సచిన్ నన్ను బ్యాట్​తో కొట్టాడు.. పిచ్చోడ్ని చేస్తావా అంటూ సీరియస్ అయ్యాడు: సెహ్వాగ్

భారత క్రికెట్​లో డాషింగ్ బ్యాట్స్​మన్ అంటే అందరికీ గుర్తుకొచ్చేది వీరేంద్ర సెహ్వాగ్. ఏ బౌలర్, ఏ ఫార్మాట్, ఎక్కడ ఆడుతున్నాం అనేది పట్టించుకోకుండా చెలరేగడం వీరేంద్రుడికి వెన్నతో పెట్టిన విద్య. మహామహా బౌలర్లను కూడా తన బ్యాటింగ్ విధ్వంసంతో ఊచకోత కోశాడతడు. సాధారణంగా ఏ బ్యాట్స్​మన్ అయినా సెంచరీకి చేరువైతే మెళ్లిగా ఆడతాడు. కానీ వీరూ మాత్రం శతకానికి చేరువైనా హిట్టింగ్ ఆపడు. ఫోర్ లేదా సిక్స్ కొట్టి సెంచరీని పూర్తి చేసుకుంటాడు. మాస్టర్ బ్లాస్టర్ సచిన్ టెండూల్కర్​ను ఆదర్శంగా తీసుకుని టీమిండియాలోకి అడుగు పెట్టిన సెహ్వాగ్.. తన ఆరాధ్య క్రికెట్ దైవంతో కలసి ఓపెనింగ్ స్థానాన్ని పంచుకున్నాడు. సచిన్​తో కలసి భారత జట్టుకు ఎన్నో చిరస్మరణీయ విజయాలను అందించాడు.

సొంతగడ్డ మీద 2011 వన్డే వరల్డ్​ కప్​ను భారత్ సొంతం చేసుకోవడంలోనూ సచిన్​-సెహ్వాగ్​లు కీలక పాత్ర పోషించారు. మైదానంతో పాటు బయట కూడా వీళ్లిద్దరూ మంచి స్నేహితులు. ఈ విషయం అనేక సందర్భాల్లో రుజువైంది. అయితే, 2011 వన్డే ప్రపంచ కప్ సందర్భంగా సచిన్​తో జరిగిన ఒక సరదా సంఘటనను వీరూ స్టార్ స్పోర్ట్స్ వేదికగా ఫ్యాన్స్​తో పంచుకున్నాడు. బ్యాటింగ్ చేసే సమయంలో పాటలు పాడటం సెహ్వాగ్​కు అలవాటు. అయితే ఆ ప్రపంచ కప్​లో ఈ అలవాటు సచిన్​కు చిరాకు తెప్పించిందట. అంతేకాకుండా మాస్టర్ బ్యాట్​తో తనను సరదాగా కొట్టాడని వీరూ చెప్పుకొచ్చాడు.

‘మేం 2011 వన్డే ప్రపంచకప్​లో సౌతాఫ్రికాతో మ్యాచ్ ఆడుతున్నాం. నేను బ్యాటింగ్ చేస్తూ యథాలాపంగా పాటలు పాడుతున్నాను. ఈ సమయంలో సచిన్ టెండూల్కర్ కూడా మంచి టచ్​లో బ్యాటింగ్ చేస్తున్నాడు. సచిన్​కు ఓవర్ల మధ్య మాట్లాడే అలవాటు ఉంది. కానీ నేను మాత్రం అస్సలు మాట్లాడను. నేను ఏకాగ్రత పొందేందుకు పాటలు పాడుతూ ఉంటాను. అలా ఫస్ట్ మూడు ఓవర్ల పాటు జరిగింది. నాలుగో ఓవర్ తర్వాత మాస్టర్ నా వెనుక నుంచి వచ్చి నన్ను తన బ్యాట్​తో సరదాగా కొట్టాడు. నువ్విలా కిషోర్ కుమార్​లా పాటలు పాడుతూ ఉంటే నేను పిచ్చివాడ్ని అయిపోతానని చెప్పాడు’ అని సెహ్వాగ్ పేర్కొన్నాడు. కాగా, సౌతాఫ్రికాతో జరిగిన ఆ మ్యాచ్​లో వీరూ-సచిన్​లు తొలి వికెట్​కు 142 రన్స్ భారీ భాగస్వామ్యం నెలకొల్పారు. అయితే ఈ మ్యాచ్​లో టీమిండియా అనూహ్యంగా ఓటమిపాలైంది.

A never-heard-before story from Sehwag#Sehwag #Tendulkar #SachinTendulkar #TeamIndia https://t.co/B8Qy9hoikD

— HT Sports (@HTSportsNews) April 12, 2023

ఈరోజు ఏపీ, తెలంగాణకు సంబంధించిన లేటెస్ట్ న్యూస్.. జాతీయ, అంతర్జాతీయ వార్తలు.. ఎడ్యుకేషన్, బిజినెస్, సినిమా, స్పోర్ట్స్, టెక్ అప్డేట్స్.. ఆధ్యాత్మిక, ఆరోగ్య సమాచారంతో పాటు, వైరల్ కథనాల కోసం సుమన్ టీవీ యాప్‌ను డౌన్‌లోడ్ చేసుకోండి.