సీఎం కూతురు సహా భారతీయ విద్యార్థులకు బెదిరింపులు!

ఖలిస్థానీ సానుభూతిపరుడు, వేర్పాటువాది అమృత్​పాల్ సింగ్ కోసం పోలీసులు తీవ్రంగా గాలిస్తున్నారు. దీంతో ఖలిస్థానీ మద్దతుదారులు తీవ్ర చర్యలకు దిగుతున్నారు. విదేశాల్లో ఉన్న భారతీయ విద్యార్థులపై బెదిరింపులకు పాల్పడుతున్నారు. అక్కడ చదువుకుంటున్న స్టూడెంట్స్​పై దాడులు చేస్తామని, చంపేస్తామని బెదిరిస్తున్నారు. ఖలిస్థాన్ గ్రూపుల నుంచి తమకు బెదిరింపు లేఖలు, మెయిల్స్, సందేశాలు వచ్చాయని పలువురు విద్యార్థులు, రాజకీయ నేపథ్యం ఉన్న భారతీయ కుటుంబాలు వాపోతున్నాయి. ఈ క్రమంలో పంజాబ్ సీఎం భగవంత్ మాన్ కూతురు సీరత్ కౌర్​కు కూడా ఈ బెదిరింపులు వెళ్లాయని సమాచారం. సీరత్​కు బెదిరింపులు వెళ్లిన విషయాన్ని ఢిల్లీ మహిళా కమిషన్ చీఫ్ స్వాతి మలివాల్ తెలిపారు.

సియాటెల్​లో ఉంటున్న సీరత్ కౌర్​ను చంపేస్తామని ఖలిస్థానీ గ్రూపుల నుంచి బెదిరింపులు వెళ్లాయట. దీంతో ఆమెకు భద్రత కల్పించాలని అమెరికాలోని భారత రాయబార కార్యాలయాన్ని స్వాతి మలివార్ కోరారు. మరోవైపు ఈ బెదిరింపుల అంశాన్ని హర్మీత్ బ్రార్ అనే అడ్వకేట్ తన ఫేస్​బుక్ పోస్ట్​లో ప్రస్తావించారు. విద్యార్థులను బెదిరించినంత మాత్రాన, తిట్టినంత మాత్రాన ఖలిస్థాన్ సిద్ధిస్తుందా అని ఆమె తన పోస్ట్​లో ప్రశ్నించారు. సీరత్​ కౌర్​కు బెదిరింపులు వెళ్లిన విషయాన్ని ఆమె తల్లి ఇందర్​ప్రీత్ కౌర్ గ్రెవాల్ ధృవీకరించారు. ఈ వ్యవహారంతో తమకు సంబంధం లేదని.. తమను వదిలేయాలంటూ ఖలిస్థానీలకు ఆమె విజ్ఞప్తి చేశారు.

ఇదిలాఉంటే.. పంజాబ్ ముఖ్యమంత్రి భగవంత్ మాన్​ మొదటి భార్యే ఇందర్​ప్రీత్. వీళ్లకు ఇద్దరు సంతానం ఉన్నారు. అందులో ఒకరు కూతురు సీరత్​ కాగా.. మరొకరు కొడుకు దిల్షాన్​. 2015 నుంచి వీరిద్దరూ విడిగా ఉంటున్నారు. ఆ తర్వాత విడాకులు తీసుకున్నారు. అనంతరం కొడుకు, కూతురితో కలసి విదేశాలకు వెళ్లి స్థిరపడ్డారు ఇందర్​ప్రీత్. ఇక, గతేడాది గురుప్రీత్ కౌర్ అనే డాక్టర్​ను రెండో పెళ్లి చేసుకున్నారు మాన్. కాగా.. అమృత్​పాల్ సింగ్ కోసం పంజాబ్ పోలీసుల వేట ఇంకా కొనసాగుతోంది. గత 14 రోజులుగా అతడి కోసం వెతుకుతూనే ఉన్నారు. ఈ క్రమంలో అమృత్​పాల్ అనుచరులను వంద మందికి పైగా అరెస్ట్ చేశారు. వారిపై జాతీయ భద్రతా చట్టం కింద కేసులు నమోదు చేశారు.

Punjab Chief Minister Bhagwant Mann’s daughter Seerat Kaur Mann received abusive calls from pro-Khalistan elements, alleged a Patiala-based lawyer.https://t.co/TqoRJPjbHs

— The Indian Express (@IndianExpress) March 29, 2023

ఈరోజు ఏపీ, తెలంగాణకు సంబంధించిన లేటెస్ట్ న్యూస్.. జాతీయ, అంతర్జాతీయ వార్తలు.. ఎడ్యుకేషన్, బిజినెస్, సినిమా, స్పోర్ట్స్, టెక్ అప్డేట్స్.. ఆధ్యాత్మిక, ఆరోగ్య సమాచారంతో పాటు, వైరల్ కథనాల కోసం సుమన్ టీవీ యాప్‌ను డౌన్‌లోడ్ చేసుకోండి.