‘ట్రెక్కింగ్ లవర్స్’ కు గుడ్ న్యూస్.. సిటీ దగ్గరలోనే సూపర్ లొకేషన్స్

సామాన్యంగా విహారయాత్రలంటే ఇష్టపడని వారుండరు. అలా యాత్రలపై మక్కువతో దగ్గరలోని చుట్టూ పక్కల ప్రదేశాలను కాదని పొరుగు రాష్ట్రాలకు, దేశాలకు పరిగెడుతుంటారు జనాలు. మనకు అందుబాటు దూరంలో హైదరాబాద్ చుట్టూ ఎన్నో అద్భుతమైన కట్టడాలు – అందమైన యాత్రాస్థలాలు ఉన్నాయి. అదీగాక టూర్స్ కోసం మాత్రమే కాదండోయ్.. ట్రెక్కింగ్ ఇష్టపడే వారు ఇండియాలో ఎక్కువగా ఉత్తర రాష్ట్రాలపై పయనమవుతుంటారు. కానీ సరిగ్గా గమనిస్తే హైదరాబాద్ చుట్టూనే ఎన్నో ట్రెక్కింగ్ ప్లేసెస్ ఉన్నాయని అర్ధమవుతుంది. మరి ఆ ప్లేసెస్ ఏంటో ఓ లుకేద్దాం!

అనంతగిరి హిల్స్: వికారాబాద్‌ జిల్లాలో ఉన్నటువంటి అనంతగిరి హిల్స్.. ప్రకృతి ప్రేమికులకు విశేషంగా ఆకట్టుకుంటుంది. హైదరబాద్‌కు కేవలం 80 కిలోమీటర్ల దూరంలో ఉన్న ఈ పచ్చని కొండ ప్రాంతం ప్రస్తుతం ట్రెక్కింగ్ లవర్స్ కి హాట్ స్పాట్ గా మారింది. ఇక్కడికి అన్నివిధాలా ప్రయాణ సౌకర్యం ఉండటంతో ఈ మధ్య యాత్రికుల సంఖ్య పెరుగుతోంది.

భువనగిరి ఫోర్ట్: యాదాద్రి భువనగిరి జిల్లాలో ఉన్న పాపులర్ టూరిజం స్పాట్ భువనగిరి కోట. హైదరాబాద్‌కు 100 కిలో మీటర్ల దూరంలో ఉన్నటువంటి ఈ పురాతన కట్టడం 610 మీటర్ల ఎత్తైన ఏకశిల రాతి పై నిర్మితమైందని చెబుతుంటారు. దాదాపుగా 40 ఎకరాల మేరా విస్తరించి ఉన్న ఈ కొండ ప్రాంతం ట్రెక్కింగ్‌ ప్రేమికులకు చాలా అనుకూలంగా ఉంటుంది. ట్రెక్కింగ్ ఇష్టపడేవారు ఇక్కడికి వెళ్ళవచ్చు.

దేవరకొండ కోట: హైదరాబాద్ కు 100 కిలోమీటర్ల దూరంలో ఉన్నటువంటి దేవరకొండ కోట ఎంతో ప్రాచీన సంతతిని కలిగిఉంది. సుమారు ఈ దేవరకొండ కోటను 13వ శతాబ్ధంలో నిర్మించినట్లు సమాచారం. ఈ కోటను కొండ ప్రాంతం పై కట్టడంతో ప్రస్తుతం ట్రెక్కింగ్ లవర్స్ కి వీలుగా మారింది.

రాచకొండ కోట: హైదరాబాద్ పరిసరాల్లో నేచర్ లవర్స్ ని బాగా ఆకర్షిస్తుంది ఈ రాచకొండ కోట. నగరానికి కేవలం 55 కిలోమీటర్స్ దూరంలో ఉండటంతో పర్వతారోహకులు వెళ్లి ట్రెక్కింగ్ చేయడానికి అనుకూలంగా ఉన్నట్లు తెలుస్తుంది.