కెప్టెన్సీ నుంచి తప్పుకోనున్న రోహిత్? కొత్త సారథి విషయంలో బీసీసీఐ ప్లాన్ అదేనా..!

ప్రపంచ టెస్ట్ ఛాంపియన్​షిప్​ ఫైనల్​లో ఓటమితో భారత క్రికెట్ జట్టుపై పెద్ద ఎత్తున విమర్శలు వస్తున్నాయి. ప్రతిష్టాత్మక మ్యాచ్​లో టీమిండియా ఓటమికి ఐపీఎల్ కారణమని.. లీగ్​లో ఆడిన ప్లేయర్లు అలసిపోయారని అంటున్నారు. రెస్ట్ తీసుకోకుండా నేరుగా వచ్చి డబ్ల్యూటీసీ ఫైనల్​లో ఆడటం భారత అవకాశాలను దెబ్బతీసిందని క్రికెట్ అనలిస్టులు చెబుతున్నారు. అదే సమయంలో కీలక మ్యాచ్​లో భారత టీమ్ సెలక్షన్ సరిగ్గా లేదని అంటున్నారు. అలాగే కెప్టెన్ రోహిత్ శర్మ సారథ్యం పైనా విమర్శలు వినిపిస్తున్నాయి. సరైన జట్టును ఎంచుకోవడంలోనూ, సారథిగా దూకుడుగా వ్యవహరించడంలోనూ, సరైన టైమ్​లో సరైన నిర్ణయాలు తీసుకోవడంలోనూ అతడు ఫెయిల్ అయ్యాడని అంటున్నారు. ఇలా ఒక్క ఓటమితో రోహిత్​పై అన్ని వైపుల నుంచి విమర్శలు వస్తున్నాయి. ఈ ఓటమి ప్రభావం జట్టుపై గట్టిగానే పడేలా ఉంది.

టెస్ట్ టీమ్​లో కీలక మార్పులు జరిగే సూచనలు కనిపిస్తున్నాయి. ఛటేశ్వర్ పుజారా లాంటి సీనియర్ ప్లేయర్​ను పూర్తిగా పక్కనపెట్టే ఛాన్స్ ఉందని అనలిస్టులు అంటున్నారు. అలాగే బోర్డర్ గవాస్కర్ ట్రోఫీతో పాటు డబ్ల్యూటీసీ ఫైనల్​లోనూ అవకాశం ఇచ్చినా ఆకట్టుకోని కీపర్ కేఎస్​ భరత్​ను కూడా దూరం పెడతారని కామెంట్లు వినిపిస్తున్నాయి. వీరి స్థానంలో త్వరలో జరిగే వెస్డిండీస్ సిరీస్​లో రుతురాజ్ గైక్వాడ్, యశస్వీ జైస్వాల్, రింకూ సింగ్ లాంటి యువ ప్రతిభావంతులకు ఛాన్స్ ఇస్తారని క్రికెట్ విశ్లేషకులు అంటున్నారు. విండీస్ సిరీస్​ టెస్ట్ కెప్టెన్​గా రోహిత్ శర్మకు చివరిది కానుందని వార్తలు వస్తున్నాయి. 36 ఏళ్ల హిట్​మ్యాన్.. ఇక టెస్టు సారథిగా ఎక్కువ కాలం కొనసాగే ఛాన్స్ లేదనే చర్చ సాగుతోంది. రోహిత్​ శర్మను వెంటనే కెప్టెన్​గా తొలగించకపోయినా డబ్ల్యూటీసీ సైకిల్ (2023-25) ముగిసేంత వరకు అతడే సారథిగా ఉంటాడని చెప్పడం సందేహమే.

ఈ మధ్య బ్యాటింగ్​లోనూ ఫెయిలవుతున్న హిట్​మ్యాన్.. విండీస్​తో సిరీస్​లో ఎలా ఆడతాడనేది కీలకంగా మారనుంది. దీన్ని బట్టి శివ్​సుందర్ దాస్ నేతృత్వంలోని సెలెక్షన్ కమిటీ ఏ నిర్ణయమైనా తీసుకుంటుందని తెలుస్తోంది. కరీబియన్ సిరీస్ తర్వాత డిసెంబర్ వరకు టెస్టులు లేవు కాబట్టి టీమిండియా కెప్టెన్సీ మార్పుపై చర్చించేందుకు సెలెక్షన్ కమిటీకి కావాల్సినంత టైమ్ దొరుకుతుంది. కొత్త కెప్టెన్​ను ఎంచుకోవాలంటే అందులో సెలెక్షన్ కమిటీతో పాటు భారత హెడ్ కోచ్ రాహుల్ ద్రావిడ్, ప్రస్తుత సారథి రోహిత్​ శర్మ కూడా కీలక పాత్ర పోషిస్తారు. నంబర్ వన్ టెస్ట్ బౌలర్ రవిచంద్రన్ అశ్విన్​తో పాటు ఆల్​రౌండర్ రవీంద్ర జడేజాలను ఫ్యూచర్ కెప్టెన్​లుగా బీసీసీఐ భావిస్తోందని సమాచారం. అయితే వీరికి కూడా 35 ఏళ్లు దాటుతుండటంతో.. శుబ్​మన్ గిల్, కేఎల్ రాహుల్ లాంటి యంగ్ ప్లేయర్ల వైపు భారత క్రికెట్ బోర్డు చూస్తోందని తెలుస్తోంది.