మరోసారి టీవీల్లో ‘రామాయణం’ సీరియల్.. రీ టెలికాస్ట్ అందుకేనా?

డార్లింగ్ ప్రభాస్ నటించిన ‘ఆదిపురుష్’ మూవీ ఇండస్ట్రీలో హాట్ టాపిక్​గా మారిన విషయం తెలిసిందే. ఈ చిత్రం టీజర్ రిలీజ్ అయినప్పటి నుంచి మొదలైన విమర్శలు.. సినిమా విడుదలై రెండు వారాలైనా ఇంకా కొనసాగుతున్నాయి. ‘ఆదిపురుష్​’లో డైలాగులు, పాత్రల వేషధారణలపై ఎన్నో విమర్శలు వినిపించాయి. మూవీ డైరెక్టర్ ఓం రౌత్​పై సోషల్ మీడియాలో పెద్ద ఎత్తున ట్రోలింగ్ నడిచింది. ఆయనకు అసలు రామాయణం గురించి ఏమీ తెలియదని నెటిజన్స్ ఫైర్ అయ్యారు. అతడ్ని భారీగా ట్రోల్ చేశారు. రామాయణంపై సినిమా అంటూ ‘ఆదిపురుష్​’ను రౌత్ చెడగొట్టాడని దుయ్యబట్టారు. రామాయణంపై ఫిలిం తీయాలనుకునేవారు ముందు దాని ఆధారంగా రామానంద్ సాగర్ రూపొందించిన రామాయణం సీరియల్​ను ఒకసారి చూడాల్సిందంటూ చాలా మంది కామెంట్స్ చేశారు.

‘ఆదిపురుష్’ రిలీజ్ తర్వాత ఆ ఫిలింలోని క్యారెక్టర్లను రామాయణం సీరియల్​లోని పాత్రలతో పోలుస్తూ నెట్టింట భారీగా పోస్టులు వెల్లువెత్తాయి. రామాయణం సీరియల్​ను మరోసారి టెలికాస్ట్ చేయాలని కోరుతూ నెజటిన్స్ కామెంట్స్ చేశారు. దీంతో షెమారూ టీవీ ఛానల్ కీలక నిర్ణయం తీసుకుంది. జులై 3వ తేదీ నుంచి రామాయణం సీరియల్​ను రీ టెలికాస్ట్ చేస్తున్నట్లు ప్రకటించింది. ప్రతిరోజు రాత్రి 7 గంటల 30 నిమిషాలకు ప్రసారం చేస్తామని షిమారూ సోషల్ మీడియా పోస్ట్ ద్వారా తెలిపింది. అయితే ఎందుకో తెలియదు గానీ, ఆ తర్వాత కొద్ది సేపటికే ఆ ఛానల్ ఈ పోస్ట్​ను తొలగించింది. రామానంద్ సాగర్ తీసిన రామాయణంలో రాముడిగా అరుణ్ గోవిల్, సీతగా దీపికా చిక్లియా యాక్ట్ చేశారు. కాగా, ‘ఆదిపురుష్’ ఎఫెక్ట్​తోనే ఈ సీరియల్​ను మళ్లీ టెలికాస్ట్ చేస్తున్నారని సమాచారం. మరి.. రీ టెలికాస్ట్ కానున్న రామాయణం సీరియల్​ను చూసేందుకు మీరు ఎదురుచూస్తున్నారా? అయితే మీ అభిప్రాయాలను కామెంట్ల రూపంలో తెలియజేయండి.