follow us:
వచ్చినమా.. దంచినమా.. అనే మైండ్‌ సెట్‌తో బ్యాటింగ్‌ చేసే ప్లేయర్‌ అఫ్రిదీ. ఈ టుకూ..టుకూ.. ఆట అతనికి తెలియదు. ఫస్ట్‌ బాలైనా.. లాస్ట్‌ బాలైనా సిక్స్‌ కొట్టేందుకే చూసే స్పెషల్‌ బ్యాటర్‌. ప్రపంచ క్రికెట్‌లో విధ్వంసకర బ్యాటర్లుగా పేరుగాంచిన ఏబీ డివిలియర్స్‌, వీరేంద్ర సెహ్వాగ్‌ కంటే ముందే వీరబాదుడికి బ్రాండ్‌ అంబాసిడర్‌గా ఉన్నాడీ పాక్‌ మాజీ కెప్టెన్‌ షాహిద్‌ అఫ్రిదీ. వన్డే క్రికెట్‌లో ఒక జట్టు 250 పరుగులు చేస్తే.. భారీ స్కోర్‌గా, ఒక ఆటగాడు 100, 120 బంతుల్లో సెంచరీ చేస్తే వేగవంతమైన ఇన్నింగ్స్‌గా పరిగణిస్తున్న రోజుల్లో.. ఒక తుఫాన్‌ ఇన్నింగ్స్‌ అంటే ఏంటో? అది ఎలా ఉంటుందో? ప్రపంచ క్రికెట్‌కు చూపించాడు. 1996లో శ్రీలంక బౌలర్లను చీల్చి చెండాడి.. అప్పటి వరకూ కనీవిని ఎరుగని రీతిలో కేవలం 37 బంతుల్లోనే సెంచరీ చేసి సంచలనం సృష్టించాడు.
వన్డేల్లో ఇలాంటి ఇన్నింగ్స్‌ ఆడటం సాధ్యమేనా అనే అనుమానం కలిగేలా ప్రపంచ క్రికెట్‌ లోకం నివ్వెర పోయేలా చేశాడు. ఒకటి కాదు.. రెండు కాదు.. ఏకంగా 11 సిక్సులతో లంక బౌలింగ్‌ ఎటాక్‌ను తుంతునియలు చేశాడు. బౌండరీ లైన్‌ తన బ్యాట్‌ పక్కనే ఉందా అన్నట్లు.. అతని బ్యాట్‌కు బంతి తగిలితే అది బౌండరీ అవతలే పడింది. అంతర్జాతీయ క్రికెట్‌లో రెండో మ్యాచ్‌ ఆడుతున్న నునూగు మీసాల కుర్రాడు ఆడిన ఈ ఇన్నింగ్స్‌కు శ్రీలంకతో పాటు ప్రపంచ క్రికెట్‌ ఉలిక్కిపడింది. ఒక మెరుపులా మెరిసిన ఆ ఇన్నింగ్స్‌ చాలా ఏళ్లపాటు ఒక చెదరని రికార్డుగా నిలిచిపోయింది. అఫ్రిదీ సృష్టించిన ఈ విధ్వంసానికి నేటితో సరిగ్గా 26 ఏళ్లు.
1996 అక్టోబర్‌ 4న పాకిస్థాన్‌-శ్రీలంక మధ్య జరిగిన వన్డే మ్యాచ్‌లో అఫ్రిదీ అనే 17 ఏళ్ల కుర్రాడు ఈ విధ్వంసం సృష్టించాడు. 40 బంతుల్లో 6 ఫోర్లు, 11 సిక్సులతో 102 పరుగులు చేశాడు. 37 బంతుల్లోనే సెంచరీ మార్క్‌ను చేరుకుని.. వన్డే క్రికెట్‌లో ఫాస్టెస్ట్‌ సెంచరీతో కొత్త చరిత్ర లిఖించాడు. ఆ మ్యాచ్‌లో అఫ్రిదీతో పాటు అప్పటి పాక్‌ కెప్టెన్‌ సయీద్‌ అన్వర్‌ కూడా సెంచరీ చేయడంతో పాక్‌ 371 పరుగుల భారీ స్కోర్‌ సాధించింది. బదులుగా శ్రీలంక 49.5 ఓవర్లలో 289 పరుగులు చేసి ఆలౌట్‌ అయింది. వన్‌డౌన్‌లో వచ్చి ఫోర్లు, సిక్సుల వర్షం కురిపిస్తున్న అఫ్రిదీని డిసిల్వా అవుట్‌ చేయడంతో లంకేయులు ఊపిరి పీల్చుకున్నారు. లేదంటే ఆ విధ్వంసం మరింత కొనసాగేది. ఇందులో విశేషం ఏమిటంటే.. ఆ మ్యాచ్‌లో అఫ్రిదీ ఆడింది సచిన్‌ బ్యాట్‌తోనే. తన వద్ద ఉన్న సచిన్‌ బ్యాట్‌ను వకార్‌ యూనిస్‌ అఫ్రిదీకి ఇవ్వడం.. అదే బ్యాట్‌తో ఆడిన అఫ్రిదీ.. అద్భుతం సృష్టించడం అలా అలా జరిగిపోయాయి.
#OnThisDay 1996. The day Shahid Afridi smashed 11 sixes and took only 37 balls to reach a ODI century #Cricket pic.twitter.com/jQCusfIf6w
— Saj Sadiq (@SajSadiqCricket) October 4, 2019
On this day in 1996, a young Shahid Afridi made jaws drop with a 37-ball century – a record that stood for 17 years 💪💪
Can you name the two batters who broke this record later? 🧐
— Cricbuzz (@cricbuzz) October 4, 2022
ఇది కూడా చదవండి: కోహ్లీ, రోహిత్‌, రాహుల్‌ కోసం ద్రవిడ్‌ మాస్టర్‌ ప్లాన్‌! షాహీన్‌ అఫ్రిదీకి ఇక చుక్కలే
