బ్యాటర్ల వెన్నులో వణుకు పుట్టిస్తున్న సిరాజ్.. అతడి సక్సెస్ వెనుక ఇంత కష్టం దాగుందా!

టీమిండియా స్టార్ పేసర్ మహ్మద్ సిరాజ్ తన ఫామ్​ను కొనసాగిస్తున్నాడు. ఇండియన్ ప్రీమియర్ లీగ్​లో బ్యాటర్లకు వెన్నులో వణుకు పుట్టిస్తున్నాడు. రాయల్ ఛాలెంజర్స్ బెంగళూరు విజయాల్లో సిరాజ్​ కీలక పాత్ర పోషిస్తున్నాడు. గురువారం పంజాబ్ కింగ్స్​తో జరిగిన మ్యాచ్​లో మరోసారి తన ప్రతాపం చూపించాడీ రైటార్మ్ పేసర్. 4 ఓవర్లలో 24 రన్స్ ఇచ్చి 4 వికెట్లు తీశాడు. సిరాజ్ దెబ్బకు పంజాబ్ బ్యాటర్లు వణికిపోయారు. ఇన్నింగ్స్ ఆరంభంలో కొత్త బాల్​తో ప్రత్యర్థిని దెబ్బకొట్టిన సిరాజ్.. ఓల్డ్ బాల్​తోనూ పంజాబ్ పనిపట్టాడు. ఫీల్డింగ్​లోనూ సత్తా చాటి మ్యాన్ ఆఫ్ ది మ్యాచ్​గా నిలిచాడు. ఈ మ్యాచ్​లో తొలుత బ్యాటింగ్ చేసిన ఆర్సీబీ 20 ఓవర్లలో 4 వికెట్లు కోల్పోయి 174 రన్స్ చేసింది. డుప్లెసిస్ (84), కోహ్లీ (59) ఫస్ట్ వికెట్​కు 137 రన్స్ జోడించారు. పంజాబ్ బౌలర్లలో హర్​ప్రీత్ బ్రార్ (2/31) ఆకట్టుకున్నాడు.

లక్ష్య ఛేదనలో సిరాజ్ పంజాబ్​ను హడలెత్తించాడు. ఇన్నింగ్స్ రెండో బాల్​కే ఓపెనర్ అథర్వ (4)ను ఔట్ చేశాడు. భారీ అంచనాల మధ్య బరిలోకి దిగిన లివింగ్​స్టోన్ (2)ను సిరాజ్ కుదురుకోనీయలేదు. ఇన్ స్వింగింగ్ డెలివరీతో అతడ్ని వికెట్ల ముందు దొరకబుచ్చుకున్నాడు. సిరాజ్​తో పాటు హసరంగ, అలాగే మిగిలిన బౌలర్లు కూడా రాణించడంతో పంజాబ్ కింగ్స్ 18.2 ఓవర్లలో 150 రన్స్​కు ఆలౌట్ అయింది. గాయం నుంచి కోలుకుంటున్న శిఖర్ ధావన్ లేకపోవడం ఆ జట్టును తీవ్రంగా దెబ్బతీసింది. ఇకపోతే, ఈ మ్యాచ్​ ముగిసిన తర్వాత సిరాజ్ ఆసక్తికర వ్యాఖ్యలు చేశాడు. వన్డేలతో పాటు ఐపీఎల్​లోనూ రాణించడంపై హర్షం వ్యక్తం చేశాడు.

‘వన్డేల్లో నా బౌలింగ్ రిథమ్ బాగుంది. 50 ఓవర్ల ఫార్మాట్​లో రాణించడంతో ఆత్మవిశాసాన్ని నింపుకున్నా. దాన్నే ఐపీఎల్​లోనూ కొనసాగిస్తున్నా. పవర్ ప్లేలో వికెట్లు తీయడానికి ప్రయత్నిస్తా. ఇన్నింగ్స్ ఆరంభంలో వికెట్లు పడితే ప్రత్యర్థి జట్టు ఒత్తిడిలో కూరుకుపోతుంది. నేను మంచి ఫీల్డర్​ను. అయితే ఫీల్డింగ్​లో పదే పదే తప్పులు చేసేవాడ్ని. కానీ నిరంతరం మెరుపడటంపై దృష్టి పెడుతున్నా. జట్టు గెలుపులో నా వంతు కృషి చేస్తున్నా. నా బౌలింగ్ మెరుగుపడటానికి కరోనా లాక్​డౌన్ టైమ్​లో పడిన కష్టమే కారణం. అంతకుముందు వరకు నా బౌలింగ్​లో ఎక్కువ రన్స్ వచ్చేవి. కానీ జిమ్​లో చెమటోడ్చా. బౌలింగ్ లోపాలను సరిదిద్దుకున్నా’ అని సిరాజ్ తన సక్సెస్ సీక్రెట్ చెప్పేశాడు.