డీజిల్ బైకులు, స్కూటీలు ఎందుకు తయారు చేయరో తెలుసా?

ఎప్పుడు చూడు అవే పెట్రోల్ బైకులు, పెట్రోల్ స్కూటీలు.. ఈ కంపెనీలు డీజిల్ టూవీలర్స్ ని తయారు చేసి చావచ్చు కదా అని ఎప్పుడైనా మీకు అనిపించిందా? ఈ పెట్రోల్ రేట్లు కంటే డీజిల్ రేట్లు తక్కువ ఉంటాయి కాబట్టి డీజిల్ బైక్స్ వస్తే కొనుక్కోవచ్చునని ఎప్పుడైనా అనిపించిందా? డీజిల్ బైక్ అయితే చాలా డబ్బు ఆదా అవుతుంది. ఉదాహరణకు లీటర్ పెట్రోల్ రూ. 110 ఉంటే, డీజిల్ రూ. 98 రూపాయలు ఉంటుంది. లీటర్ మీద రూ. 12 ఆదా అవుతుంది. ఈ లెక్కన 10 లీటర్ల మీద రూ. 120 ఆదా చేసుకోవచ్చు. ఈ ఆదా చేసిన డబ్బుతో ఇంకో లీటర్ పైన డీజిల్ కొట్టించుకోవచ్చు. ఈ పెట్రోల్ భారాన్ని మోయలేకే కొంతమంది ధర ఎక్కువైనా గానీ డీజిల్ కార్లు కొనుక్కుంటున్నారు. కాస్ట్ ఎక్కువ ఉంటుంది కాబట్టే డీజిల్ బైక్స్ ని తయారు చేయడం లేదా అంటే కాదు. దానికి వేరే కారణాలు కూడా ఉన్నాయి. అవేంటో తెలుసుకోండి.

డీజిల్ ఇంజన్ 24:1 కంప్రెషన్ రేషియో కలిగి ఉంటుంది. పెట్రోల్ ఇంజన్ అయితే 11:1 కంప్రెషన్ రేషియో కలిగి ఉంటుంది. పెట్రోల్ ఇంజన్ తో పోలిస్తే డీజిల్ ఇంజన్ చాలా ఎక్కువ. ఈ భారీ కంప్రెషన్ రేషియోని హ్యాండిల్ చేయాలంటే డీజిల్ ఇంజన్ బాహుబలిలో ప్రభాస్ లా మాంచి దిట్టంగా ఉండాలి. పెద్దగా ఉండాలి, అలానే బరువైన మెటల్ తో తయారు చేయాలి. అందుకే డీజిల్ ఇంజన్లు పెట్రోల్ ఇంజన్లతో పోలిస్తే హెవీగా ఉంటాయి. అందుకే ఇవి చిన్న వాహనాల్లో పెట్టడానికి కుదరదు. ఈ అధిక కంప్రెషన్ రేషియో కారణంగా డీజిల్ ఇంజన్లు అధిక వైబ్రేషన్ ని, శబ్దాన్ని ఉత్పత్తి చేస్తాయి. పెట్రోల్ ఇంజన్ తో పోలిస్తే ఇది చాలా ఎక్కువ. బైకుల్లో వాడేవి లైట్ వెయిట్ ఇంజన్లు. వీటికి ఈ వైబ్రేషన్ ని, శబ్దాన్ని తట్టుకునే శక్తి ఉండదు. అందుకే వీటిని తట్టుకునే విధంగా హెవీ మెటల్ తో చేసిన ఇంజన్లను వాడతారు.

పెట్రోల్ ఇంజన్ తో పోలిస్తే డీజిల్ ఇంజన్ ఒక గాలన్ కి 13 శాతం అధిక కార్బన్ డయాక్సయిడ్ ని ఉత్పత్తి చేస్తుంది. దీని వల్ల కాలుష్యం పెరిగిపోతుంది. పెట్రోల్ ఇంజన్లతో పోలిస్తే ఈ కాలుష్యం చాలా ఎక్కువ. అది పర్యావరణానికి అంత మంచిది కాదు. అందుకే బైకులు, స్కూటీల్లో డీజిల్ ఇంజన్లను పెట్టరు. మరి డీజిల్ కార్లు వాడితే నష్టం కదా బోరో అని ఫీలవుతున్నారా? కానీ పెట్రోల్ వాహనాలతో పోలిస్తే డీజిల్ వాహనాలు కొనేవారు చాలా తక్కువ. పైగా బైకులు, స్కూటీలు కొనే సామాన్యులు చాలా మంది ఉన్నారు. ధనవంతులు కూడా కార్లు ఉన్నా బైకులు కొనుక్కుంటారు. వీటిని కనుక డీజిల్ తో తయారు చేస్తే కాలుష్యం మరింత పెరిగిపోతుంది. ప్రతి ఏటా కోటిన్నర ద్విచక్ర వాహనాలు అమ్ముడవుతున్నాయి. ఇవి కనుక డీజిల్ తో చేసిన బండ్లు అయితే ఫలితం ఎంత తీవ్రంగా ఉంటుందో ఆలోచించుకోండి.

ఇక డీజిల్ ఇంజన్లు బైకుల్లో పెట్టకపోవడానికి మరొక కారణం ధర. అధిక కంప్రెషన్ రేషియో, హెవీ ఇంజన్ కారణంగా డీజిల్ ఇంజన్ ధర పెట్రోల్ ఇంజన్ కంటే ఎక్కువగా ఉంటుంది. రెండిటికీ రూ. 50 వేలు వ్యత్యాసం ఉంటుంది. రెండు చక్రాల బండ్లకు ఇది సూటవ్వదు. ఇప్పటికే ఒక బైక్ కి లక్ష రూపాయలు అవసరమా అని ఆలోచిస్తున్నారు చాలా మంది. అటువంటి సమయంలో డీజిల్ బైక్ కి 50 వేలు ఎగస్ట్రా పెట్టడం అంటే ఆమ్మో ఒకటో తారీఖు గుర్తొస్తుంది. దీని కంటే ఎలక్ట్రిక్ వాహనం కొనుక్కోవడం నయం అనిపిస్తుంది. ఎందుకంటే పెట్రోల్ భారం కూడా ఉండదు. అప్పుడు పెట్రోల్ బైకుల సేల్స్, పెట్రోల్ బంకుల బిజినెస్ దెబ్బ తింటుంది. డీజిల్ బైక్ కోరుకోవడం వల్ల ఇంత అనర్థం అవసరమంటారా?

అధిక ఒత్తిడితో డీజిల్ ఇంజన్ పని చేస్తుంది. ఈ కారణంగా డీజిల్ ఇంజన్ సతాయిస్తూ ఉంటుంది. ప్రతీ 5 వేల కిలోమీటర్లకు ఒకసారి ఇంజన్ ఆయిల్ మార్చాల్సి ఉంటుంది. అదే పెట్రోల్ బైక్ అయితే 10 వేల కిలోమీటర్లకు ఒకసారి మారిస్తే సరిపోతుంది. డీజిల్ ఇంజన్లు పెట్రోల్ ఇంజన్లతో పోలిస్తే ఎక్కువ టార్క్ ని ఉత్పత్తి చేస్తాయి. అలానే తక్కువ ఆర్పీఎం ని కలిగి ఉంటాయి. బైకుల్లో ఎక్కువ వేగంతో వెళ్లాలంటే ఈ టార్క్, ఆర్పీఎం సరిపోవు. డీజిల్ ఇంజన్లు ఒక గాలన్ కి అధిక శక్తిని ఉత్పత్తి చేస్తాయి. పెట్రోల్ ఇంజన్ తో పోలిస్తే ఇది చాలా ఎక్కువ. డీజిల్ బర్న్ అయితే అధిక వేడి ఉత్పత్తి అయ్యి సిలిండర్ గోడలను మరియు ఇతర భాగాలను డ్యామేజ్ చేస్తుంది. ఈ వేడి తక్కువగా ఉంటే బైక్ భాగాలు కూల్ గా ఉంటాయి. దీని కోసం డీజిల్ ఇంజన్లను కొంచెం పెద్ద పరిమాణంలో తయారు చేస్తారు. డీజిల్ ఇంజన్ లో సిలిండర్ లోకి గాలి పంప్ చేయడం కోసం టర్బో ఛార్జర్ లేదా సూపర్ ఛార్జర్ ని వాడాల్సి ఉంటుంది. దీని వల్ల పరిమాణం, ధర పెరిగిపోతుంది.

డీజిల్ ఇంజన్లలో కంబశ్చన్ ఛాంబర్ లో ఫ్యూయల్ ని ఇంజెక్ట్ చేయడానికి ఫ్యూయల్ ఇంజెక్టర్ టెక్నాలజీని వాడతారు. ఇది పెట్రోల్ ఇంజన్ లో వాడే స్పార్క్ ప్లగ్ టెక్నాలజీ కంటే చాలా ఎక్కువ ధర ఉంటుంది. పెట్రోల్ ఇంజన్ తో పోలిస్తే డీజిల్ ఇంజన్ చాలా పెద్దగా ఉంటుంది. అలానే ఇంజన్ ని స్టార్ట్ చేయడానికి మోటార్ కి చాలా పవర్ కావాల్సి ఉంటుంది. ఇది ద్విచక్రవాహనాలకు సూటవ్వదు. ఇన్ని దుష్ప్రయోజనాలు ఉన్న కారణంగానే డీజిల్ బైక్స్ ని తయారు చేయడం లేదు. కానీ రాయల్ ఎన్ఫీల్డ్ కంపెనీ 1990స్ లో డీజిల్ ఇంజన్ బైకులను ఉత్పత్తి చేసింది. కానీ ఉద్గార నిబంధనల కారణంగా 2000 సంవత్సరంలో ఉత్పత్తిని నిలిపివేసింది. పర్యావరణం ఏమైపోయినా పర్లేదు అనుకుంటే కనుక కంపెనీలు భవిష్యత్తులో డీజిల్ బైకులను, డీజిల్ స్కూటీలను తయారు చేస్తాయేమో చూడాలి. మరి మీకేమనిపిస్తుంది. డీజిల్ బైకులు వస్తే బాగుంటుందనిపిస్తుందా? లేక రాకపోతే బాగుంటుందనిపిస్తుందా? మీ అభిప్రాయమేమిటో కామెంట్ చేయండి.