గాయంపై స్టార్ ప్లేయర్ అప్​డేట్.. ఆర్సీబీ అభిమానుల్లో కలవరం!

ఐపీఎల్ ప్రారంభానికి మరో వారం రోజులు కూడా లేదు. ఈ మెగా టోర్నీ ఆరంభం కోసం ప్రేక్షకులతో పాటు ప్లేయర్లు కూడా అంతే ఆతృతగా ఎదురు చూస్తున్నారు. అయితే గాయాల బెడద ఫ్రాంచైజీలను తీవ్రంగా ఇబ్బంది పెడుతోంది. ఇంజ్యురీల కారణంగా ఇప్పటికే కొంతమంది కీలక ఆటగాళ్లు టోర్నీకి దూరమయ్యారు. మరికొంత మంది ఆడేది, లేనిది సందేహాస్పదంగా మారింది. అలాంటి లిస్టులో ఆస్ట్రేలియా స్టార్ ఆల్​రౌండర్ గ్లెన్ మ్యాక్స్​వెల్ పేరు కూడా వినిపిస్తోంది. స్వదేశంలో టీ20 వరల్డ్​కప్-2022 ముగిసిన అనంతరం గాయం కారణంగా కొన్నాళ్లు ఆటకు దూరమయ్యాడు మ్యాక్స్​వెల్. మెల్​బోర్న్​లో ఓ పుట్టిన రోజు కార్యక్రమానికి వెళ్లిన అతడు.. యాక్సిడెంట్​కు గురయ్యాడు. ఈ ప్రమాదంలో మ్యాక్సీ ఎడమ కాలికి తీవ్ర గాయమైంది. సర్జరీ పూర్తయిన తర్వాత మళ్లీ బ్యాట్ పట్టాడు.

ఇటీవల భారత జట్టుతో జరిగిన వన్డే సిరీస్​లో మ్యాక్స్​వెల్ భాగమయ్యాడు. ఇప్పుడు ఐపీఎల్​కు కూడా అతడు అందుబాటులోకి వచ్చాడు. అయితే, తాను గాయం నుంచి ఇంకా పూర్తిగా కోలుకోలేదంటూ బాంబు పేల్చాడీ ఆల్‌రౌండర్‌. ‘ఫర్లేదు, కాళ్లు బాగానే ఉన్నాయి. అయితే నూరుశాతం ఫిట్‌నెస్‌ సాధించాలంటే ఇంకొన్ని నెలలు పడుతుంది. ఏది ఏమైనా అంతా సజావుగా సాగి.. టోర్నీ మొత్తం బాగా ఆడాలని కోరుకుంటున్నా’ అని మ్యాక్స్​వెల్ పేర్కొన్నాడు. ఈసారి మ్యాక్సీ మెరుపులు చూడాలని ఆశపడుతున్న ఫ్యాన్స్​కు.. మ్యాక్స్‌వెల్‌ తాజా కామెంట్స్​తో భయం పట్టుకుంది. అతడికి గాయం తిరగబెడితే పరిస్థితి ఏంటనే ఆందోళన ఆర్సీబీ అభిమానుల్లో మొదలైంది. ఇదిలా ఉంటే.. ఆర్సీబీ టీమ్​తో చేరిన మ్యాక్స్‌వెల్‌.. ప్రస్తుతం జోరుగా ప్రాక్టీస్ చేస్తున్నాడు. టీమిండియాతో వన్డే సిరీస్‌లో మ్యాక్స్‌వెల్‌కు ఒకే మ్యాచ్‌లో బ్యాటింగ్‌ చేసే చాన్స్ వచ్చింది. అందులో అతడు 8 రన్స్ చేశాడు.