బీజెపీ ఎంపీ వేధిస్తున్నారంటూ రోడ్డెక్కిన రెజ్లర్లు

స్టార్ రెజర్లు, కామన్ వెల్త్ గేమ్స్, ఒలంపిక్స్ పతాక విజేతలు వినేశ్ ఫొగాట్, బజరంగ్ పునియా, సాక్షి మాలిక్ తో పాటు మరో 30 మంది కుస్తీ వీరులు బుధవారం ధర్నాకు దిగారు. రెజ్లింగ్ ఫెడరేషన్ ఆఫ్ ఇండియా అధ్యక్షుడు, బీజెపీ ఎంపీ బ్రిజ్ భూషణ్ శరణ్ సింగ్ తమను శారీరకంగా, మానసికంగా హింసిస్తున్నారంటూ ఢిల్లీలోని జంతర్ మంతర్ దగ్గర నాలుగు గంటల పాటు నిరసన చేపట్టారు. ఈ ధర్నా ప్రభుత్వానికి, స్పోర్ట్స్ అథారిటీకి వ్యతిరేకంగా కాదని వారు స్పష్టం చేశారు. ఈ ఏడాది ప్రతిష్టాత్మక ఆసియా క్రీడల్లో పాల్గొనాల్సిన రెజ్లర్లు, ఇప్పుడు రోడ్డునెక్కడం సర్వత్రా చర్చనీయాంశమౌతోంది.

ఉత్తరప్రదేశ్ లోని కైసర్గంజ్ బీజెపీ ఎంపి అయిన బ్రిజ్ భూషణ్ శరణ్ సింగ్, కోచ్ లపై వినేశ్ ఫొగాట్ తీవ్ర ఆరోపణలు చేశారు. వీరు మహిళా రెజ్లర్లను లైంగికంగా వేధిస్తున్నారని ఆవేదన వ్యక్తం చేశారు. తనను ఎందుకూ పనికి రావని ఘోరంగా తిట్టారని, ఎంతో మానసిక క్షోభకు గురయ్యానని చెప్పారు. గతంలో ఆయనపై ఫిర్యాదు చేస్తే బెదిరింపులు వచ్చాయని అన్నారు. చేసేదీ లేక తాను ఆత్మహత్య చేసుకోవాలని భావించినట్లు తెలిపారు. ఈ ఆందోళనల్లో బజరంగ్ పునియా, సాక్షి మాలిక్ తో పాటు సరితా మోర్, సంగీత ఫొగాట్, సత్యవర్ట్ మాలిక్, జితేందర్ కిన్హా, సుమిత్ మాలిక్ తో పాటు 30 మంది రెజ్లర్లు పాల్గొన్నారు.

బ్రిజ్ భూషణ్ ను అధ్యక్ష పదవి నుండి తొలగించాలని డిమాండ్ చేశారు. అప్పటి వరకు తాము ఎటువంటి క్రీడల్లోనూ పాల్గొనబోమని తేల్చి చెప్పారు. వీరిని తొలగించి, కొత్త కోచ్ లు, ఫిజియోలను నియమించాలని, శిక్షణా కేంద్రాన్ని ఢిల్లీకి తరలించాలని డిమాండ్ చేశారు. బ్రిజ్ 2011 నుండి ఈ పదవిలో ఉన్నారు. 2019లో మూడవసారి స్పోర్ట్ అథారిటీకి అధ్యక్షుడిగా ఎన్నికయ్యారు. రెజ్లర్ల ఆందోళనలపై కేంద్రం స్పందించింది. ఈ ఘటనపై 72 గంటల్లోగా వివరణ ఇవ్వాలని క్రీడా మంత్రిత్వ శాఖ రెజ్లింగ్ ఫెడరేషన్ ను కోరింది. ఈ విషయం క్రీడాకారుల సంక్షేమానికి సంబంధించినదని, కాబట్టి ఈ విషయాన్ని సీరియస్ గా తీసుకున్నట్లు మంత్రిత్వ శాఖ లేఖలో పేర్కొంది. 72 గంటల్లోగా సమాధానం ఇవ్వకపోతే జాతీయ క్రీడా అభివృద్ధి కోడ్ 2011 ప్రకారం కఠిన చర్యలు తీసుకుంటామని హెచ్చరించింది. దీనితో పాటు, లక్నోలో ప్రారంభమైన మహిళల కోచింగ్ క్యాంపును రద్దు చేసినట్లు ప్రకటించింది.

#Jantar mantar pic.twitter.com/calKOipydH

— Bajrang Punia 🇮🇳 (@BajrangPunia) January 18, 2023

#Jantarmantar pic.twitter.com/Q9otWpXoLw

— Vinesh Phogat (@Phogat_Vinesh) January 18, 2023