుంటే ఏ గొడవలూ ఉండవు. కానీ పక్కింటి వాళ్ళని, ఎదురింటి వాళ్ళని బాగా నమ్ముతారు. వాళ్లలో మంచి వాళ్ళు ఉంటే పోనిలే అండి, కూతురు వయసుదే కదా అని మంచి చెప్పే ప్రయత్నం చేస్తారు. అదే పచ్చని సంసారంలో నిప్పులు పోయాలని చూసే రకం అయితే.. కోడలి గురించి లేనిపోనివన్నీ కలిపి చెప్తారు. అత్తా, కోడళ్ల మధ్య ఇంకా గొడవలు పెంచుతారు. ఏదున్నా ఫేస్ టూ ఫేస్ తేల్చుకుంటే.. పరిష్కారం దొరుకుతుందని చెబుతున్నారు.
మరొక కారణం పొగడ్తలు. ఒకవేళ అత్త గారికి ఒక కూతురు ఉంటే.. ఆ కూతురు తన వంటలని పొగడడం.. తన గురించి గొప్పగా చెప్పుకోవడం, ప్రేమగా మాట్లాడడం వంటివి ఉంటాయి. కోడలు తనను గొప్పగా చూడడం లేదన్న భావనతో కూడా ఉంటుందట. మరొక కారణం ఆధిపత్యం చూపించాలనుకోవడం. ఈ మాహిష్మతి సామ్రాజ్యానికి తానో రాజమాత అన్నట్టు ఫీలవుతుంది. ఇలాంటి సమయంలో దేవసేనలా ఎదురుతిరిగితే వేరే మకాం పెట్టాల్సి వస్తుంది. ఇవన్నీ సరిపోవన్నట్టు ఇంట్లో గొడవలకి సీరియల్స్ లో అత్తాకోడళ్ల గొడవలు ఆద్యం పోస్తాయి. ఇవన్నీ చూసి.. అత్త అంటే కోడలిని సాధించాలి అని సాధిస్తూ ఉంటారు. కొంతమంది తాము కోడలుగా ఉన్నప్పుడు తన అత్తగారు తమని ఎలా సాధించారో.. మేము కూడా మా కోడళ్ళని అలా సాధిస్తామని ఒక సైకలాజికల్ ఫీలింగ్ తో ఉంటారట. మామూలుగా కొంతమందికి కొంతమందిని చూసిన మొదటి నుంచి ఎందుకో మంచి అభిప్రాయం ఉండదు. దీంతో వాళ్ళు మంచి పనులు చేసినా కూడా రుచించదు. సరిగ్గా ఇలానే అత్త గారికి కూడా కోడలు మంచి పనులు చేసినా రుచించదు.
దీనికి తోడు గత కొన్ని దశాబ్దాలుగా అత్తా, కోడళ్లు అంటే ఇండియా-పాకిస్తాన్ అనే భావాన్ని బాగా విస్తృతంగా ప్రచారం చేస్తూ వచ్చారు. దీని ప్రభావం కూడా ఉండి ఉండవచ్చునని నిపుణులు చెబుతారు. చివరాఖరున ఒకే ఇంట్లో ఉన్నా కూడా.. కొడుకు ఒక అద్దె ఇంట్లో ఉన్నట్టు భావించే పరిస్థితి వస్తుంది. ఈ పరిస్థితి వస్తే కనుక ఆ అత్తా, కోడళ్ల పోరాట సన్నివేశాలు పతాక స్థాయిలో ఉంటాయట. విడదీయడం ఎవరి వల్లా కాదు. అత్తాకోడళ్ల గొడవ అనేది యూనివర్సల్ కాన్సెప్ట్. ఈ సమస్య భారతదేశంలోనే కాదు. విదేశాల్లో కూడా ఉంది. 66 శాతం మంది కోడళ్ళు.. అత్త గారి పట్ల జీవితం మొత్తం మీద అసంతృప్తిగా ఉన్నామని, ఒత్తిడికి గురవుతున్నామని స్టడీస్ లో వెల్లడించారు. అదేంటో ఒకప్పుడు కోడలిగా ఉన్న అత్తగారు.. కోడలుగా తాను పడ్డ బాధలన్నీ మర్చిపోయి కోడలిని సాధిస్తుంటుంది. కానీ కొంతమంది అత్తాకోడళ్లు ఉంటారు. సీరియల్స్ లో శత్రువులుగా చూపించినా కూడా తల్లీ, కూతుర్లలా ఉంటారు. అలాంటి వారికి నమస్కరించాలి.
మరి ఈ అత్తా, కోడళ్ల గొడవకి పరిష్కారం లేదా అంటే బేషుగ్గా ఉందని సైకాలజిస్టులు చెబుతున్నారు. చిన్నప్పటి నుంచి పిల్లల్ని పెంచారు. ఒక్కసారిగా తమ చేతుల్లోంచి జారిపోయారు అన్న ఫీలింగ్ ని వారికి కలిగించడం కంటే వారికి నచ్చినట్టే ఉండడం ఉత్తమం అని అంటున్నారు. ఎందుకంటే వారు బతికేది కొంతకాలమే కాబట్టి. ఉన్నన్నాళ్ళు వారిని సంతోష పెడితే అంతకు మించిన ఆనందం ఇంకేముంటుంది చెప్పండి. వాళ్ళు కన్నుమూసిన తర్వాత నచ్చినట్టు జీవించవచ్చు. అప్పుడు అడ్డు చెప్పేవాళ్ళే ఉండరు. అత్తా,కోడళ్ల గొడవని పరిష్కరించే బాధ్యత కొడుకుకే ఉంటుందని చెబుతున్నారు. తల్లిదండ్రుల దగ్గర రహస్యం ఎందుకు. ఆర్ధిక వ్యవహారాలు అయినా సరే కుటుంబమంతా కలిసి చర్చించుకోండి.
కొడుకు, కోడలు తమకి ప్రాధాన్యత ఇస్తున్నారని అనుకుంటారు. ఒప్పుకోకపోతే ఒప్పించండి. అంతేగానీ గొడవ మాత్రం పడకండని సూచిస్తున్నారు. సో అదండీ విషయం.. అత్తాకోడళ్ల గొడవకి కారణం సైకలాజికల్ ప్రాబ్లమ్ ఒకటైతే.. కొడుకు మరొక కారణం. భార్యని కంట్రోల్ లో పెట్టాలా? లేక అమ్మని కంట్రోల్ లో పెట్టాలా? తెలియక నరకం అనుభవిస్తూ గొడవ పెద్దది చేస్తాడట. కంట్రోల్ అన్న పదం పక్కన పెట్టి.. ఒక కొడుకుగా తన కర్తవ్యాన్ని ఎంత వరకూ నెరవేరుస్తున్నాడు, భర్తగా భార్యకి ఎంత ప్రాధాన్యత ఇస్తున్నాడు అనే దాని మీదే ఉంటుందని సైకాలజిస్టులు చెబుతున్నారు. మరి ఈ విషయంపై మీరేమంటారు? అత్తా, కోడళ్ల గొడవలకి మీకు తెలిసిన కారణాలు ఏమైనా ఉన్నాయా? అసలు గొడవ కాకుండా ఉండాలంటే పరిష్కారం ఏమిటో మీకు తెలిస్తే కామెంట్ చేయండి.
