రాజధానిలో భారీ అగ్ని ప్రమాదం.. 7గురు సజీవదహనం

అది పేదలు నివసించే ప్రాంతం. పొట్ట చేతపట్టుకుని.. ఉపాధి కోసం ఉన్న ఊరిని, అయినవారిని వదులుకుని దూరంగా వచ్చారు. గుడిసెలు ఏర్పాటు చేసుకుని.. కష్టం చేసుకుంటూ జీవనం సాగిస్తున్నారు. అలాంటి వారిపై విధి పగపట్టింది. అగ్నిప్రమాదం రూపంలో మృత్యువు వారిని కబలించింది. ఈ విషాద సంఘటన దేశరాజధాని ఢిల్లీలో చోటు చేసుకుంది. శనివారం ఉదయం ఈ భారీ అగ్ని ప్రమాదం సంభవించింది. ఈ ఘటనలో ఏడుగురు సజీవదహనం కాగా.. మరికొందరు తీవ్రంగా గాయపడ్డారు. 60 గుడిసెలు దహనం అయ్యాయి. ఢిల్లీలోని గోకుల్‌పురి ప్రాంతంలో ఈ ప్రమాదం చోటుచేసుకుంది. విషయం తెలిసిన వెంటనే అగ్నిమాపక సిబ్బంది హుటాహుటిన అక్కడకు చేరుకున్నారు. మొత్తం 13 ఫైర్ ఇంజిన్ల సాయంతో మంటలను అదుపులోకి తీసుకొచ్చారు. ఘటనా స్థలంలో ఏడు మృతదేహాలను స్వాధీనం చేసుకున్నట్టు అధికారులు వెల్లడించారు.

ఇది కూడా చదవండి: హైదరాబాద్ లో భారీ అగ్ని ప్రమాదం.. పూర్తిగా కాలిపోయిన సినిమా ధియేటర్

ఈశాన్య ఢిల్లీ అదనపు డిప్యూటీ కమిషనర్ ఆఫ్ పోలీస్ దేవాన్ష్ కుమార్ మహ్లా మాట్లాడుతూ..‘‘శుక్రవారం అర్ధరాత్రి 1 గంట తర్వాత గోకుల్‌పురి పీఎస్ పరిధిలో అగ్ని ప్రమాదం సంభవించింది.. వెంటనే రెస్క్యూ సిబ్బంది అక్కడకు చేరుకున్నారు.. అగ్ని మాపక సిబ్బందికి సమాచారం ఇవ్వడంతో వారు కూడా వేగంగా స్పందించారు.. మూడు గంటల పాటు శ్రమించి శనివారం తెల్లవారుజాము 4 గంటలకు మంటలను అదుపులోకి తీసుకొచ్చాం’’ అని చెప్పారు. దీనిపై మీ అభిప్రాయాలను కామెంట్స్‌ రూపంలో తెలియజేయండి.