మంచి మనసును చాటుకున్న కేఎల్ రాహుల్.. విద్యార్థి కోసం..!

టీమిండియా సీనియర్ బ్యాటర్ కేఎల్ రాహుల్ గురించి ప్రత్యేకంగా పరిచయం అక్కర్లేదు. అనతి కాలంలోనే భారత జట్టులో కీలక ప్లేయర్​గా ఎదిగాడు రాహుల్. బ్యాటింగ్​తో పాటు కీపింగ్​లోనూ రాణిస్తూ టీమ్ సక్సెస్​లో తనదైన పాత్ర పోషిస్తున్నాడు. అయితే కొంతకాలంగా మాత్రం రాహుల్ తరచూ ఫెయిల్ అవుతున్నాడు. ఇంటర్నేషనల్ క్రికెట్​తో పాటు ఈ ఏడాది జరిగిన ఐపీఎల్​లోనూ రాహుల్ అంతగా ఆకట్టుకోలేదు. ఇక, ఐపీఎల్​లో ఆడుతూ గాయమవ్వడంతో అతడు టోర్నీకి దూరమయ్యాడు. ఇంజ్యురీ నుంచి కోలుకోకపోవడంతో వరల్డ్ టెస్ట్ ఛాంపియన్​షిప్​ ఫైనల్​లోనూ ఆడలేకపోయాడు. లండన్​లో సర్జరీ జరిగాక.. ప్రస్తుతం అతడు రెస్ట్ తీసుకుంటున్నాడు. అయితే రాహుల్ తన మంచితనాన్ని మరోసారి చాటుకున్నాడు. ఉన్నత చదువులకు ఫీజులు కట్టేందుకు డబ్బులు లేక ఇబ్బంది పడుతున్న ఒక పేద విద్యార్థికి తాను ఉన్నానని భరోసా ఇచ్చాడు రాహుల్.

కర్నాటక, మహాలింగాపూర్​కు చెందిన అమృతన్ మావింకట్టి అనే స్టూడెంట్ ఇటీవల పీయూసీ కామర్స్ రిజల్ట్స్​లో 600 మార్కులకు 571 మార్కులు తెచ్చుకున్నాడు. అయితే ఉన్నత చదువుల కోసం కేఎల్​ఈ ఇన్​స్టిట్యూట్​లో సీఏ కోచింగ్​కు వెళ్లాడు. అడ్మిషన్ దక్కాలంటే యాజమాన్య బోర్డుకు రూ.75 వేలు చెల్లించాల్సి వచ్చింది. కానీ రూ.25 వేలు మాత్రమే సర్దుబాటు అయ్యాయి. కుటంబ ఆర్థిక పరిస్థితి బాగోలేక ఫీజు కట్టేందుకు ఇబ్బంది పడుతున్న అమృతన్ గురించి కేఎల్ రాహుల్​కు తెలిసింది. దీంతో అతడి విద్యాభ్యాసానికి సంబంధించిన ఖర్చులను భరించేందుకు ముందుకు వచ్చాడు కేఎల్ రాహుల్. అమృతన్ కాలేజీ ఫీజును చెల్లించడంతో పాటు అతడికి వసతి, పుస్తకాలకు అవసరం అయ్యే ఖర్చును కూడా తానే భరిస్తానని కేఎల్ రాహుల్ హామీ ఇచ్చాడు. దీంతో ఈ టీమిండియా స్టార్ బ్యాటర్​పై సోషల్ మీడియాలో నెటిజన్స్ ప్రశంసల జల్లులు కురిపిస్తున్నారు.