పెరిగిన ప్రయాణికుల రద్దీ.. మెట్రో కీలక నిర్ణయం! ఇకపై వెయిటింగ్ అక్కర్లేదు!

ఉభయ తెలుగు రాష్ట్రాల్లో ఎండలు మండిపోతున్నాయి. భానుడి భగభగలకు బయటకు వెళ్లాలంటే ప్రజలు భయపడిపోతున్నారు. హైదరాబాద్​లోనూ ఇదే పరిస్థితి. భాగ్యనగరంలో ఎండలను తట్టుకోలేక ప్రయాణికులు మెట్రోలను ఆశ్రయిస్తున్నారు. మెట్రోల్లో ఏసీ ఉంటుంది. కాబట్టి కూల్​ కూల్​గా ప్రయాణించేందుకు వాటిని ఎంచుకుంటున్నారు. దీంతో మెట్రోల్లో రద్దీ బాగా పెరిగింది. నగరంలోని ఏ మెట్రో స్టేషన్​లో చూసినా కాలు పెట్టడానికి సందు లేని పరిస్థితి. దీంతో హైదరాబాద్ మెట్రో రైల్ ఎల్ అండ్ టీ ప్రత్యేక చర్యలు చేపట్టింది. ప్రయాణికుల రద్దీని దృష్టిలో ఉంచుకొని షార్ట్​లూప్ ట్రిప్పులను అందుబాటులోకి తీసుకొచ్చింది.

ఉదయం, సాయంత్రం నడిచే ఈ షార్ట్​లూప్ ట్రిప్పుల వల్ల ప్రయాణికులు ఎక్కువ సమయం వేచి ఉండాల్సిన అవసరం ఉండదు. ప్రయాణికుల రద్దీని ఎప్పటికప్పుడు నియంత్రించేందుకు అవకాశం ఏర్పడుతుందని అధికారులు తెలిపారు. అమీర్​పేట్ నుంచి రాయదుర్గం వెళ్లాల్సిన రూట్​లో ప్రయాణికులు ఇకపై నాగోల్ నుంచి వచ్చే రైళ్ల కోసం ఎదురు చూడాల్సిన అవసరం ఉండదు. ఈ రూట్​లో షార్ట్ ట్రిప్పులు ఉంటాయి. అమీర్​పేట్, సికింద్రాబాద్, మెట్టుగూడ మెట్రో స్టేషన్ల నుంచి షార్ట్ లూప్ ట్రైన్స్​ను నడుపుతారు. నాన్ పీక్ అవర్స్​లో ఇప్పటిదాకా ఉదయం 11 నుంచి సాయంత్రం 5 గంటల వరకు ప్రతి 7 నిమిషాలకు ఒక ట్రైన్ వచ్చేది. దానిని తాజాగా 4 నిమిషాల 30 సెకన్లకు తగ్గించారు. ఇక రద్దీని నియంత్రించడానికి అన్ని ప్రధాన స్టేషన్లలో మహిళా గార్డులతో సహా సిబ్బందిని పెంచారు.