ఇండియన్ బాక్సాఫీస్‌ను ప్రభాస్‌కు రాసిచ్చారా? కొడితే వేల కోట్లే!

ఈ రోజుల్లో సినిమాలు తీయడం ఒక లెక్కయితే వాటికి ప్రమోషన్ మరో లెక్క​ అనేలా ఉంది. కొన్నాళ్ల కింద వరకు టీజర్, ట్రైలర్​తోనే సినిమాలపై బజ్ ఏర్పడేది. కానీ ఇప్పుడు ప్రమోషన్స్​ను బట్టి కూడా మూవీస్​పై హైప్ పెరుగుతోంది. ఫస్ట్ డే కలెక్షన్స్ భారీగా రావాలంటే సినిమా మీద మంచి బజ్ ఏర్పడాలి. అదే సమయంలో ఎక్కువ థియేటర్లు దొరకాలి. ఇవన్నీ కుదిరి, మార్కెట్​లో పెద్దగా పోటీ లేకపోతే వసూళ్ల పండుగ చేసుకోవచ్చు. ఇప్పుడు ప్రభాస్ నటిస్తున్న ‘ఆదిపురుష్’ సినిమా పరిస్థితి ఇలాగే ఉంది. భారీ బడ్జెట్​తో రూపొందిన ఈ చిత్రం టీజర్​పై నెగెటివ్ ట్రోల్స్ వినిపించాయి. అయితే ట్రైలర్ విడుదలతో అంతా మారిపోయింది. మంచి పాజిటివ్ బజ్​తో రిలీజ్​కు రెడీ అవుతున్న ‘ఆదిపురుష్’కు అన్నీ శుభ శకునాలే కనిపిస్తున్నాయి. ఈ మూవీ ముందు అనుకున్నట్లు సంక్రాంతికి విడుదలైతే ఏమై ఉండేదో చెప్పలేం. కానీ ఇప్పుడు మాత్రం ఫిల్మ్​కు బాక్సాఫీస్ వద్ద పూర్తిగా అనుకూల పరిస్థితులు ఉన్నాయి.

సమ్మర్​లో పెద్ద సినిమా లేక ఆడియెన్స్ కరవులో ఉన్నారు. దీనికి తోడు ‘ఆదిపురుష్’ రిలీజ్​కు ముందు వరకు బాక్సాఫీస్​ వద్ద స్తబ్దత కనిపిస్తోంది. ఈ మూవీ రిలీజ్​కు వారం ముందు వస్తున్న ‘టక్కర్’, ‘విమానం’ సినిమాలపై పెద్దగా అంచనాలు లేవు. ఆడియెన్స్ దృష్టి మొత్తం ‘ఆదిపురుష్’ మీదే కేంద్రీకృతమై ఉంది. ఈ సినిమా విడుదలయ్యే వారాంతంలో​ తెలుగులోనే కాదు.. ఇతర భాషల్లోనూ చెప్పుకోదగ్గ రిలీజ్​లు లేవు. ఆ తర్వాతి వారమూ పెద్దగా పోటీ ఉండే ఛాన్స్ కనిపించడం లేదు. జూన్ చివర్లో నిఖిల్ ‘స్పై’ మోస్తరు అంచనాలతో రాబోతోంది. అప్పటిదాకా ‘ఆదిపురుష్​’ నిలబడితే బాక్సాఫీస్ దగ్గర కలెక్షన్ల మోత మోగించొచ్చు. మొత్తంగా చెప్పాలంటే.. ఇటు ఆడియెన్స్ మూడ్, అటు బాక్సాఫీస్ పరిస్థితులు ‘ఆదిపురుష్’కు పూర్తి అనుకూలంగా ఉన్నాయనేది స్పష్టం. దీంతో ఇండియన్ బాక్సాఫీస్​ను ప్రభాస్​కు రాసిచ్చారా అనేలా ఉంది. ఔట్​పుట్ బాగుంటే వసూళ్లలో ఈ చిత్రం కొత్త రికార్డులు నెలకొల్పడం ఖాయం.