సంక్రాంతి బరిలో 9 సార్లు పోటీపడ్డ చిరు, బాలయ్య! గెలిచింది ఎవరంటే?

సినిమా ఇండస్ట్రీలో స్టార్‌ వార్‌ అన్నది సర్వ సాధారణం. ఇద్దరు హీరోలు నేరుగా గొడవ పడకపోయినా.. వారి సినిమాలు ఒకదానితో ఒకటి పోటీ పడుతూనే ఉంటాయి. ముఖ్యంగా పండగల సందర్భంలో. తెలుగు నాట సంక్రాంతికి పెద్ద సినిమాలు విడుదల చేయటం ఎన్నో ఏళ్లనుంచి వస్తోంది. ఇలా ఇండస్ట్రీలో సంక్రాంతికి తమ సినిమాలు విడుదల చేసి పోటీ పడ్డ స్టార్‌ హీరోల్లో మెగాస్టార్‌ చిరంజీవి- నందమూరి నటసింహం బాలకృష్ణల ద్వయం ఒకటి. వీరిద్దరూ దాదాపు 30 ఏళ్లుగా చాలా సార్లు సంక్రాంతికి తమ సినిమాలతో పోటీ పడ్డారు. ఓసారి ఒకరి సినిమా మంచి విజయాన్ని సాధిస్తే.. మరోసారి మరొకరి సినిమా మంచి ఫలితాలను రాబట్టింది.

ఇప్పటివరకు వీరిద్దరూ 9 సార్లు సంక్రాంతి బరిలో నిలిచారు. మరోసారి కూడా సంక్రాంతి బరిలో నిలవటానికి సిద్దంగా ఉన్నారు. 2023 సంక్రాంతి సందర్భంగా చిరంజీవి నటిస్తున్న వాల్తేరు వీరయ్య, బాలకృష్ణ నటిస్తున్న వీర సింహారెడ్డి సినిమాలు థియేటర్లలో పోటీకి దిగనున్నాయి. మరి, వీరిలో వీరయ్య గెలుస్తాడా? లేక వీర సింహారెడ్డి గెలుస్తాడా? అన్నది ప్రేక్షకులే నిర్ణయిస్తారు. అంతా బాగుంటే రెండు సినిమాలు మంచిగా ఆడే అవకాశం ఉంది. మరి, గతంలో ఈ ఇద్దరు స్టార్‌ హీరోలు ఏఏ సినిమాలతో పోటీకి దిగారు? ఆ సినిమాలు మంచి విజయాన్ని సాధించాయా? లేదా? అన్నది ఇప్పుడు తెలుసుకుందాం.

• చిరంజీవి బాలకృష్ణ మొదటి సారి 1985లో సంక్రాంతి రేసులో బరిలోకి దిగారు. చిరంజీవి ‘‘చట్టంతో పోరాటం’’ అనే సినిమాతో జనవరి 13న థియేటర్లలోకి వచ్చారు. బాలకృష్ణ ఆత్మబలం అనే సినిమాతో జనవరి 14న థియేటర్లలోకి వచ్చారు. చట్టంతో పోరాటం హిట్టుగా నిలవగా.. ఆత్మబలం ఆవరేజ్‌ టాక్‌ను సొంతం చేసుకుంది.
• 1987లో చిరంజీవి ‘‘దొంగ మొగుడు’’ సినిమాతో.. బాలకృష్ణ ‘‘ భార్గవ రాముడు’’ సినిమాలతో బరిలోకి దిగారు. దొంగ మొగుడు సూపర్‌ హిట్టుగా నిలవగా.. భార్గవ రాముడు ఆవరేజ్‌ టాక్‌ను సొంతం చేసుకుంది.
• 1988లో చిరంజీవి ‘‘మంచి దొంగ’’ అనే సినిమాతో.. బాలకృష్ణ ‘‘ఇన్‌స్పెక్టర్‌ ప్రతాప్‌’’ అనే సినిమాతో సంక్రాంతి బరిలో దిగారు. మంచి దొంగ హిట్‌ అవ్వగా.. భార్గవ రాముడు ఎబౌ యావరేజ్‌గా నిలిచింది.
• 1997లో మెగాస్టార్‌ చిరు ‘‘హిట్లర్‌’’ సినిమాతో.. బాలకృష్ణ ‘‘పెద్దన్నయ్య’’ సినిమాతో ప్రేక్షకుల ముందుకు వచ్చారు. ఈ రేసులో ఇద్దరూ సూపర్‌ హిట్లుగా నిలిచాయి.
• 1999లో మెగాస్టార్‌ చిరంజీవి ‘‘స్నేహం కోసం’’ సినిమాతో.. బాలకృష్ణ ‘‘సమరసింహారెడ్డి’’తో సంక్రాంతి బరిలో నిలిచారు. సమర సింహారెడ్డి సూపర్‌ హిట్టు అవ్వగా.. స్నేహం కోసం ఎబౌ యావరేజ్‌గా నిలిచింది.
• 2000లో చిరంజీవి ‘‘అన్నయ్య’’ సినిమాతో.. బాలకృష్ణ ‘‘వంశోద్ధారకుడు’’ సినిమాతో ప్రేక్షకుల ముందుకు వచ్చారు. ఈ రేసులో ‘‘అన్నయ్య’’ సూపర్‌ హిట్‌గా నిలిచింది. వంశోద్ధారకుడు అంతగా ఆడలేదు.
• 2001లో చిరంజీవి ‘‘మృగరాజు’’తో.. బాలకృష్ణ ‘‘నరసింహనాయుడు’’ సినిమాతో సంక్రాంతి బరిలోకి దిగారు. నరసింహనాయుడు సూపర్‌ హిట్‌ అవ్వగా.. మృగరాజు అంతగా ఆడలేదు.
• 2004లో చిరంజీవి ‘‘అంజి’’ సినిమాతో రాగా.. బాలకృష్ణ ‘‘లక్ష్మీ నరసింహ’’ సినిమాతో ప్రేక్షకుల ముందుకు వచ్చారు. లక్ష్మీ నరసింహ సూపర్‌ హిట్‌ అవ్వగా.. అంజి అంతగా ఆడలేదు.
• 2017లో చిరంజీవి చాలా ఏళ్ల తర్వాత ‘‘ ఖైదీ నెంబర్‌ 150’’తో.. బాలకృష్ణ హిస్టారికల్‌ మూవీ ‘‘ గౌతమీ పుత్ర శాతకర్ణి’’తో బరిలోకి దిగారు. ఖైదీ నెంబర్‌ 150 హిట్‌ అవ్వగా.. గౌతమీ పుత్ర యావరేజ్‌ హిట్‌ టాక్‌ను సొంతం చేసుకుంది.
• 2023లో చిరంజీవి ‘‘ వాల్తేరు వీరయ్య’’తో.. బాలకృష్ణ ‘‘  వీర సింహారెడ్డి’’ తో సంక్రాంతి బరిలో దిగనున్నారు. మరి ఈ రేసులో ఎవరు గెలుపొందుతారు అన్నది మరికొన్ని రోజుల్లో తెలుస్తుంది.