ధోనీపై మరోసారి గంభీర్ విమర్శలు.. అతడ్ని వాళ్లే హీరోను చేశారంటూ..!

భారత క్రికెట్ చరిత్రలో బెస్ట్ కెప్టెన్​గా మహేంద్ర సింగ్​ ధోనీని చెప్పొచ్చు. ఆ మాటకొస్తే.. వరల్డ్ క్రికెట్​లో అత్యుత్తమ సారథుల లిస్టులో ధోని కూడా ఉంటాడు. క్రికెట్​లో ధోని పట్టిందల్లా బంగారమని అనొచ్చు. ఇది చాలా సార్లు ప్రూవ్ అయింది కూడా. సారథిగా భారత జట్టుకు టీ20, వన్డే వరల్డ్ కప్​లతో పాటు ఛాంపియన్స్ ట్రోఫీని అందించాడు మాహీ. అలాగే టెస్టుల్లో టీమిండియాను నంబర్ వన్ ప్లేసుకు చేర్చాడు. ఇక, ఇండియన్ ప్రీమియర్ లీగ్​లోనూ చెన్నై సూపర్ కింగ్స్​కు ఐదు సార్లు టైటిల్ అందించాడు. ఐపీఎల్ పదహారో సీజన్​లోనూ సీఎస్​కే కప్ గెలవడంలో సారథిగా ఎంతో కృషి చేశాడు ధోని. మాహీని ఎందరు మెచ్చుకున్నా టీమిండియా మాజీ ఓపెనర్ గౌతం గంభీర్ మాత్రం అతడిపై అడపాదడపా విమర్శలు చేస్తూనే ఉంటాడు. మరోసారి ధోనీపై అక్కసు వెళ్లగక్కాడు గౌతీ. అయితే ఈసారి అతడు చేసిన కామెంట్స్​ కాస్త ఆలోచించదగ్గవనే చెప్పాలి.

ఇంతకీ గంభీర్ ఏమన్నాడంటే.. ‘ఐసీసీ టోర్నీల్లో భారత్ వరుస వైఫల్యాలకు కారణం మనం వ్యక్తిగత ప్రదర్శనలకు ఇచ్చిన ప్రాధాన్యం టీమ్ పెర్ఫార్మెన్స్​కు ఇవ్వకపోవడమే. ఇంగ్లండ్, ఆస్ట్రేలియా, న్యూజిలాండ్ లాంటి జట్లు సమష్టి ప్రదర్శనకు పెద్దపీట వేస్తాయి. 2007 టీ20 వరల్డ్ కప్, 2011 వన్డే వరల్డ్ కప్​లో ఇండియా విజేతగా నిలిచిందంటే అందుకు ఆల్​రౌండర్ యువరాజ్ సింగ్ ప్రధాన కారణం. ఆ రెండు టోర్నీల్లోనూ యువీనే టీమ్​ను ఫైనల్​కు చేర్చాడు. కానీ పీఆర్ ఏజెన్సీలు మాత్రం ధోనీని హీరోను చేసేశాయి’ అని గంభీర్ చెప్పుకొచ్చాడు. వరల్డ్ టెస్ట్ ఛాంపియన్​షిప్​ ఫైనల్​లో ఆస్ట్రేలియా చేతిలో భారత్ ఓడిన నేపథ్యంలో.. ఐసీసీ టోర్నమెంట్లలో గెలవడం ధోనీకే సాధ్యం అన్నట్లు అందరూ అతడ్ని పొగుడుతున్నారు. ఈ నేపథ్యంలో గంభీర్ పైవిధంగా స్పందించాడు. ధోని విషయంలో గంభీర్ చేసిన వ్యాఖ్యలపై మీ అభిప్రాయాలను కామెంట్ల రూపంలో తెలియజేయండి.