వాట్సప్‌లో క్యాబ్ బుకింగ్ సేవలు.. ఎలా బుక్ చేసుకోవాలంటే..?

ఇన్‌స్టంట్ మెసేజింగ్ యాప్ గా పరిచయమైన వాట్సప్ రాను.. రాను.. ఎన్నో సేవలను అందుబాటులోకి తెచ్చింది. బ్యాంకింగ్ సర్వీస్ మొదలుకొని షాపింగ్ వరకు అన్ని రకాల సేవలను వాట్సప్‌లో పొందొచ్చు. బ్యాంక్ అకౌంట్ బ్యాలెన్స్ చెక్ చేసుకోవచ్చు, ఒక ఖాతా నుంచి వేరొక ఖాతాకు అమౌంట్ ట్రాన్సఫర్ చేయొచ్చు, గ్రాసరీ ఆర్డర్ చేయొచ్చు, సిబిల్ స్కోర్ చెక్ చేయొచ్చు.. ఇలా అనేక రకాల సేవలు వాట్సప్‌లో అందుబాటులో ఉన్నాయి. తాజాగా, వాట్సప్‌లోనే క్యాబ్ బుక్ చేసుకునే సేవలు ప్రారంభమయ్యాయి.

యూజర్లు వాట్సప్‌ ద్వారానే ఉబర్ క్యాబ్ బుక్ చేసుకోవచ్చు. ఈ సర్వీసులు అందించడానికి ఉబర్ సంస్థ ఈ ఏడాది ప్రారంభంలో వాట్సాప్‌‌తో భాగస్వామ్యం కుదుర్చుకుంది. ప్రస్తుతానికి ఈ సేవలు ఢిల్లీ–ఎన్​సీఆర్,​ లక్నో ప్రాంతాల్లో అందుబాటులో వచ్చాయి. మిగతా నగరాలకు త్వరలోనే విస్తరిస్తామని ఉబర్​ ప్రకటించింది. వాట్సాప్​ యూజర్లు కేవలం మొబైల్ నంబర్‌‌కు మెసేజ్​ పంపడం ద్వారా ఉబర్​ ట్యాక్సీని బుక్ చేసుకోవచ్చు. అంతేగాక తమ ట్రిప్ రసీదును వాట్సాప్​లోనే పొందవచ్చు. ఇంగ్లీష్, హిందీ భాషలను ఉపయోగించి వెహికల్​ను బుక్ చేసుకోవచ్చు. వాట్సాప్ ద్వారా క్యాబ్ సర్వీసులను బుక్​ చేసుకోవడం ఎలాగో ఇప్పుడు తెలుసుకుందాం..

• ముందుగా మీ ఫోన్ లో ఉబర్​ అధికారిక నంబర్‌‌ +91 7292000002ను సేవ్ చేయాలి.
• సేవ్ చేసిన తర్వాత, వాట్సాప్​ ఓపెన్ చేసి ఉబర్​ చాట్‌‌బాట్‌‌తో కొత్త చాట్‌‌ని ప్రారంభించండి. సేవ్​ చేయకుంటే http://wa.me/917292000002 ద్వారా చాట్‌‌ని ప్రారంభించవచ్చు
• చాట్‌‌లో ‘Hi’ లేదా ‘HI Uber’ అని మెసేజ్​ చేయండి.
• ఇప్పుడు మీ పికప్/ డెస్టినేషన్ పాయింట్‌‌ల పూర్తి చిరునామాను పంపండి. పికప్ కోసం లైవ్​ లొకేషన్​ను​ కూడా షేర్ చేయవచ్చు
• ఇప్పుడు ఉబర్ ఈ ప్రయాణానికి వసూలు చేసే ఛార్జీలు, ప్రయాణ సమయం వంటి వివరాలు వస్తాయి.
• ఆ చార్జీలకు మీరు అంగీకరించినట్లయితే మెసేజ్​ పంపాలి. ఇప్పుడు, సమీపంలోని డ్రైవర్ రైడ్ రిక్వెస్టును అంగీకరించిన తర్వాత ఉబర్​ మీకు వాట్సాప్​లో నోటిఫికేషన్‌‌ను పంపుతుంది. కాసేపట్లో వెహికల్​మీ ముందుకు వస్తుంది.